رەسپۋبليكا كۇنى قارساڭىندا جەتىسۋ وبلىسىندا بەيىمدەلگەن عيماراتتىڭ ورنىنا جاڭا مەكتەپ پايدالانۋعا بەرىلدى.

وسىلايشا، بيىل وڭىردە 5 جاڭا مەكتەپتىڭ قۇرىلىسى اياقتالىپ، تاعى 2 مەكتەپكە كۇردەلى جوندەۋ جۇمىستارى جۇرگىزىلدى. وبلىس قۇرىلعاننان بەرى 24 جاڭا ءبىلىم بەرۋ نىسانى سالىنىپ، 27 نىسانعا كۇردەلى جوندەۋ جۇرگىزىلدى. سونىمەن قاتار بەيىمدەلگەن عيماراتتاردا ورنالاسقان مەكتەپتەر سانى ەكى ەسە ازايدى.

جاڭا مەكتەپ كەربۇلاق اۋدانىنىڭ كوكساي اۋىلىندا پايدالانۋعا بەرىلدى. بۇعان دەيىن مەكتەپ 1970 جىلداردىڭ سوڭىندا سالىنعان، بەيىمدەلگەن ءبىر قاباتتى عيماراتتا ورنالاسقان ەدى. وندا اسحانا مەن سپورت زالى بولماعان. ال عيمارات سالىنعالى بەرى تەك اعىمداعى جوندەۋ جۇمىستارى جۇرگىزىلگەن.

- ءبىزدىڭ مەكتەپ 60 ورىنعا ارنالعان. بۇرىنعى عيماراتتىڭ سالىنعانىنا 50 جىلدان استام ۋاقىت بولعاندىقتان، قازىرگى تالاپتارعا ساي كەلمەدى. ەندى وقۋشىلارىمىز پاندىك كابينەتتەرمەن، سپورت جانە اكت زالدارىمەن، كىتاپحانا جانە زەرتحانالارمەن جابدىقتالعان زاماناۋي مەكتەپتە ءبىلىم الادى. قازىرگى ۋاقىتتا مەكتەبىمىزدە 20 مۇعالىم جۇمىس ىستەيدى، ونىڭ بەسەۋى – جاس مامان. مەكتەپتە 51 بالا وقيدى، - دەدى كوكساي نەگىزگى مەكتەبىنىڭ ديرەكتورى اسەم سارىباەۆا.

لەنتا قيۋ راسىمىنەن كەيىن ءىس-شاراعا قاتىسۋشىلار مەن اۋىل تۇرعىندارى جاڭا مەكتەپتىڭ ءىشىن ارالاپ كوردى.

جاڭا مەكتەپ تۋرالى ۇستازدار، وقۋشىلار مەن اتا-انالار پىكىر ءبىلدىردى.

- كوكساي مەكتەبىندە 38 جىل ەڭبەك ەتتىم. جاڭا مەكتەپتىڭ اشىلۋى – ءبارىمىز ءۇشىن، تۇتاس اۋىل ءۇشىن ۇلكەن قۋانىش. ارينە، بارلىق قاجەتتى قۇرال-جابدىقتارمەن قامتىلعان زاماناۋي مەكتەپتە بىزگە، ۇستازدارعا، جۇمىس ىستەۋ الدەقايدا قولايلى بولادى. مەن وسكەلەڭ ۇرپاقتىڭ تاربيەسىنە بۇدان بىلاي دا ۇلەسىمدى قوسا بەرەمىن، – دەدى مەكتەپ مۇعالىمى راۋزا سقاقباەۆا.

- بۇل مەكتەپتە مەنىڭ بالالارىم وقىدى، ەندى نەمەرەلەرىم ءبىلىم الىپ ءجۇر. بارلىق اۋىلداستارىمدى قۇتتىقتايمىن! بالالارىمىز جاڭا مەكتەپتە جاقسى وقىسىن، – دەدى اۋىل تۇرعىنى كوكۋ داەۆا.

- ەسكى مەكتەپ قىستا سالقىن بولاتىن، ال جاڭا مەكتەپ جىلى، جايلى ءارى جارىق. مۇندا ارنايى كابينەتتەر مەن سان ءتۇرلى جابدىقتار بار. ەندى وليمپيادالار مەن بايقاۋلارعا قاتىسۋعا مۇمكىندىگىمىز مولايدى. ءبىز مەكتەبىمىزدىڭ مارتەبەسىن كوتەرۋگە بپار كۇش-جىگەرىمىزدى سالامىز، - دەدى مەكتەپ وقۋشىسى سانيا اسحاتقىزى.

9-سىنىپ وقۋشىسى سايدحاسان بالتاەۆ تا وسىنداي پىكىردە:

- جاڭا مەكتەپ ەسكى مەكتەپتەن الدەقايدا ۇلكەن. جەكە سپورت زالى مەن زاماناۋي جابدىقتالعان ءتۇرلى كابينەتتەرى بار. ءبىلىم الۋعا جاعداي الدەقايدا جاقساردى. ءبىز دە جاقسى وقۋعا تىرىسامىز، – دەدى ول.

اتاپ وتسەك، بيىل وڭىردە پانفيلوۆ اۋدانىنىڭ سۇپتاي اۋىلىندا، تەكەلى قالاسىنىڭ رۋدنيچنىي اۋىلىندا، اقسۋ اۋدانىنىڭ كولتابان اۋىلىندا جانە كەربۇلاق اۋدانىنىڭ كوكساي اۋىلىندا جاڭا مەكتەپتەر پايدالانۋعا بەرىلدى. سونداي-اق كوكسۋ اۋدانىنىڭ بوزتوعان اۋىلىنداعى مۇسابەك اتىنداعى جانە ەسكەلدى اۋدانىنىڭ ەلتاي اۋىلىنداعى س. سەيفۋللين اتىنداعى مەكتەپتەرگە كۇردەلى جوندەۋ جۇمىستارى جۇرگىزىلدى.

بۇدان بولەك، قاراتال اۋدانىنىڭ ۇشتوبە قالاسىندا 600 ورىندى جاڭا مەكتەپتىڭ قۇرىلىسى جۇرگىزىلۋدە. سونىمەن قاتار قايتارىلعان اكتيۆتەر ەسەبىنەن كوكسۋ اۋدانىنىڭ بالپىق بي اۋىلىندا 600 ورىندىق مەكتەپ سالىنىپ جاتىر.

Abai.kz