قاراعاندى وبلىسىندا 2032 جىلعا دەيىن جالپى قۇنى 7 ترلن تەڭگە بولاتىن 186 ينۆەستيتسيالىق جوبانى ىسكە اسىرۋ جوسپارلانعان. سونىڭ ناتيجەسىندە 36 مىڭ جاڭا جۇمىس ورنى اشىلماق. 

ءوڭىردىڭ توعىز ايداعى الەۋمەتتىك-ەكونوميكالىق دامۋ قورىتىندىلارى مەن الداعى جوسپارلارى مەملەكەت باسشىسى قاسىم-جومارت توقاەۆقا باياندالدى.

ەسەپتى كەزەڭدە وبلىستا ونەركاسىپ ءوندىرىسىنىڭ كولەمى 4,9 پايىزعا ءوسىپ، 4,2 ترلن تەڭگەگە جەتتى. ءوسىمنىڭ ەڭ جوعارى قارقىنى ماشينا جاساۋ سالاسىندا بايقالدى – 26,2 پايىز. ال وڭدەۋ ونەركاسىبىنىڭ نەگىزگى تىرەگىنىڭ ءبىرى – مەتاللۋرگيا سالاسى.

پرەزيدەنت ءوڭىردىڭ ەكونوميكالىق دامۋ كورسەتكىشتەرىنە وڭ باعا بەردى.

– قازىر وبلىس ەكونوميكاسى قارقىندى دامىپ كەلە جاتىر. بۇل، ارينە، قۋانىشتى جاعداي. اسىرەسە، ايماقتاعى شيكىزاتتىق ەمەس ءونىم ەكسپورتى ەداۋىر وسكەنىن اتاپ ءوتۋ كەرەك. اۋىر ونەركاسىپ سالاسىندا جالپى قۇنى 4,2 تريلليون تەڭگە بولاتىن ءونىم ءوندىرىلدى. بۇل – شىن مانىندە، زور جەتىستىك، – دەدى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ.

وڭىردە جەرگىلىكتى شيكىزاتتى وڭدەۋگە نەگىزدەلگەن ونەركاسىپتىك كلاستەرلەردى قالىپتاستىرۋعا باسىمدىق بەرىلىپ وتىر. ماسەلەن، Qarmet وندىرگەن بولاتتان QazTehna اۆتوبۋستارىنىڭ شاناق بولشەكتەرى جاسالادى. سونداي-اق «تەمپو» زاۋىتىندا قۇبىر وندىرىلەدى. Silumin of Qazaqstan كاسىپورنى نەگىزىندە اليۋميني كلاستەرى قالىپتاسىپ جاتسا، Karaganda Insulation جىلۋ وقشاۋلاعىش ماتەريالدار شىعارۋمەن اينالىسادى.

اگروونەركاسىپ كەشەنىندە بيىل 40 ينۆەستيتسيالىق جوبانى جۇزەگە اسىرۋ كوزدەلگەن. سۋارمالى جەرلەردىڭ كولەمى ارتىپ، اۋىل شارۋاشىلىعى ونىمدەرىن ءوسىرۋ مەن ساقتاۋدىڭ زاماناۋي تەحنولوگيالارى ەنگىزىلىپ جاتىر. وساكاروۆ اۋدانىندا زاماناۋي ءسۇت-تاۋار فەرماسىنىڭ ىسكە قوسىلۋى كەلەسى جىلدان باستاپ وبلىستىڭ سۇتكە دەگەن ىشكى قاجەتتىلىگىن تولىق وتەۋگە مۇمكىندىك بەرەدى.

سوڭعى ءۇش جىلدا وبلىستا 1,5 ملن شارشى مەتر تۇرعىن ءۇي پايدالانۋعا بەرىلدى. تۇرعىن ءۇي كەزەگىندە تۇرعان ازاماتتارعا 2,5 مىڭعا جۋىق پاتەر تابىستالدى.

