قازاقستان مەن اقش اراسىنداعى قارىم-قاتىناس سوڭعى ءبىر جىلدا ەڭ جوعارى دەڭگەيگە جەتتى.

بۇل تۋرالى قازاقستاننىڭ ۆاشينگتونداعى ەلشىسى ءىلياسوۆ The National Interest جۋرنالىنا بەرگەن سۇحباتىندا ايتتى. ونىڭ سوزىنشە، پرەزيدەنت توقاەۆتىڭ ۆاشينگتونعا ساپارى جانە C5+1 ءسامميتى بارىسىندا تاراپتار جالپى قۇنى 17 ملرد دوللاردان اساتىن كوممەرتسيالىق كەلىسىمدەر تۋرالى جاريالادى. اقش-تىڭ قازاقستان ەكونوميكاسىنا سالعان جيىنتىق ينۆەستيتسياسى 60 ملرد دوللاردان اسىپ، ەلدە 600-دەن استام امەريكاندىق كومپانيا جۇمىس ىستەپ جاتىر.

ءىلياسوۆ ەكى ەلدىڭ مۇددەلەرى بارعان سايىن ءبىر جەردەن شىعىپ جاتقانىن اتاپ ءوتتى: ۆاشينگتون سەنىمدى جەتكىزۋ تىزبەكتەرىنە، ماڭىزدى مينەرالدارعا جانە كولىك باعىتتارىنا مۇددەلى بولسا، استانا ينۆەستيتسيالارعا، تەحنولوگيالارعا جانە ەكونوميكانى ارتاراپتاندىرۋعا نيەتتى.

«بۇگىنگى تاڭدا قازاقستان مەن ورتالىق ازيا — جاي عانا ءىرى دەرجاۆالاردىڭ ورتاسىنداعى ايماق ەمەس، وزىندىك ستراتەگيكالىق باسىمدىقتارى، ەكونوميكالىق الەۋەتى جانە ءوسىپ كەلە جاتقان گەوساياسي ماڭىزى بار ايماق»، — دەپ اتاپ ءوتتى ديپلومات.

سۇحباتتا ورتالىق ءدالىز بەن TRIPP جوباسىنا ەرەكشە نازار اۋدارىلعان. قازاقستان TRIPP باعىتىن ترانسكاسپي كولىك دالىزىنە قوسىمشا رەتىندە قاراستىرادى جانە ءوز كومپانيالارىنىڭ تەمىرجول قۇرىلىسى مەن ينفراقۇرىلىمدى مودەرنيزاتسيالاۋعا قاتىسۋىنا مۇددەلى. سونىمەن قاتار ءىلياسوۆ ازيا مەن ەۋروپا اراسىنداعى تسيفرلىق بايلانىستى نىعايتۋعا ءتيىس قازاقستان مەن ازەربايجان اراسىنداعى ترانسكاسپيلىك تالشىقتى-وپتيكالىق جەلىنىڭ ىسكە قوسىلعانى تۋرالى حابارلادى.

سىرتقى ساياسات تۋرالى ايتا كەلە، ەلشى استانانىڭ اقش، رەسەي، قىتاي جانە باسقا دا سەرىكتەستەرمەن قارىم-قاتىناستى دامىتا وتىرىپ، كوپۆەكتورلى باعىتتى ساقتايتىنىن باسا ايتتى. بۇل رەتتە، ونىڭ ايتۋىنشا، قازاقستان ءوزىنىڭ ستراتەگيالىق مۇددەلەرىنە كوبىرەك ارقا سۇيەيدى جانە حالىقارالىق ىستەردەگى دەربەس ءرولىن نىعايتۋعا ۇمتىلادى.

Abai.kz