سوتتا «قازترانسگاز ونىمدەرى» اق-نىڭ بۇرىنعى باس ديرەكتورى الىك اشيروۆ جاۋاپ بەردى. ول قورعاۋ تاراپىنىڭ وتىنىشىمەن كۋاگەر رەتىندە شاقىرىلعانىمەن، ونىڭ جاۋاپتارى مەملەكەتتىك ايىپتاۋ تاراپىنىڭ نۇسقاسىن راستاپ وتىر.

اشيروۆ سوتتالۋشىنىڭ جيەنى ماديار قالمەنوۆتى تانىمايتىنىن ايتتى. ال اۆتوشەرۋ ۇيىمداستىرۋعا بولىنگەن ونداعان ميلليون تەڭگە قالمەنوۆكە تيەسىلى «BM Trust» كومپانياسى ارقىلى شىعارىلعانى ايتىلىپ وتىر. كۋاگەر كەرىسىنشە جۇلدىز ارتىقباەۆانى تانيتىنىن جەتكىزدى. جوباعا قاتىستى جۇمىس كەڭەستەرىنە قانداي مەردىگەر كومپانيالار قاتىسقانى جونىندەگى ادۆوكاتتىڭ تىكەلەي سۇراعىنا اشيروۆ تەك ارتىقباەۆانىڭ كومپانياسى عانا قاتىسقانىن ايتتى. ونىڭ ۇستىنە، اتالعان كومپانيا جينالعاندارعا باس ۇيىمداستىرۋشى رەتىندە تانىستىرىلعان ەكەن.

مەردىگەرلەردىڭ قىزمەتىن تىكەلەي بوقاەۆتىڭ باقىلاعانىن اۋە بيلەتتەر مەن قوناقۇي قىزمەتتەرىن ۇسىنعان «Business Travel Management» جشس-نىڭ بۇرىنعى ديرەكتورى ءازيز عازيەۆ تە كۋاگەر رەتىندە راستادى. ول سوتتا كورپوراتيۆتىك اۋە ساپارلارىنا ارنالعان كومپانيانىڭ باعدارلامالىق قامتاماسىز ەتۋدى ۇسىنعان تانىستىرىلىمنىڭ بوقاەۆتىڭ جەكە وزىنە ۇيىمداستىرىلعانىن ايتتى. سەبەبى عازيەۆكە «قازترانسگازدا» مۇنداي ماسەلەلەردىڭ بارلىعى بويىنشا شەشىمدى ءدال وسى بۇرىنعى كەڭەسشى قابىلدايتىنى ناقتى تۇسىندىرىلگەن.

بوقاەۆتىڭ بۇرىنعى ارىپتەستەرىنىڭ جاۋاپتارى ونىڭ تۋىستارىنا تيەسىلى كومپانيانىڭ «فورمالدى» ءرول اتقارعانىن جانە بيۋدجەت قاراجاتىنىڭ جۇمسالۋىن بوقاەۆتىڭ ءوزى باقىلاعانىن ايقىنداي باستاعاندا قورعاۋشىلار وزدەرىنە ۇيرەنشىكتى سارىنعا باسىپ، پروتسەستى سوزىپ، ءىستىڭ ءمان-جايىن باسقا ارناعا بۇرۋ تاكتيكاسىن قولداندى.

مەملەكەتتىك ايىپتاۋ تاراپى الماتىداعى «Ramada» قوناقۇيىن باسقاراتىن «Salem hotel management» جشس باسشىسى س. بابەلدى سوتقا شاقىردى. كۋاگەر 2018 جىلى كونفەرەنتسيا قاتىسۋشىلارىن تاماقتاندىرۋ مەن ورنالاستىرۋ شىعىندارىن تولىعىمەن «We Can» جشس تولەگەنىن راستادى. بۇل تۇبىرتەكتەر بوقاەۆتىڭ بارلىق شىعىندى جيەنى تولەگەن دەگەن نۇسقاسىنا تاعى دا قايشى كەلەتىنىن تۇسىنگەن قورعاۋشىلار سوت تالقىلاۋىنىڭ نەگىزگى تاقىرىبىنان اۋىتقيتىن سۇراقتار قويا باستادى.

تولەم سومالارى مەن قارجىلىق وپەراتسيالاردى تالقىلاۋدىڭ ورنىنا، ادۆوكاتتاردى قوناقۇيدىڭ نەشە جۇلدىزدى جانە عيماراتتىڭ قانشا قاباتتى ەكەنى، سونداي-اق اسحانا زالىنا قانشا ادام سىياتىنى، تاڭعى استىڭ تۇرۋ اقىسىنا كىرەتىنى-كىرمەيتىنى جانە ءنومىر ساناتتارىنىڭ قانداي ارىپتىك بەلگىلەرمەن كورسەتىلەتىنى كوبىرەك قىزىقتىردى.

Abai.kz