ۇلتتىق قوردان الەۋمەتتىك جانە ينفراقۇرىلىمدىق جوبالارعا شامامەن 6,5 ترلن تەڭگە باعىتتالادى.

بۇل تۋرالى ۇكىمەت وتىرىسىندا پرەزيدەنت جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىن تانىستىرعان پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مالىمدەدى. قۇجات 12 باعىت بويىنشا 96 ءىس-شارانى قامتيدى.

جوسپار شەڭبەرىندە «حالىقتىق قۇرىلىس» ينفراقۇرىلىمدىق دامۋ باعدارلاماسى بەكىتىلەدى. ونى جۇزەگە اسىرۋ كەزىندە وتاندىق قۇرىلىس ماتەريالدارى مەن جابدىقتارىن پايدالانۋ كوزدەلگەن. قاراجات تكش-نى مودەرنيزاتسيالاۋعا، تۇرعىن ءۇي قۇرىلىسىنا، ەلدى مەكەندەردى اۋىزسۋمەن جانە گازبەن قامتاماسىز ەتۋگە، سونداي-اق كولىك ينفراقۇرىلىمىن دامىتۋعا باعىتتالادى. بۇل رەتتە ورىندالاتىن جۇمىستاردىڭ ساپاسىنا باقىلاۋ قامتاماسىز ەتىلەدى.

اتاپ ايتقاندا، 2027 جىلعى مامىردا زايسان، كاتونقاراعاي جانە كەندىرلىدەگى اۋەجايلاردى پايدالانۋعا بەرۋ، ال ماۋسىمدا استانادا جاڭا اۋەجاي قۇرىلىسىن باستاۋ جوسپارلانىپ وتىر. 2027 جىلدىڭ سوڭىنا دەيىن «باقتى – اياگوز» تەمىرجول جەلىسىنىڭ قۇرىلىسىن اياقتاۋ مەجەلەنگەن. سونداي-اق اۆتوموبيل جولدارىن، سونىڭ ىشىندە «ارال – كاسپي» جانە «كوكشەتاۋ – پەتروپاۆلوۆسك» تراسسالارىن سالۋ مەن قايتا جاڭارتۋ جۇمىستارى جالعاسادى. سوڭعى كەزەڭدە بارلىق اۆتوموبيل وتكىزۋ پۋنكتەرىنىڭ ينفراقۇرىلىمىن تولىق جاڭارتۋ، سونداي-اق ينتەللەكتىلى كولىك جۇيەسىن ەنگىزە وتىرىپ، جۇك تاسىمالىن ەلەكتروندىق قۇجات اينالىمىنا كوشىرۋ جوسپارلانعان.

Abai.kz