رەسپۋبليكا كۇنى قارساڭىندا جەتىسۋ وبلىسىنىڭ تالدىقورعان قالاسىندا جاڭا قالالىق ەمحانا اشىلدى.

بۇل مەديتسينالىق مەكەمە قالانىڭ قارقىندى دامىپ، جاڭا تۇرعىن ۇيلەر سالىنىپ جاتقان بولىگىندە تۇراتىن حالىق ءۇشىن مەديتسينالىق كومەكتىڭ قولجەتىمدىلىگىن ارتتىرۋعا مۇمكىندىك بەرەدى. ءبىر اۋىسىمدا 500 ادام قابىلداۋعا ارنالعان ەمحانا تىركەلگەن 62 مىڭعا جۋىق تۇرعىنعا قىزمەت كورسەتەدى. جاڭا نىساننىڭ اشىلۋ سالتاناتىنا جەتىسۋ وبلىسىنىڭ اكىمى بەيبىت يساباەۆ قاتىستى.

اشىلۋ سالتاناتىنا قاتىسقان بەيبىت يساباەۆ جينالعان قاۋىمدى  ەمحانانىڭ اشىلۋىمەن قۇتتىقتادى:

- مەملەكەت باسشىسى قاسىم-جومارت كەمەلۇلى توقاەۆ حالىقتىڭ ءومىر ءسۇرۋ ساپاسىن ارتتىرۋعا، مەديتسينالىق كومەكتىڭ قولجەتىمدىلىگى مەن ساپاسىن جاقسارتۋعا ايرىقشا ءمان بەرىپ كەلەدى. وسى باعىتتاعى مىندەتتەردى جۇزەگە اسىرۋ – ءبىزدىڭ وڭىرلىك ساياساتىمىزدىڭ باسىم باعىتتارىنىڭ ءبىرى. تالدىقورعاندا ءۇشىنشى ەمحانانىڭ اشىلۋى – وسىنداي اتقارىلعان جۇيەلى جۇمىستاردىڭ ناقتى ناتيجەسى. بۇرىن بۇل عيمارات سوت ورگاندارىن ورنالاستىرۋ ءۇشىن سالىنىپ باستاعان ەدى. الايدا وبلىستار بولىنگەننەن كەيىن وعان قاجەتتىلىك بولمادى. سوندىقتان جوبانى حالىقتىڭ قاجەتىنە قاراي وزگەرتۋ تۋرالى شەشىم قابىلداندى. قالانىڭ وسى بولىگىندە تۇرعىن ءۇي قۇرىلىسىنىڭ قارقىندى جۇرۋىنە بايلانىستى حالىق سانى دا ارتىپ كەلەدى. وسىنى ەسكەرىپ، ۇلكەن ءارى زاماناۋي ەمحانا سالۋدى ءجون كوردىك. مۇنداي ەمحانا وڭىردە جوق: ءىشى دە، سىرتى دا ادەمى، اۋلاسى اباتتاندىرىلعان، قۇرال-جابدىقتارى جاڭا زامانعا ساي. جاڭا ەمحانانىڭ اشىلۋىمەن بارشاڭىزدى قۇتتىقتايمىن! بۇل ماڭىزدى الەۋمەتتىك نىسان تۇرعىنداردىڭ يگىلىگى ءۇشىن تابىستى قىزمەت ەتە بەرسىن، - دەگەن ب. يساباەۆ مەردىگەر ۇيىم باسشىلىعى مەن ۇجىمىنا قۇرىلىس جۇمىستارىن ساپالى ءارى مەرزىمىندە اياقتاعانى ءۇشىن العىس ايتتى.

ەمحانا زاماناۋي مەديتسينالىق قۇرالدارمەن جابدىقتالعان. مۇندا ماگنيتتىك-رەزونانستىق جانە كومپيۋتەرلىك توموگرافتار، رەنتگەن جانە مامموگرافيا اپپاراتتارى ورناتىلعان. سونىمەن قاتار قاجەتتى دياگنوستيكالىق زەرتتەۋلەر جۇرگىزۋگە ارنالعان جەكە زەرتحانا قاراستىرىلعان.

وبلىس اكىمىنىڭ ايتۋىنشا، وڭىردە مەديتسينالىق كومەكتىڭ ساپاسىن ارتتىرۋ ءۇشىن كادر تاپشىلىعى ماسەلەسىن شەشۋگە ەرەكشە كوڭىل بولىنەدى. وسىعان بايلانىستى وبلىسقا مەديتسينا ماماندارىن تارتۋ ماقساتىندا بىرجولعى كوتەرمەاقى تولەۋ كوزدەلگەن. قالاعا جۇمىسقا بارعان دارىگەرلەرگە 5 ملن تەڭگە، ال اۋىلدىق جەرلەرگە بارعان ماماندارعا 10 ملن تەڭگە كولەمىندە قولداۋ كورسەتىلەدى.

قابىلدانىپ جاتقان شارالاردىڭ ناتيجەسىندە دارىگەر تاپشىلىعى ەكى ەسەدەن استامعا قىسقاردى. ال 32 مەديتسينالىق ۋچاسكەسى جۇمىس ىستەيتىن جاڭا ەمحانانىڭ شتاتتىق بىرلىكتەرىنىڭ جالپى سانى 445. مەديتسينالىق مەكەمە ۋچاسكەلىك قىزمەت، جالپى پراكتيكا دارىگەرلەرىنىڭ قابىلداۋى جانە بەيىندى مامانداردىڭ كونسۋلتاتسيالارى بار العاشقى مەديتسينالىق-سانيتاريالىق كومەك كورسەتەدى.

