قۇرىلتايدىڭ اگرارلىق ماسەلەلەر، ەكولوگيا جانە تابيعي رەسۋرستار كوميتەتىنىڭ جەتەكشىسى سەرىك ەگىزباەۆتىڭ توراعالىعىمەن وتكەن كەڭەيتىلگەن وتىرىستا مەملەكەت باسشىسىنىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىندا بەرىلگەن تاپسىرمالاردى جۇزەگە اسىرۋ جولدارى تالقىلاندى. كەڭەيتىلگەن وتىرىسقا قۇرىلتاي توراعاسىنىڭ ورىنباسارى دانيا ەسپاەۆا، دەپۋتاتتار، جانە ءتيىستى مينيسترلىكتەردىڭ باسشىلىق وكىلدەرى قاتىستى.

القالى جيىندا ۆيتسە-سپيكەر دانيا ەسپاەۆا ءسوز سويلەپ، مەملەكەت باسشىسى جولداۋدا اۋىل شارۋاشىلىعى جانە سۋ رەسۋرستارى سالاسىندا ناقتى مىندەتتەر جۇكتەگەنىن، بۇل باعىتتار ەكولوگيا جانە تابيعي رەسۋرستار ماسەلەلەرىمەن تىعىز بايلانىستى ەكەنىن اتاپ ءوتتى.

– مەملەكەت باسشىسىنىڭ جالپىۇلتتىق جولداۋ دەڭگەيىنە وسى ماسەلەلەردى شىعارۋى جاعدايدىڭ شۇعىل جانە جۇيەلى شەشىمدەردى تالاپ ەتەتىنىن كورسەتەدى. پرەزيدەنت اۋىل شارۋاشىلىعى ونىمدەرىن تەرەڭ وڭدەۋ، ساقتاۋ جانە وتكىزۋ جۇيەسىن جەتىلدىرۋ، ءىرى شارۋاشىلىقتار مەن فەرمەرلەردىڭ اگرولوگيستيكالىق ورتالىقتارعا كەپىلدەندىرىلگەن قولجەتىمدىلىگى، «حالىق قۇرىلىسى» شەڭبەرىندە اۋىلدىق ينفراقۇرىلىمدى دامىتۋ، سونداي-اق اوك-گە جاساندى ينتەللەكت ەنگىزۋ بويىنشا مىندەتتەر قويدى،– دەدى ۆيتسە-سپيكەر.

دانيا ەسپاەۆا سونداي-اق، سۋ رەسۋرستارىنىڭ تاپشىلىعى ماسەلەسىنە مەملەكەت باسشىسى ەرەكشە نازار اۋدارعانىنا توقتالدى. پرەزيدەنت سۋدى تۇتىنۋعا باقىلاۋدى كۇشەيتۋدى، جەلىلەردەگى شىعىنداردى ازايتۋدى، تاريفتىك رەفورمانى سوڭىنا دەيىن جەتكىزۋدى جانە قىسقا مەرزىمدە سۋ رەسۋرستارىنىڭ ۇلتتىق اقپاراتتىق جۇيەسىن قۇرۋدى اياقتاۋدى تاپسىرعانىن ايتتى.

مەملەكەت باسشىسى سۋدىڭ ناقتى قۇنى بويىنشا باعالانۋى ءتيىس ەكەنىن، ال وعان ۇقىپتى قاراۋ شارۋاشىلىقتىڭ مىندەتتى قاعيداتى بولۋى قاجەتتىگىن اتاپ وتكەنىنە دە نازار اۋدارىلدى. بۇل تابيعاتتى ۇتىمدى پايدالانۋعا، ەكوجۇيەلەردى، وزەندەر مەن كولدەردى ساقتاۋعا، ياعني ەكولوگيالىق ۆەدومستۆونىڭ جاۋاپكەرشىلىك سالاسىنا تىكەلەي قاتىستى.

