رەسپۋبليكا كۇنى قارساڭىندا الماتىنىڭ ناۋرىزباي اۋدانىندا جالپى سىيىمدىلىعى 880 ورىن بولاتىن ءۇش مەملەكەتتىك بالاباقشا اشىلدى.

جاڭا مەكەمەلەر قالانىڭ قارقىندى دامىپ كەلە جاتقان شاعىناۋداندارىنىڭ تۇرعىندارى ءۇشىن مەكتەپكە دەيىنگى ءبىلىمنىڭ قولجەتىمدىلىگىن ارتتىرۋعا مۇمكىندىك بەرەدى.

اتاپ ايتقاندا، قۇرامىس شاعىناۋدانىندا 320 ورىندىق (13 توپ) №203 بوبەكجاي-بالاباقشا، «نۇرلى دالا» تۇرعىن ءۇي كەشەنىندە 320 ورىندىق (16 توپ) №204 بوبەكجاي-بالاباقشا جانە دوستىق شاعىناۋدانىندا 240 ورىندىق (10 توپ) №207 بوبەكجاي-بالاباقشا جۇمىسىن باستادى.

تۇرعىن ۇيلەر قارقىندى سالىنىپ، حالىق سانى ارتىپ كەلە جاتقان ناۋرىزباي اۋدانىندا بالاباقشا ورىندارىنا سۇرانىس جوعارى. سوندىقتان جاڭا مەكەمەلەردىڭ اشىلۋى اۋدان تۇرعىندارى ءۇشىن ەرەكشە ماڭىزدى.

بالاباقشالار جەلىسىن كەڭەيتۋ قازاقستان پرەزيدەنتى قاسىم-جومارت توقاەۆتىڭ مەكتەپكە دەيىنگى ۇيىمدارداعى ورىن تاپشىلىعىن ازايتۋ جانە تاربيە مەن وقىتۋ ساپاسىن ارتتىرۋ جونىندەگى تاپسىرمالارى اياسىندا جۇزەگە اسىرىلىپ جاتىر.

2026 جىلدىڭ باسىنان بەرى الماتىدا 60 مەكتەپكە دەيىنگى ۇيىم اشىلدى. ونىڭ ىشىندە 1 890 ورىندىق 9 مەملەكەتتىك بالاباقشا جانە جەكە ينۆەستيتسيا ەسەبىنەن اشىلعان 3 361 ورىندىق 51 جەكەمەنشىك مەكەمە بار. بۇعان قوسا، جۇمىس ىستەپ تۇرعان جەكەمەنشىك بالاباقشالاردى كەڭەيتۋ ارقىلى تاعى 723 ورىن اشىلدى.

جوندەۋ جانە قايتا جاڭعىرتۋ جۇمىستارىنان كەيىن №81, 37, 168, 89 جانە 10 مەملەكەتتىك بالاباقشا دا قايتا جۇمىس ىستەي باستادى. قالادا مەملەكەتتىك ءبىلىم بەرۋ تاپسىرىسىن ورنالاستىرۋ جانە مەكتەپكە دەيىنگى ءبىلىم بەرۋدى دامىتۋعا جەكە سەكتوردى تارتۋ جۇمىستارى جالعاسىپ جاتىر.

قابىلدانىپ جاتقان شارالارعا قاراماستان، اسىرەسە تۇرعىن ءۇي قۇرىلىسى قارقىندى ءجۇرىپ، حالىق سانى ءوسىپ كەلە جاتقان اۋدانداردا بالاباقشا ورىندارىنا دەگەن قاجەتتىلىك ءالى دە جوعارى.

قاجەتتىلىك كارتاسىنا سايكەس، 2030 جىلعا دەيىن الماتىدا جالپى سىيىمدىلىعى 16 200 ورىن بولاتىن تاعى 48 بالاباقشا سالۋ قاجەت. بۇل نىساندارعا ارنالعان جەر ۋچاسكەلەرى قالانىڭ باس جوسپارىندا قاراستىرىلعان. ال الداعى ءبىر جىلدا ءبىرىنشى كەزەكتە 18 بالاباقشا سالۋ قاجەتتىلىگى انىقتالدى.

قازىر جاڭا نىساندارعا ارنالعان جەر تەلىمدەرىن انىقتاۋ جانە قۇرىلىسقا دايىنداۋ جۇمىستارى جۇرگىزىلىپ جاتىر. بۇل رەتتە حالىقتىڭ تىعىزدىعى مەن تۇرعىن الاپتاردىڭ دامۋ مۇمكىندىگى ەسكەرىلەدى.

الداعى ۋاقىتتا بالاباقشا ورىندارىنىڭ سانىن مەملەكەتتىك بالاباقشالار سالۋ، جەكە ينۆەستيتسيا تارتۋ جانە قولدانىستاعى مەكەمەلەردى جاڭعىرتۋ ارقىلى ارتتىرۋ جوسپارلانىپ وتىر.

Abai.kz