جوبادا عيمارات ىشىندە جانە وعان ىرگەلەس اۋماقتا قوزعالىسى شەكتەۋلى ازاماتتاردىڭ كەدەرگىسىز كىرۋى مەن قاۋىپسىز ءجۇرىپ-تۇرۋىنا قاجەتتى جاعدايلار قاراستىرىلعان.

سالتاناتتى راسىمدە جاڭا عيماراتتىڭ سيمۆولدىق لەنتاسى قيىلدى. مۇنان كەيىن شاراعا قاتىسۋشىلار مەن قوناقتار ەمحانانىڭ ءىشىن ارالاپ كوردى. وبلىس اكىمى مەديتسينالىق كابينەتتەردەگى زاماناۋي قۇرال-جابدىقتاردىڭ جۇمىسىمەن جانە تۇرعىندارعا كورسەتىلەتىن مەديتسينالىق قىزمەتتەردىڭ ۇيىمداستىرىلۋىمەن تانىستى.

ەمحانا ديرەكتورى ساۋلە قۇسمولدانوۆانىڭ ايتۋىنشا، بۇل مەديتسينا نىسانى وتباسىلىق باعىتتا.

- مۇندا وتباسىلىق دەنساۋلىق ورتالىعى جۇمىس ىستەيدى. سول سياقتى تالدىقورعاندا العاش رەت امبۋلاتوريالىق حيرۋرگيا ورتالىعى اشىلادى. بارلىق شاعىن ينۆوزيالىق وپەراتسيالار وسى جەردە جاسالادى. كۇندىزگى ستاتسيونار، زاماناۋي زەرتحانا دا بار، دەدى سول.

جاڭا ەمحانانىڭ اشىلۋىنا قاتىستى مەديتسينا ماماندارى، سونداي-اق قالا تۇرعىندارى پىكىر ءبىلدىردى.

- وتكەن جىلى جۇبايىم ەكەۋمىز استانادان تالدىقورعانعا كوشىپ كەلدىك. كوتەرمەاقى الدىق، بۇل جاس وتباسىمىزعا ۇلكەن قولداۋ بولدى. ەندى جاڭا ەمحانادا جۇمىس ىستەيمىز. ەمحانا زاماناۋي مەديتسينالىق جابدىقتار ورناتىلعان، ساپالى دياگنوستيكادان وتۋگە مۇمكىندىك بار، بارلىعى جاڭا. وسىلايشا، قالامىزدا زاماناۋي مەديتسينالىق ورتالىق پايدا بولدى، - دەدى جالپى تاجىريبەلىك دارىگەر ءىلياس ءسابي.

- جاڭا ەمحانا تۋرالى جالپى اسەرىم وتە جاقسى. مۇندا كوپتەگەن جاڭا مەديتسينالىق اپپاراتتار بار ەكەن. بۇل – جاقسى جاڭالىق. ەندى قالامىزدا ساپالى مەديتسينالىق كومەك الۋدىڭ مۇمكىندىگى ارتا تۇسەدى، - دەدى تالدىقورعاندىق اناستاسيا سەلەۆانوۆا.

جەرگىلىكتى تۇرعىن ءانيات بەيسەمبەكۇلى دا وسىنداي پىكىردە:

- ەڭ باستىسى، مۇنىڭ ءبارى حالىقتىڭ يگىلىگى مەن دەنساۋلىعىن نىعايتۋ ءۇشىن جاسالىپ جاتىر. ءوزىم وسى شاعىناۋداندا تۇرامىن. ەندى دارىگەردىڭ قابىلداۋىنا بارۋ ءۇشىن قالانىڭ باسقا بولىگىنە قاتىناۋدىڭ قاجەتى بولمايدى. بۇل ەمحاناعا كەلۋ ماعان الدەقايدا ىڭعايلى، ونىڭ ۇستىنە مۇندا ءبارى جاڭا، - دەدى ول.

اتاپ وتسەك، بەس قاباتتى جاڭا ەمحانا عيماراتىنىڭ جالپى اۋدانى 11 562,7 شارشى مەتر.

جاڭا زاماناۋي مەديتسينالىق مەكەمەنىڭ اشىلۋى جەتىسۋ وبلىسىنىڭ دەنساۋلىق ساقتاۋ جۇيەسىن دامىتۋداعى جانە ءوڭىردىڭ الەۋمەتتىك ينفراقۇرىلىمىن جاڭعىرتۋ باعىتىنداعى كەزەكتى قادام دەۋگە بولدى.

جالپى، جەتىسۋ وبلىسى قۇرىلعاننان بەرى وڭىردە 149 جاڭا مەديتسينالىق نىسان سالىندى. ونىڭ 59-ى «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا بوي كوتەردى. سونىمەن قاتار 15 مەديتسينالىق نىسانعا كۇردەلى جوندەۋ جۇرگىزىلدى. سوڭعى 4 جىلدا الەۋمەتتىك سالا ينفراقۇرىلىمىن جاڭعىرتۋ دەڭگەيى 55,8%-عا جەتتى.

Abai.kz