الەۋمەتتىك ينفراقۇرىلىمدى دامىتۋ باعىتىنداعى جۇمىستار دا جالعاسۋدا. اۋىلدىق جەرلەردە 92 مەديتسينالىق نىسان اشىلدى. تەلەمەديتسينا قىزمەتى 117 مەديتسينالىق ۇيىمدا ەنگىزىلىپ، اۋىل حالقىن تۇگەل قامتىپ وتىر. سونىمەن قاتار جەدەل جاردەم اۆتوپاركىنە 113 جاڭا كولىك قوسىلدى.

ءبىلىم بەرۋ سالاسىندا 13 مەكتەپتىڭ قۇرىلىسى اياقتالدى. ونىڭ ونى «كەلەشەك مەكتەپتەرى» جوباسى اياسىندا سالىنعان. بۇدان بولەك، 29 ءبىلىم بەرۋ ۇيىمى جاڭعىرتۋدان ءوتتى. قازىر تاعى ءۇش مەكتەپ پەن بەس بالاباقشانىڭ، شىعارماشىلىقتى دامىتۋ ورتالىعى جانە وڭالتۋ ورتالىعىنىڭ قۇرىلىسى باستالدى.

وڭىردە سپورت ينفراقۇرىلىمىن كەڭەيتۋگە دە كوڭىل ءبولىنىپ وتىر. قاراعاندى قالاسىندا نەگىزگى سەرىكتەس Freedom كومپانياسىنىڭ قاتىسۋىمەن 3,5 مىڭ ورىندىق فۋتبول اكادەمياسىنىڭ قۇرىلىسى ءجۇرىپ جاتىر.

بۇدان بولەك، ۋەفا-نىڭ ءتورتىنشى سانات تالاپتارىنا سايكەس كەلەتىن، 15 مىڭ كورەرمەنگە ارنالعان ستاديون سالۋ جوسپارلانعان. سونداي-اق مۇمكىندىگى شەكتەۋلى جانداردىڭ سپورتپەن شۇعىلدانۋىنا ارنالعان نىساندار بوي كوتەرەدى. مادەنيەت سالاسىندا كونگرەسس-حولل سالۋ جانە التى نىساندى جاڭعىرتۋ كوزدەلگەن.

كوممۋنالدىق ينفراقۇرىلىمدى جاڭارتۋ جۇمىستارى اياسىندا 570 شاقىرىم ينجەنەرلىك جەلى جوندەۋمەن قامتىلعان. ەلدى مەكەندەردى گازداندىرۋ دا كەزەڭ-كەزەڭىمەن جالعاسىپ جاتىر. 2027 جىلعا قاراي 58 مىڭنان استام تۇرعىندى تابيعي گازعا قوسۋ جوسپارلانعان.

«تازا قازاقستان» باعدارلاماسى اياسىندا قاراعاندىدا سەرۋەندەۋگە جانە ۆەلوسيپەد تەبۋگە ارنالعان جولدارى بار ەكى ەكوپارك سالىنىپ جاتىر. قوعامدىق كەڭىستىكتەردى اباتتاندىرۋ جانە دامىتۋ جۇمىستارىنا ۋربانيستيكا ورتالىعى دا اتسالىسۋدا.

جىل قورىتىندىسى بويىنشا قاراعاندى وبلىسى ەكونوميكاسىنىڭ ءوسىمى 4 پايىز دەڭگەيىندە بولادى دەپ بولجانىپ وتىر.

الداعى كەزەڭدەگى نەگىزگى مىندەت – ونەركاسىپ ءوندىرىسىن ورىستەتىپ، ينۆەستيتسيا تارتۋ ارقىلى جاڭا جۇمىس ورىندارىن اشۋ جانە ءوڭىر تۇرعىندارىنىڭ تۇرمىس ساپاسىن ارتتىرۋ.

Abai.kz