قازاقستان بوكسشىسى جانىبەك ءالىمحانۇلى مەكسيكالىق ساۋل «كانەلو» الۆارەسكە ءۇن قاتتى. ول قارسىلاسىن 2027 جىلى جەكپە-جەككە شاقىرعىسى كەلەتىنىن اڭعارتتى، دەپ حابارلايدى Tizgin.kz.

31 قازاندا ساۋد ارابياسىنىڭ ەر-رياد قالاسىندا كانەلو كريستيان مبيلليگە قارسى جۇدىرىقتاسىپ، تورەشىلەردىڭ ءبىراۋىزدان شىعارعان شەشىمىمەن جەڭىسكە جەتتى. وسىلايشا مەكسيكالىق ەكىنشى ورتا سالماقتاعى WBC نۇسقاسى بويىنشا الەم چەمپيونى اتاندى.

كەزدەسۋدەن كەيىن ءالىمحانۇلى الەۋمەتتىك جەلىدە قارسىلاسىنا: «دايىن بول! مەن ساعان كەلە جاتىرمىن» دەپ جازدى.

ءالىمحانۇلى جەكپە-جەكتى قاشان وتكىزگىسى كەلەدى

قازاقستان بوكسشىسى كانەلو مەن مبيللي ايقاسىنا دەيىن-اق كەلەسى جىلعا جوسپارلاعان كەزدەسۋىن ايتقان. ءالىمحانۇلى جەڭىمپازبەن 2027 جىلدىڭ مامىرىندا جۇدىرىقتاسىپ، چەمپيوندىق بەلبەۋلەردى بىرىكتىرگىسى كەلەتىنىن جەتكىزگەن.

«قاڭتاردا سۋپەرورتا سالماقتا چەمپيوندىق تيتۋلدى جەڭىپ الامىن. مامىردا وسى جەكپە-جەكتىڭ جەڭىمپازىمەن كەزدەسىپ، تيتۋلداردى بىرىكتىرگىم كەلەدى»، – دەپ جازدى ول.

قازاقستاندىق بوكسشى قاڭتاردا جاڭا سالماقتا سىنعا تۇسەدى

جانىبەك ءالىمحانۇلى 2027 جىلى  23 قاڭتاردا جاڭا سالماقتا العاش رەت رينگكە شىعادى. ونىڭ قارسىلاسى – جەڭىلىپ كورمەگەن دات بوكسشىسى ياكوب بانك. جەكپە-جەكتە WBO نۇسقاسى بويىنشا بوس تۇرعان الەم چەمپيونى اتاعى ساراپقا سالىنادى.

ءالىمحانۇلى مەن ونىڭ كومانداسى كانەلومەن كەزدەسۋ وتكىزۋگە نيەتتى ەكەنىن بۇعان دەيىن دە ايتقان. قازاقستاندىق بوكسشىنىڭ مەنەدجەرى بەرىك سۇلتان Tengri Sport-قا بەرگەن سۇحباتىندا جانىبەكتىڭ ورتا سالماقتاعى بەلبەۋلەرىنەن باس تارتىپ، جوعارى سالماققا كوتەرىلۋىنىڭ ءبىر سەبەبى مەكسيكالىقپەن جۇدىرىقتاسۋ مۇمكىندىگى ەكەنىن ايتقان.

كانەلو ازىرگە ءالىمحانۇلىنىڭ شاقىرۋىنا جاۋاپ بەرگەن جوق. دەگەنمەن مەكسيكالىق باسىلىمدار مۇنداي جەكپە-جەك جانكۇيەرلەرگە قىزىق بولۋى مۇمكىن ەكەنىن جازعان.

Abai.kz