پرەزيدەنت قاسىم-جومارت توقاەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىندا مەديتسينالىق ينفراقۇرىلىمدى دامىتۋ، العاشقى مەديتسينالىق-سانيتاريالىق كومەكتى جاڭعىرتۋ جانە مەديتسينا قىزمەتكەرلەرىن قولداۋ بويىنشا ناقتى شارالاردى بەلگىلەدى. تراۆماتولوگيالىق قىزمەت ءۇشىن بۇل شەشىمدەردىڭ ەرەكشە ماڭىزى بار، سەبەبى ولار حالىققا مامانداندىرىلعان كومەكتىڭ ۋاقتىلىعى مەن قول جەتىمدىلىگىمەن تىكەلەي بايلانىستى.

مەملەكەت باسشىسى وڭىرلەردە اۋرۋحانالار، پەريناتالدىق ورتالىقتار، جەدەل جاردەم ستانتسيالارى مەن بالالاردى وڭالتۋ ورتالىقتارىن قوسا العاندا، 70-كە جۋىق دەنساۋلىق ساقتاۋ نىسانىن سالۋ جوسپارلانىپ وتىرعانىن اتاپ ءوتتى. مەديتسينالىق ينفراقۇرىلىمدى دامىتۋ، اسىرەسە شالعاي اۋداندار مەن ەلدى مەكەندەردىڭ تۇرعىندارى ءۇشىن اسا ماڭىزدى. اۋىر جاراقات العان جاعدايدا ۋاقىت ەمدەۋ ناتيجەسىنە تىكەلەي اسەر ەتەتىن شەشۋشى فاكتورلاردىڭ ءبىرى سانالادى. سوندىقتان پاتسيەنتتىڭ ءىرى مەديتسينالىق ورتالىقتارعا جولدى ۇزاق جۇرمەي-اق، قاجەتتى بىلىكتى كومەكتى بارىنشا قىسقا مەرزىمدە الۋىنا جاعداي جاساۋ قاجەت.

وڭىرلىك تراۆماتولوگيالىق قىزمەتتى دامىتۋ جونىندەگى جۇمىس وسى مىندەتتى شەشۋگە باعىتتالعان. اكادەميك ن.ج.باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعى قازاقستان رەسپۋبليكاسى دەنساۋلىق ساقتاۋ مينيسترلىگى جانە «قازاقستان حالقىنا» قورىنىڭ قولداۋىمەن وڭىرلىك تراۆماتولوگيالىق ورتالىقتاردىڭ بىرىڭعاي جەلىسىن قۇرۋ جوباسىن جۇزەگە اسىرۋدا. جوبا جاراقات العان پاتسيەنتتەرگە تاۋلىك بويى مەديتسينالىق كومەك كورسەتۋدى، قاجەتتى تراۆماتولوگيا-ورتوپەديالىق ارالاسۋلاردى جۇرگىزۋدى جانە كەيىنگى وڭالتۋ جۇمىستارىن قامتيدى. مۇنداي جەلىنى دامىتۋ ەمدەۋدى باستاۋ ۋاقىتىن قىسقارتىپ، شالعاي وڭىرلەر تۇرعىندارى ءۇشىن مامانداندىرىلعان تراۆماتولوگيالىق كومەكتىڭ قولجەتىمدىلىگىن ارتتىرۋعا مۇمكىندىك بەرەدى.

جولداۋدا العاشقى مەديتسينالىق-سانيتاريالىق كومەكتى جاڭعىرتۋعا ماڭىزدى ورىن بەرىلگەن. پرەزيدەنت جالپى پراكتيكا دارىگەرلەرىنىڭ وكىلەتتىكتەرىن كەڭەيتىپ، وسى باعىتتى قارجىلاندىرۋدى كەزەڭ-كەزەڭىمەن ارتتىرۋدى تاپسىردى. تراۆماتولوگيا مەن ورتوپەديا ءۇشىن باستاپقى بۋىننىڭ ءتيىمدى جۇمىسى دا ۇلكەن ماڭىزعا يە. تىرەك-قيمىل اپپاراتى اۋرۋلارىن ۋاقتىلى انىقتاۋ، جاراقاتتان كەيىنگى پاتسيەنتتەردىڭ جاعدايىن تۇراقتى باقىلاۋ جانە ولاردى مەديتسينالىق كومەكتىڭ ءتيىستى دەڭگەيىنە ۋاقتىلى باعىتتاۋ مامانداندىرىلعان كونسۋلتاتسيا مەن ەمدى كەشىكتىرمەي الۋعا مۇمكىندىك بەرەدى.

