اقش پرەزيدەنتى دونالد ترامپتىڭ رەسەيمەن جاساسقان «ديزەل كەلىسىمىنەن» سوڭ ۋاشيڭتون رەسەي مەن ۋكراينا «ەنەرگەتيكالىق بىتىمگە كەلگەنىن» حابارلاعان. الايدا، كيەۆ ءبىتىمدى ساقتاعانىمەن، ماسكەۋ بۇل ءبىتىمنىڭ ەش ءمانى جوق ەكەنىن اشىق ايتىپ، سوققىلاردى جالعاستىردى.

وسىدان سوڭ، ۋكراينا پرەزيدەنتى ۆلاديمير زەلەنسكي رەسەي ءموز-دەرىنە سوققىلاردى قايتا جالعاستىراتىنىن حابارلادى.

ۋاشيڭتون بۇل باستاماعا ءۇزىلدى-كەسىلدى قارسى بولعانىمەن، ەۋروپا باسشىلارى ۋكراينانىڭ شەشىمىن قولداپ وتىر.

سونىمەن، ەۋروپا نە دەيدى؟ قاراڭىز:

گەرمانيا كانتسلەرى فريدريح مەرتس: «ءبىز ۋكراينا وسى قىستان امان شىعۋى ءۇشىن قولدان كەلگەن كومەكتىڭ ءبارىن بەرۋىمىز كەرەك. ول ءۇشىن كومەك كولەمىن ۇلعايتۋىمىزعا تۋرا كەلەدى»، - دەدى.

ليتۆا پرەزيدەنتى گيتاناس ناۋسەدا: «ۋكراينا ۇرىستى بىرجاقتى توقتاتا المايدى. ەگەر ۋكراينا سوققىنى توقتاتىپ، رەسەي جالعاستىرا بەرەتىن بولسا – بۇنىڭ سوڭى ناعىز اپاتقا الىپ كەلەدى»، - دەدى.

شۆەتسيا پرەمەرى ۋلف كريستەرسسون: «البەتتە، ۋكراينا رەسەيدىڭ ەكسپورتتان تاباتىن تابىسىن ازايتۋى ءۇشىن كومەك بەرۋ كەرەك. ال اقش-تىڭ رەسەيمەن كەلىسىمى – رەسەي سوعىسىن قارجىلاندىرۋدى دوعارۋ قادامدارىنا قايشى كەلەدى»، - دەدى.

فينليانديا پرەمەرى پەتتري ورپو: «ۋكراينا قورعانىس كۇرەسىن جالعاستىرۋعا ابدەن قۇقىلى. ول ءۇشىن قولدا بار مۇمكىندىكتىڭ ءبارىن قولدانۋى زاڭدىلىق. رەسەي ۋكراينانىڭ ازاماتتىق جانە ەنەرگەتيكالىق ينفراقۇرىلىمىن توقتاۋسىز سوققىلاپ جاتىر. سول ءۇشىن دە ۋكراينا ءوزى دۇرىس دەپ تاپقان امالدىڭ ءبارىن قولدانۋعا قۇقىلى»، - دەدى.

لاتۆيا پرەمەرى اندريس كۋلبەرس: «ۋكراينانىڭ الىس قاشىقتىققا جەتەتىن سانكتسيالارىنىڭ ءمانى دە، ماعىناسى دا، ءرولى دە ماڭىزدى. ول ناتيجەلى ەكەنىن دالەلدەگەن امال»، - دەدى.

ەستونيا پرەمەرى كريستەن ميحال: «رەسەيدىڭ مۇناي وڭدەۋ زاۋىتتارى مەن سوعىستى قارجىلاندىرۋ كوزدەرى نەعۇرلىم جىلدامىراق تالقاندالسا، سوعۇرلىم سوعىستى توقتاتۋدىڭ مۇمكىندىگى تۋا تۇسەدى»، - دەدى.

ەۋروديپلوماتيا باسشىسى كايا كاللاس: «ەگەر حالىقارالىق قۇقىق تۇرعىسىنان قارايتىن بولساق – بۇل سوققىلار ۋكراينانىڭ قورعانىس امالى. ءموز-دەر – رەسەي سوعىسىنىڭ باستى قارجىلاندىرۋ كوزى. سول ءۇشىن دە ۋكراينا رەسەي ءموز-دەرىن سوققىلاۋعا قۇقىلى»، - دەدى.

ەۋروپا ەلدەرىنەن رەسەي ءموز-دەرىن سوققىلاۋعا قارسى شىققان ەلدەر – بولگاريا مەن اۋستريا بولدى.

نۇرگەلدى ابدىعانيۇلى

Abai.kz