2026 جىلعى 21 قازاندا XII باكۋ حالىقارالىق كىتاپ كورمەسى اياسىندا بەلگىلى قازاق جازۋشىسى، پۋبليتسيست جانە مەملەكەت قايراتكەرى ساۋىتبەك ابدراحمانوۆتىڭ «كوريفەي» كىتابىنىڭ تۇساۋكەسەرى ءوتتى. كىتاپتى تۇركى مادەنيەتى جانە مۇراسى قورى ازەربايجان تىلىندە جارىققا شىعاردى.

ءىس-شارادا تۇركى مادەنيەتى جانە مۇراسى قورىنىڭ پرەزيدەنتى، پروفەسسور اقتوتى رايىمقۇلوۆا، قازاقستان رەسپۋبليكاسىنىڭ ازەربايجان رەسپۋبليكاسىنداعى توتەنشە جانە وكىلەتتى ەلشىسى ءالىم بايەل، ازەربايجان ۇلتتىق عىلىم اكادەمياسىنىڭ پرەزيدەنتى، اكادەميك يسا گابيببەيلي، ازەربايجانداعى اتاتۇرىك ورتالىعىنىڭ ديرەكتورى، اكادەميك نيزامي دجافاروۆ، كىتاپ اۆتورى ساۋىتبەك ابدراحمانوۆ، سونداي-اق اۋدارماشىلار حانىم ايدىن مەن رابيعا نازىمقىزى ءسوز سويلەدى.

تۇساۋكەسەردە ءسوز سويلەگەن تۇركى مادەنيەتى جانە مۇراسى قورىنىڭ پرەزيدەنتى، پروفەسسور اقتوتى رايىمقۇلوۆا «كوريفەي» كىتابىنىڭ كورنەكتى قازاق ويشىلى، جازۋشى جانە قوعام قايراتكەرى ءابىش كەكىلباەۆتىڭ باي ادەبي جانە رۋحاني مۇراسىن زەرتتەۋ مەن ناسيحاتتاۋداعى ماڭىزىن اتاپ ءوتتى.

ول شىعارمانىڭ ازەربايجان تىلىندە جارىق كورۋى تۇركى حالىقتارىنىڭ ورتاق مادەني مۇراسىن ناسيحاتتاۋعا جانە ولاردىڭ اراسىنداعى ادەبي ءارى مادەني بايلانىستاردى نىعايتۋعا ۇلەس قوساتىنىنا سەنىم ءبىلدىردى. سونداي-اق پروفەسسور اقتوتى رايىمقۇلوۆا باسىلىمدى ازىرلەۋگە اتسالىسقان اۋدارماشىلارعا العىس ايتتى.

ءسوز العان وزگە قاتىسۋشىلار دا ءابىش كەكىلباەۆتىڭ تۇلعاسى مەن مۇراسىنىڭ ماڭىزىن اتاپ ءوتىپ، ونىڭ تۇركى الەمىنىڭ ادەبي جانە قوعامدىق وي تاريحىنداعى ەرەكشە ورنىنا توقتالدى.

كىتاپ اۆتورى ساۋىتبەك ابدراحمانوۆ ءوز سوزىندە شىعارمانىڭ جازىلۋ تاريحى، ءابىش كەكىلباەۆتىڭ ءومىرى مەن شىعارماشىلىعىنىڭ نەگىزگى كەزەڭدەرى، سونداي-اق ونىڭ قازاق ادەبيەتى مەن قوعامدىق ويدىڭ دامۋىنا قوسقان ۇلەسى تۋرالى باياندادى. اۆتور كىتاپتىڭ ازەربايجان تىلىندە جارىق كورۋى ءابىش كەكىلباەۆتىڭ مۇراسىن قالىڭ وقىرمانعا تانىستىرۋدا ماڭىزدى ەكەنىن اتاپ ءوتتى.

تۇساۋكەسەر بارىسىندا كىتاپ اۋدارماشىلارى حانىم ايدىن مەن رابيعا نازىمقىزى دا ءسوز سويلەپ، شىعارمانى ازەربايجان تىلىنە اۋدارۋ بارىسى جانە باسىلىمنىڭ وقىرماندار ءۇشىن ماڭىزى تۋرالى وي ءبولىستى.

ايتا كەتەيىك، XII باكۋ حالىقارالىق كىتاپ كورمەسى اياسىندا تۇركى مادەنيەتى جانە مۇراسى قورىنىڭ جاڭا باسىلىمدارىنىڭ تۇساۋكەسەرلەرى 26 قازانعا دەيىن جالعاسادى.

Abai.kz