الماتى قالاسى المالى اۋداندىق سوتىندا «قازترانسگاز» ۇك اق باسشىسىنىڭ بۇرىنعى كەڭەسشىسى سانجار بوقاەۆقا قاتىستى قىلمىستىق ءىس بويىنشا سوت قاراۋى باستالدى.

سوت پروتسەسىنىڭ باسىندا توراعالىق ەتۋشى سۋديا جانات ابەنوۆا رەسمي مالىمدەمە جاساپ، پروتسەسكە قاتىسۋشىلار مەن سوت وتىرىسىنا جينالعاندارعا سوت زالىندا ساقتالۋعا ءتيىس ءتارتىپتى ءتۇسىندىردى. سونداي-اق، سوت تورەلىگىن جۇزەگە اسىرۋعا قانداي دا ءبىر قىسىم كورسەتۋگە جول بەرىلمەيتىنىن ەسكەرتتى.

سۋديا سوت تالقىلاۋىنىڭ جاريالىلىعىن قامتاماسىز ەتۋ ماقساتىندا باق وكىلدەرى مەن تىڭداۋشىلارعا ارنالعان انايى زالدا سوت وتىرىستارىنىڭ تىكەلەي كورسەتىلىمى ۇيىمداستىرىلعانىن ايتتى. سونىمەن قاتار ول دىبىس جانە بەينەجازبا جۇرگىزۋ، فوتوسۋرەتكە ءتۇسىرۋ ءتارتىبى قازاقستان رەسپۋبليكاسى قىلمىستىق-پروتسەستىك كودەكسىنىڭ 345-بابىمەن رەتتەلەتىنىن اتاپ ءوتتى. سوت زالىندا پروتسەستى وزگە تاسىلدەرمەن جازىپ الۋعا نەمەسە ترانسلياتسيا جاساۋعا، ونىڭ ىشىندە ۇيالى تەلەفونداردى پايدالانۋعا رۇقسات ەتىلمەيدى.

جانات ابەنوۆا ءوز مالىمدەمەسىندە سوت بيلىگىنىڭ تاۋەلسىزدىگىنە ەرەكشە توقتالدى. ول سوت تورەلىگىن جۇزەگە اسىرۋ كەزىندە سوتتىڭ تەك كونستيتۋتسيا مەن زاڭعا عانا باعىناتىنىن اتاپ ءوتتى. وسىعان بايلانىستى باق-تا نەمەسە الەۋمەتتىك جەلىلەردە جاريالاناتىن، قارالىپ جاتقان ءىستىڭ مانىنە قاتىستى كەز كەلگەن اشىق پىكىرلەر مەن تۇسىنىكتەمەلەر سوتقا تىكەلەي قىسىم كورسەتۋ رەتىندە باعالاناتىنىن ەسكەرتتى.

سۋديا جۋرناليستەر مەن ينتەرنەت قولدانۋشىلارىن سوت پروتسەسىن جاريالاۋدا جاۋاپكەرشىلىك تانىتۋعا شاقىردى. سونداي-اق قوعامدا ءىستىڭ ءمان-جايىنا قاتىستى الدىن الا تەرىس پىكىر قالىپتاستىرۋى مۇمكىن تەكسەرىلمەگەن، ارانداتۋشىلىق سيپاتتاعى اقپارات پەن مالىمدەمەلەردى تاراتۋدان قاتاڭ تۇردە باس تارتۋعا كەڭەس بەردى.

پروتسەسكە قاتىسۋشىلار مەن تىڭداۋشىلارعا سوت وتىرىسىنىڭ ءتارتىبىن بۇزۋ نەمەسە توراعالىق ەتۋشى سۋديانىڭ وكىمدەرىنە باعىنباۋ سوت زالىنان دەرەۋ شىعارۋعا جانە قازاقستان رەسپۋبليكاسى قىلمىستىق-پروتسەستىك كودەكسىنىڭ 346-بابىنا سايكەس سوتتى قۇرمەتتەمەگەنى ءۇشىن جاۋاپكەرشىلىككە تارتۋعا اكەپ سوعاتىنى رەسمي تۇردە ەسكەرتىلدى.

ەستەرىڭىزگە سالا كەتەيىك، سانجار بوقاەۆقا بىرقاتار قىلمىستىق ارەكەتتەر جاسادى دەگەن ايىپ تاعىلىپ وتىر. ءىس قىلمىستىق كودەكستىڭ 190, 188, 2018, 340 جانە 274 باپتارى بويىنشا قارالىپ جاتىر.

Abai.kz