دانيا ەسپاەۆا قۇرىلتاي دەپۋتاتتارى پرەزيدەنتتىڭ تاپسىرمالارىنىڭ ءتيىمدى ءارى بەلگىلەنگەن مەرزىمدە ورىندالۋىنا ءوز ۇلەستەرىن قوساتىنىن جەتكىزدى.

سۋ رەسۋرستارى جانە يرريگاتسيا ءمينيسترىنىڭ ورىنباسارى جاندوس ءسالىموۆ مەملەكەت باسشىسىنىڭ قازاقستان حالقىنا جىل سايىنعى جولداۋلارىندا ايقىندالعان تاپسىرمالارىن ورىنداۋ اياسىندا سۋ سالاسىن جۇيەلى تۇردە ترانسفورماتسيالاۋ جۇمىستارى جۇرگىزىلەتىنىن ايتا كەلىپ، ونىڭ نەگىزگى باعىتتارىنا توقتالدى. ول: سالاعا قاتىستى زاڭنامانى جەتىلدىرۋ جانە مەملەكەتتىك باقىلاۋ; سۋ شارۋاشىلىعى ينفراقۇرىلىمىن جاڭعىرتۋ; حالىقارالىق قارجىلاندىرۋدى تارتۋ; سۋ ۇنەمدەۋ تەحنولوگيالارىن ەنگىزۋ; سۋ ۇنەمدەۋ مادەنيەتىن قالىپتاستىرۋ; تاريفتىك ساياساتتى جەتىلدىرۋ; سۋ رەسۋرستارىن باسقارۋدى تسيفرلاندىرۋ.

– سۋ رەسۋرستارىنىڭ ۇلتتىق اقپاراتتىق جۇيەسىنىڭ تولىققاندى جۇمىس ىستەۋىن قامتاماسىز ەتۋ، تاريفتىك ساياساتتى جەتىلدىرۋ جانە جاڭا سۋ كودەكسىنىڭ ەرەجەلەرىن ءىس جۇزىندە ىسكە اسىرۋ ەرەكشە ماڭىزعا يە. اتالعان شارالار تۇرعىنداردى جانە ەكونوميكانى سۋمەن قامتاماسىز ەتۋگە،  ستراتەگيالىق ماڭىزى بار سۋ وبەكتىلەرىن ساقتاۋعا جانە ەلىمىزدىڭ سۋ رەسۋرستارىنا قاتىستى ۇزاق مەرزىمدى قاۋىپسىزدىگىن نىعايتۋعا باعىتتالعان، – دەدى ۆيتسە-مينيستر.

اۋىل شارۋاشىلىعى ءمينيسترىنىڭ ورىنباسارى ازات سۇلتانوۆ وتاندىق اگروونەركاسىپ كەشەنىنىڭ الدىندا سالانىڭ ونىمدىلىگى مەن تەحنولوگيالىق دەڭگەيىن ارتتىرۋ باعىتىن جالعاستىرۋ مىندەتى تۇرعانىن، قازىرگى قولدانىستاعى وزىق تاسىلدەردى اۋىل شارۋاشىلىعىنىڭ بارلىق سالالارىنا كەڭىنەن تاراتۋ جانە قولدانۋ تاپسىرىلعانىن ايتتى.

 – وسى ماقساتتارعا قول جەتكىزۋدىڭ باستى شارتى – فەرمەرلەردىڭ ءوز قىزمەتىن ۇزاق مەرزىمدى پەرسپەكتيۆادا جوسپارلاۋى ءۇشىن جەڭىلدەتىلگەن قارجىلاندىرۋدىڭ قولجەتىمدى بولۋى. سالانى ۇزاق مەرزىمدى جەڭىلدىكتى ينۆەستيتسيالارمەن قامتاماسىز ەتۋ ءۇشىن بيۋدجەتتىك جانە كوممەرتسيالىق قاراجاتتى بىرىكتىرۋ قاعيداتى كوزدەلىپ وتىر. بۇل قارجىنىڭ قولجەتىمدىلىگىن ارتتىرادى جانە ۋاقتىلى قارجىلاندىرۋدى قامتاماسىز ەتەدى، – دەدى ۆيتسە-مينيستر.

