بۇگىن بوقاەۆقا قاتىستى قىلمىستىق ءىس بويىنشا وتكەن سوت وتىرىسىندا كۋاگەر رەتىندە «We Can» جشس ديرەكتورى جۇلدىز ارتىقباەۆا جاۋاپ بەردى. ول ءوز ءسوزىن قارجىلىق قۇجاتتارمەن جانە تولەم تۇبىرتەكتەرىمەن راستادى.

جاۋاپ الۋ بارىسىندا ونىڭ كومپانياسى حالىقارالىق اۆتوشەرۋدى ۇيىمداستىرۋ بويىنشا بارلىق جۇمىستى ءوز كۇشىمەن اتقارعانى بەلگىلى بولدى. ال شىن مانىندە ەشقانداي جۇمىس اتقارماعان ەكىنشى كومپانيانىڭ ونداعان ميلليون تەڭگە العانى انىقتالدى (بوقاەۆتىڭ جيەنىنىڭ اتىنا راسىمدەلگەن «BM Trust» جشس).

ارتىقباەۆا ءوز كومپانياسىنىڭ قالاي قۇرىلعانى تۋرالى دا ايتىپ بەردى. «We Can» جشس قۇرىلعانعا دەيىن ارتىقباەۆا «BM Trust» كومپانياسىندا قىزمەتكەر رەتىندە تىركەلگەن. ونى بۇل كومپانياعا جۇمىسقا ورنالاستىرعان – بوقاەۆتىڭ ءوزى. الايدا ول كومپانيانىڭ كەڭسەسىندە بىردە-ءبىر رەت بولماعان. ال 150 مىڭ تەڭگە كولەمىندەگى جالاقىسىن بوقاەۆ وعان قولما-قول تولەپ وتىرعان. كەيىن «We Can» جشس-ءىن تىركەيتىن مەكەنجايدى دا بوقاەۆتىڭ ءوزى بەرگەن. ول ارتىقباەۆاعا ارنايى اگەنتتىك قۇرۋدى تاپسىرىپ، ونىڭ ماقساتى «قازترانسگاز» كومپانياسىنىڭ تەندەرلەرىنە قاتىسۋ ەكەنىن تۇسىندىرگەن. اۆتوشەرۋ بويىنشا ورىندالعان جۇمىستار اكتىسىن دە ەڭ سوڭىندا ارتىقباەۆا بوقاەۆتىڭ جەكە وزىنە اپارىپ تابىستاعان.

ارتىقباەۆانىڭ ايتۋىنشا، قورعاستان اقتوبەگە دەيىنگى اۆتوشەرۋدى ۇيىمداستىرۋ ءۇشىن ونىڭ «We Can» جشس-مەن 38 ميلليون تەڭگەگە كەلىسىمشارت جاسالعان. ونىڭ ەسەبىنشە، بۇل قاراجات بارلىق شىعىندى وتەۋگە ابدەن جەتكىلىكتى بولعان.

پروكۋرور كۋاگەرگە «BM Trust» جشس-مەن 40 ميلليون تەڭگەدەن استام سوماعا جاسالعان ەكىنشى كەلىسىمشارتتى كورسەتكەن كەزدە ارتىقباەۆا بۇل قۇجاتتى العاش رەت كورىپ تۇرعانىن مالىمدەدى. اۆتوشەرۋدىڭ ۇيىمداستىرعان دەپ كورسەتىلگەن ماديار قالمەنوۆتىڭ كومپانياسىمەن جاسالعان قاتارلاس كەلىسىمشارتتىڭ بار ەكەنىن ول بىلمەگەن.

كۋاگەر بارلىق اقشا اۋدارىمدارى مەن تۇبىرتەكتەردى ۇسىنا وتىرىپ، قازاقستان اۋماعىنداعى اۆتوشەرۋدى باسىنان اياعىنا دەيىن «We Can» جشس ۇيىمداستىرعانىن تولىق دالەلدەپ شىقتى.

ول وڭىرلىك مەنەدجەرلەردى ءوزى جالداعان، قوناقۇيلەردىڭ، تاماقتانۋدىڭ جانە كەيتەرينگ قىزمەتتەرىنىڭ اقىسىن تولەگەن ء(تىپتى قاعاز سۇلگىلەرگە دەيىن ەسەپكە العان), اۆتوشەرۋگە قاتىسقان بارلىق كولىكتى جۋىپ، جانارماي قۇيۋ شىعىندارىن دا كوتەرگەن. جاپسىرمالاردىڭ ديزاينىن ءوزى ازىرلەپ، قاتىسۋشىلارعا ارنالعان كيىم-كەشەكتىڭ (كۇرتەشە، شالبار، فۋتبولكا، كەپكا، ءتىپتى كروسسوۆكاعا دەيىن) بارلىعىن تاپسىرىسپەن تىكتىرىپ، اقىسىن ءوزى تولەگەن.