سالانىڭ دامۋى زاماناۋي ماتەريالدىق-تەحنيكالىق بازانى نىعايتۋدى جانە ەمدەۋدىڭ جاڭا ادىستەرىن ەنگىزۋدى تالاپ ەتەدى. ۇلتتىق عىلىمي تراۆماتولوگيا جانە ورتوپەديا ورتالىعىندا قازىرگى ۋاقىتتا Mako جانە MISSO روبوتتاندىرىلعان جۇيەلەرى قولدانىلادى. بۇل تەحنولوگيالار ورتوپەد-دارىگەرلەرگە ءىرى بۋىنداردى ەندوپروتەزدەۋ وپەراتسيالارىن جوعارى دالدىكپەن جوسپارلاپ، ورىنداۋعا مۇمكىندىك بەرەدى. زاماناۋي تەحنولوگيالاردى ەنگىزۋ ورتوپەديالىق حيرۋرگيانىڭ مۇمكىندىكتەرىن كەڭەيتەدى، وەپارتسيالىق ارالاسۋدىڭ دالدىگىن ارتتىرادى جانە دارىگەرلەردىڭ كاسىبي دايىندىعىنا جوعارى تالاپتار قويادى.

مەملەكەت باسشىسىنىڭ 2027 جىلعى 1 قاڭتاردان باستاپ العاشقى مەديتسينالىق-سانيتاريالىق كومەكتىڭ ۋچاسكەلىك قىزمەت ماماندارىنىڭ ۇزدىكسىز ەڭبەك وتىلىنە بايلانىستى ەڭبەكاقىسىن 40 پايىزعا دەيىن ارتتىرۋ تۋرالى شەشىمى دە ەرەكشە ماڭىزعا يە. بۇل شارا 77 مىڭنان استام مەديتسينا قىزمەتكەرىن قامتيدى. مەديتسينالىق كادرلاردى قولداۋ – دەنساۋلىق ساقتاۋ جۇيەسىنىڭ تۇراقتى دامۋىنىڭ نەگىزگى شارتتارىنىڭ ءبىرى. دارىگەر ماماندىعى تەرەڭ ءبىلىمدى، كاسىبي داعدىلاردى ۇزدىكسىز جەتىلدىرۋدى جانە ادام ءومىرى مەن دەنساۋلىعى ءۇشىن جوعارى جاۋاپكەرشىلىكتى تالاپ ەتەدى. ەڭبەكاقىنىڭ لايىقتى دەڭگەيدە بولۋى تاجىريبەلى مامانداردى سالادا ساقتاپ قالۋعا جانە مەديتسينا قىزمەتىنىڭ بەدەلىن ارتتىرۋعا ىقپال ەتەدى.

دارىگەر جانە عىلىمي ورتالىقتىڭ باسشىسى رەتىندە دەنساۋلىق ساقتاۋ سالاسىنداعى بارلىق رەفورمالاردىڭ باستى ناتيجەسى مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ بولۋى ءتيىس دەپ سانايمىن. پاتسيەنت ءۇشىن بۇل – قاجەتتى تەكسەرۋدەن ۋاقىتىلى ءوتۋ، ءتيىستى ەم الۋ جانە قالىپتى ومىرگە قايتا ورالۋ مۇمكىندىگى. ءدال وسى ناتيجەلەر مەملەكەت باسشىسى العا قويعان مىندەتتەردى تابىستى ىسكە اسىرۋدىڭ باستى كورسەتكىشى بولۋعا ءتيىس.

ولجاس بەكاريسوۆ،

اكادەميك ن.ج.باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىنىڭ ديرەكتورى

Abai.kz