ونىڭ ايتۋىنشا، «بايتەرەك» حولدينگى كۋپوندىق سىياقىنى سۋبسيديالاۋ تەتىگى ارقىلى بيۋدجەتتەن تىس قاراجات تارتۋدى جانە ولاردى مال شارۋاشىلىعى، اۋىل شارۋاشىلىعى ونىمدەرىن ساقتاۋ جانە قايتا وڭدەۋ باعدارلامالارىنا نەسيەگە بەرۋ جالعاستىرادى. ال اۋىل شارۋاشىلىعىن تەحنولوگيالىق جاڭعىرتۋ جانە وتاندىق تراكتورلار مەن كومبايندار ءوندىرىسىن ۇلعايتۋ جونىندەگى تاپسىرمالاردى ورىنداۋ ءۇشىن «قازاگروقارجى» ارقىلى جەڭىلدىكتى ليزينگ باعدارلاماسىن ىسكە اسىرۋ جالعاسىن تابادى.

ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ  2029 جىلعا قاراي تۇراقتى ەنەرگيا ءپروفيتسيتىن قامتاماسىز ەتۋ مىندەتى قويىلعانىن، بۇل رەتتە ەلەكتر ستانتسيالارى مەن جەلىلەرىن سالۋ جانە جاڭعىرتۋ، «تازا» كومىر جانە جاڭارتىلاتىن گەنەراتسيانى، ەڭ الدىمەن كۇن گەنەراتسياسىن دامىتۋ كوزدەلىپ وتىرعانىن ايتتى. مينيسترلىك كومىر ستانتسيالارىن پايدالانۋ كەزىندە تازارتۋ تەحنولوگيالارىنا جانە شىعارىندىلاردى باقىلاۋعا ەرەكشە نازار اۋدارىلادى. جاڭعىرتۋ جۇمىستارى كەزىندە اۋا ساپاسىنا تۇراقتى مونيتورينگ جۇرگىلەدى.

«تازا قازاقستان» رەسپۋبليكالىق ەكولوگيالىق  اكتسياسى اياسىندا قالالار مەن اۋىلداردا تازالىق پەن ءتارتىپتىڭ ساقتالۋىنا، اكىمدىكتەر مەن كوممۋنالدىق قىزمەتتەردىڭ قوقىستاردى ۋاقتىلى شىعارۋىنا ءمان بەرىلەدى. كونتەينەرلىك الاڭدارداعى ءتارتىپتى جانە ستيحيالىق قوقىستاردى جويۋدى قامتاماسىز ەتەتىن بولادى.

قۇرىلتاي دەپۋتاتتارى مەملەكەت باسشىسىنىڭ جولداۋىندا ايتىلعان مىندەتتەرگە جانە ۆيتسە-مينيسترلەردىڭ باياندامالارىندا ايتىلعان ماسەلەلەر بويىنشا جان-جاقتى سۇراقتار قويدى.

كەڭەيتىلگەن وتىرىستى تۇيىندەگەن اگرارلىق ماسەلەلەر، ەكولوگيا جانە تابيعي رەسۋرستار كوميتەتىنىڭ توراعاسى سەرىك ەگىزباەۆ جولداۋدىڭ اياسىندا الدا اۋقىمدى مىندەتتەر تۇرعانىن ايتتى. قاتىسۋشىلارعا بەلسەندىلىگى ءۇشىن العىس ءبىلدىرىپ، كوميتەت مۇشەلەرىنىڭ ۇسىنىستارى ۇكىمەتكە جولداناتىنىن جەتكىزدى.

Abai.kz