سونداي-اق، ارتىقباەۆا قاجەتتى اپپاراتۋرانى جالعا العان، اۋدارماشىلار جالداعان، سۋ مەن تەمەكىگە دەيىن تولىق قامتاماسىز ەتىپ، رەسەيدەن الماتىعا تەحنيكانى قايتارۋ شىعىندارىن وتەگەن. بۇعان قوسا، قاتىسۋشىلاردىڭ اتى جازىلعان اعاشتار وتىرعىزۋ جونىندەگى ەكولوگيالىق اكتسيانى دا تولىق ۇيىمداستىرعان.

جوبا اياقتالعاننان كەيىن ول ءوز قاراجاتىنا استانادا «قازترانسگاز» باسشىلىعىنا ارناپ العىس رەتىندە داستارقان دا ۇيىمداستىرعان. ءىس-شارانى ءمىنسىز وتكىزگەنى ءۇشىن وعان رەسەي مەن قىتايدان كەلگەن قاتىسۋشىلاردىڭ ءوزى جەكە العىس بىلدىرگەن.

كۋاگەر بارلىق شىعىندى ءوز قاراجاتىنان وتەپ وتىرعانىنا ەرەكشە توقتالىپ، ءتىپتى اۆتوشەرۋگە قاتىسۋشىلارعا، سونىڭ ىشىندە بوقاەۆتىڭ جيەنىنە دە ۆيزا الۋ ءۇشىن كونسۋلدىق الىمدارعا دەيىن تولەگەنىن ايتتى.

ارتىقباەۆانىڭ ايتۋىنشا، ماديار قالمەنوۆ پەن جانبولات ماراتوۆ اۆتوشەرۋدىڭ ۇيىمداستىرۋشىلارى ەمەس، ونىڭ قاتىسۋشىلارى بولعان. ونىڭ ۇستىنە، «BM Trust» كومپانياسىنىڭ سمەتاسىندا كورسەتىلگەن ءىس-شارالاردىڭ جارتىسىن ارتىقباەۆانىڭ ءوزى «We Can» جشس ارقىلى وتكىزگەن، ال قالعان جارتىسى مۇلدە جۇزەگە اسىرىلماعان.

سوت وتىرىسىندا بوقاەۆتىڭ بۇعان دەيىنگى مالىمدەمەلەرىنە تىكەلەي قايشى كەلەتىن ەكى جايتقا ەرەكشە نازار اۋدارىلدى:

– بۇعان دەيىن بوقاەۆ «BM Trust» جەدەل جاردەم كولىكتەرىن جالداۋعا قوماقتى قاراجات جۇمساعانىن مالىمدەگەن بولاتىن. ارتىقباەۆا بۇل ءۋاجدى قۇجاتتارمەن جوققا شىعاردى: جەدەل جاردەم قىزمەتىن تەك ءوزى عانا جالداپ، ونىڭ اقىسىن دا ءوزى تولەگەن.

– بۇعان دەيىن بوقاەۆ قولما-قول اقشاعا اينالدىرىلعان 12,3 ميلليون تەڭگەنى اۆتوشەرۋ تۋرالى دەرەكتى فيلم ءتۇسىرۋ ءۇشىن وزگە مەردىگەر – جارمۇحامەد سۇلتانوۆتان العانىن العا تارتقان. الايدا ارتىقباەۆا ءۇزىلدى-كەسىلدى ەشقانداي دەرەكتى ءفيلمنىڭ تۇسىرىلمەگەنىن مالىمدەدى. ونىڭ ايتۋىنشا، ول تەك ءۇش قىسقا بەينەروليككە تاپسىرىس بەرىپ، اقىسىن تولەگەن.

ارتىقباەۆانىڭ سوزىنشە، «BM Trust» كومپانياسى جالعان كەلىسىمشارت بويىنشا 47 ميلليون تەڭگە العانىنا قاراماستان، ماديار قالمەنوۆ اۆتوشەرۋدى ۇيىمداستىرۋعا مۇلدە كومەكتەسپەگەن جانە ءبىر دە ءبىر تيىن شىعارماعان.

