قازاق ادەبيەتىنىڭ كورنەكتى وكىلى، جازۋشى-دراماتۋرگ، قوعام قايراتكەرى روللان سەيسەنباەۆتىڭ 80 جىلدىق مەرەيتويىنا ارنالعان ءىس-شارالار جالعاسىن تاپتى. اباي اتىنداعى تەاتر ساحناسىندا قالامگەردىڭ «مايدان اندەرى» سپەكتاكلى قويىلدى.

قويىلىمدا سوعىس جىلدارىنىڭ قاسىرەتى، مايدانگەرلەردىڭ جۇرەگىندە ساقتالعان ساعىنىش پەن شەر، ادام تاعدىرىنىڭ اۋىر كەزەڭدەرى بەينەلەندى. ساحنادا وربىگەن وقيعالار كورەرمەنگە ەرلىك پەن بەيبىت ءومىردىڭ قادىرى تۋرالى وي سالدى.

ءىس-شارا بارىسىندا اباي وبلىسىنىڭ اكىمى بەرىك ءۋالي ءسوز سويلەپ، روللان سەيسەنباەۆتى مەرەيتويىمەن قۇتتىقتادى. ايماق باسشىسى قالامگەردىڭ قازاق ادەبيەتىنە قوسقان ۇلەسى مەن ەڭبەگىن اتاپ ءوتىپ، ونى «اباي وبلىسىنا سىڭىرگەن ەڭبەگى ءۇشىن» توسبەلگىسىمەن ماراپاتتادى. سونداي-اق جازۋشىنىڭ يىعىنا شاپان جاۋىپ، قۇرمەت كورسەتتى.

قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى نۇرلان ءابدىروۆ پەن يتاليا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى انتونەللو دە ريۋ دا ءسوز سويلەپ، قالامگەرگە قۇتتىقتاۋ تىلەكتەرىن جەتكىزدى.

مەرەيتوي اياسىندا روللان سەيسەنباەۆ يتاليا رەسپۋبليكاسىنىڭ مەملەكەتتىك ماراپاتىنا يە بولىپ، «يتاليا جۇلدىزى» وردەنىنىڭ كاۆالەرى اتاندى.

Abai.kz