بۇرىن پرەزيدەنت ءىسىن باسقارعان بولات وتەمۇراتوۆقا قاتىسى بار «ۆەرنىي كاپيتال» كومپانيالار توبى OLX Group-تەن OLX قازاقستاننىڭ 100% ۇلەسىن ساتىپ الۋ مامىلەسىن اياقتادى دەپ حابارلادى “كاپيتال” باسىلىمى.

ساتىپ الۋ Beeline قازاقستان ارقىلى جۇزەگە استى. مامىلە بارلىق قاجەتتى مەملەكەتتىك رەتتەۋ راسىمدەرى اياقتالعاننان كەيىن كۇشىنە ەندى. كەلىسىمنىڭ قۇنى 81 ملن دوللار.

اقپاراتقا قاراعاندا، OLX قازاقستان سايتىن اي سايىن شامامەن 9 ملن ادام بەلسەندى پايدالانادى. پلاتفورما ءتۇرلى تاۋار مەن قىزمەت، جۇمىس ورىندارى، اۆتوموبيلدەر جانە جىلجىمايتىن مۇلىك تۋرالى حابارلاندىرۋ جاريالاۋ مۇمكىندىگىن ۇسىنادى.

قازاقستانداعى ەڭ داۋلەتتى كاسىپكەرلەردىڭ ءبىرى بولات وتەمۇراتوۆتىڭ بانك، تەلەكوممۋنيكاتسيا، قوناقۇي، جىلجىمايتىن مۇلىك جانە ءبىلىم بەرۋ سالالارىندا بيزنەسى بار. اكتيۆ جاعىنان ەلدەگى بەسىنشى ورىندا تۇرعان Forte Bank-كە يە. ونىڭ «كار-تەل» جشس (Beeline جانە IZI) ۇلەسى بار. Forbes ونىڭ بايلىعىن 5,4 ملرد دوللار دەپ باعالايدى.

Abai.kz