ونىڭ ۇستىنە، ارتىقباەۆا ءوز كومپانياسىنىڭ بيۋدجەتىنەن قازاقستاندىق اۆتوشەرۋدىڭ قىتاي اۋماعىنداعى شىعىندارى ءۇشىن «We Can» جشس ديرەكتورى قالمەنوۆكە ميلليون تەڭگەدەن ءسال اساتىن اقشانى قايتارۋعا ءماجبۇر بولعان. اتاپ ايتقاندا، ول اقشانى قالمەنوۆتىڭ بانك كارتاسىنا اۋدارعان. ول جوبانىڭ رەسەي اۋماعىنداعى بولىگىنە، ياعني قازاقستاندىق دەلەگاتسيانىڭ تۇرۋىنا كەتكەن شىعىنداردى دا ءدال وسىلاي وتەگەن. بۇل جولى ول اقشانى بوقاەۆتىڭ بۇرىنعى باعىنىشتى قىزمەتكەرى جانبولات ماراتوۆقا جىبەرگەن. بۇعان دەيىن ماراتوۆ بوقاەۆتىڭ نۇسقاۋىمەن «BM Trust» كومپانياسىن قالمەنوۆتىڭ اتىنا قايتا راسىمدەگەن. بۇل اقشانى دا ول بوقاەۆتىڭ تىكەلەي نۇسقاۋىمەن اۋدارىپ وتىرعان. ال كۋاگەردىڭ ءوزى «BM Trust» كومپانياسىنان ءبىر تيىن دا الماعان.

اۆتوشەرۋدى ۇيىمداستىرۋدان بولەك، ارتىقباەۆا بوقاەۆتىڭ وزگە دە قارجىلىق سحەمالارىن اشكەرەلەدى. بۇل سحەمالاردا ول اقشا اۋدارىمدارىن وتكىزۋگە ارنالعان دەلدال رەتىندە پايدالانىلعان.

بوقاەۆ ودان ءوزىنىڭ «Art romance» جيھاز كومپانياسىنا تيەسىلى تولەمدەردى جەكە بانك كارتاسىنا قابىلداۋدى سۇراعان. وسىلايشا ارتىقباەۆانىڭ كارتاسىنا 9 ميلليون تەڭگەدەن استام قاراجات تۇسكەن. ول بۇل اقشانى سول كۇنى نەمەسە كەلەسى كۇنى قولما-قول اقشاعا اينالدىرىپ، بوقاەۆقا تابىستاپ وتىرعان.

«قازترانسگاز» باسشىسىنىڭ بۇرىنعى كەڭەسشىسىنىڭ تىكەلەي نۇسقاۋىمەن ارتىقباەۆا بوقاەۆتىڭ اناسىنا تيەسىلى «Kun-Arai» كومپانياسىنا الدەبىر اقپاراتتىق ستەندتەر ءۇشىن دەگەن جەلەۋمەن اقشا اۋدارىپ وتىرعان.

بۇدان بولەك، اۆتوشەرۋ اياقتالعاننان كەيىن بوقاەۆ وعان «BM Trust» شوتىنان 1,5 ميلليون تەڭگە اۋدارىپ، بۇل قاراجاتتى قولما-قول اقشاعا اينالدىرۋدى وتىنگەن. ارتىقباەۆا ونىڭ ءوتىنىشىن ورىنداپ، اقشانى وزىنە قولما-قول بەرگەن.

كۋاگەر كەلىسىمشارتقا قول قويعان كەزدە ەشقانداي سمەتانى كورمەگەنىن راستادى. ول ميلليونداعان تەڭگەلىك جوبانى تولىعىمەن ءوز بەتىنشە جۇزەگە اسىرىپ، كۇتپەگەن شىعىنداردى دا ءوز قالتاسىنان وتەگەن. ال ەكىنشى كومپانيا ءدال وسىنداي كولەمدەگى بيۋدجەتتى ەشقانداي ناقتى جۇمىس اتقارماي-اق يگەرگەن.

ارتىقباەۆانىڭ ايعاقتارى بوقاەۆتىڭ ادۆوكاتتارىنا اۋىر بولعانى سونشالىق ولار بىردەن سۇراق قويۋعا دايىن بولماي، سۋديادان ءۇزىلىس سۇراۋعا ءماجبۇر بولدى.

ءماجبۇرلى ۇزىلىستەن كەيىن بوقاەۆتىڭ ادۆوكاتتارى ابدەن ابدىراپ قالعانى بايقالدى. ارتىقباەۆا ۇسىنعان قۇجاتتار مەن ناقتى دەرەكتەر قورعاۋ ستراتەگياسىن تولىعىمەن جوققا شىعارعانىن تۇسىنگەن ادۆوكاتتار سالماقتى ءۋاج كەلتىرە المادى. ونىڭ ورنىنا ماردىمسىز سۇراقتار قويۋمەن شەكتەلدى. ءتىپتى كۋاگەردەن شىمكەنتتەگى مەيرامحانالاردىڭ بىرىندە جۇمىس ىستەگەن ادمينيستراتوردىڭ ەسىمىن ەسىنە ءتۇسىرۋدى شىنداپ تالاپ ەتۋگە دەيىن باردى.

Abai.kz