الماتىدا قالانى تانىپ-بىلۋگە، كورىكتى جەرلەردى تابۋعا، مادەني ءىس-شارالار تۋرالى اقپارات الۋعا جانە قاجەتتى مالىمەتتەردى بىلۋگە كومەكتەسەتىن Jerry اتتى جاڭا تسيفرلىق سەرۆيس ىسكە قوسىلدى.

بۇل كوشەلەردە ورناتىلعان ينتەراكتيۆتى سمارت تاقتالار. قالالىق تۋريزم باسقارماسىنىڭ مالىمەتىنشە، جوبانى قازاقستاندىق CITIX كومپانياسى Visit Almaty ۇيىمىمەن بىرلەسىپ جۇزەگە اسىردى.

قازىرگى ۋاقىتتا الماتىدا 31 سمارت تاقتا ورناتىلعان. ولار تەررەنكۋردا، رەسپۋبليكا سارايىنىڭ ماڭىندا، 28 گۆاردياشى-پانفيلوۆشىلار ساياباعىندا، پانفيلوۆ جانە تولە بي كوشەلەرىندە، ەسەنتاي مەن كىشى الماتى وزەندەرىنىڭ جاعالاۋلارىندا، مەترو بەكەتتەرىنىڭ، ورتالىق امبەباپ دۇكەنى مەن ورتالىق مەملەكەتتىك مۋزەيدىڭ جانىندا ورنالاسقان. جاقىن ارادا تاعى ءتورت قۇرىلعى ورناتۋ جوسپارلانىپ وتىر.

سمارت تاقتالار ارقىلى جاقىن ماڭداعى ءدامحانا، ءدارىحانا، مۋزەي، دۇكەندەر مەن قوعامدىق كولىك ايالدامالارىن تابۋعا بولادى. جۇيە قۇرىلعىنىڭ ورنالاسقان جەرىن ەسكەرىپ، قاجەتتى باعىتتى، وعان دەيىنگى قاشىقتىق پەن جولعا كەتەتىن ۋاقىتتى كورسەتەدى.

تۋريستەرگە ارنالعان دايىن سەرۋەن باعىتتارى، كورىكتى ورىندار توپتاماسى جانە قالاداعى كونتسەرتتەر، سپەكتاكلدەر، كورمەلەر مەن فەستيۆالدەر تۋرالى اقپارات ۇسىنىلعان. سەرۆيس قازاق، ورىس جانە اعىلشىن تىلدەرىندە قولجەتىمدى. ونى پايدالانۋ تەگىن ءارى تىركەلۋدى قاجەت ەتپەيدى.

سمارت تاقتالاردا الماتى تاريحىنا ارنالعان جەكە ءبولىم دە بار. Qalam Media-مەن بىرلەسىپ ازىرلەنگەن جوبا اياسىندا قالانىڭ ارحيۆتىك فوتوسۋرەتتەرى سول ورىنداردىڭ قازىرگى كورىنىسىمەن سالىستىرىلعان. وسى ارقىلى كەلۋشىلەر تانىس كوشەلەر مەن عيماراتتاردىڭ ونداعان جىل ىشىندە قالاي وزگەرگەنىن كورە الادى.

سونداي-اق سمارت تاقتالاردان 102, 103 جانە 112 شۇعىل قىزمەتتەرىنىڭ بايلانىس نومىرلەرى، قۇجات جوعالعان جاعدايدا نە ىستەۋ كەرەكتىگى جانە مەديتسينالىق كومەك الۋ ءتارتىبى تۋرالى اقپارات تابۋعا بولادى. ەكرانداردا اۋا رايى مەن اۋا ساپاسى تۋرالى مالىمەتتەر دە كورسەتىلەدى. QR-كود ارقىلى باعىتتار مەن وزگە دە اقپاراتتى سمارتفونعا جىبەرۋ مۇمكىندىگى قاراستىرىلعان.

الماتى قالاسى تۋريزم باسقارماسىنىڭ باسشىسى عاليا توقسەيتوۆانىڭ ايتۋىنشا، تۋريستەر سانىنىڭ ارتۋىنا بايلانىستى تسيفرلىق سەرۆيستەردى دامىتۋ وزەكتى بولا تۇسكەن.

«ءبىز ءۇشىن جوعارى كورسەتكىشتەردى ساقتاپ قانا قويماي، شاھار قوناقتارىنا بۇدان دا قولايلى جاعداي جاساۋ ماڭىزدى. تۋريستەر سانىنىڭ ارتۋىنا بايلانىستى زاماناۋي تۋريستىك ينفراقۇرىلىم مەن قولجەتىمدى تسيفرلىق سەرۆيستەردى دامىتۋ ايرىقشا مانگە يە. Jerry جوباسى تۋريستەرگە كورىكتى جەرلەرمەن ءوز بەتىنشە تانىسۋعا، سەرۋەن باعىتتارىن جوسپارلاۋعا جانە الماتىنى ارالاۋ كەزىندە قاجەتتى اقپاراتتى سول جەردە الۋعا مۇمكىندىك بەرەتىن قوسىمشا قۇرالعا اينالادى»، – دەدى عاليا توقسەيتوۆا.

2025 جىلدىڭ قورىتىندىسى بويىنشا الماتىعا 2,5 ميلليونعا جۋىق تۋريست كەلگەن. ونىڭ ىشىندە 754 مىڭى – شەتەلدىك قوناقتار. 2026 جىلدىڭ العاشقى جارتىجىلدىعىندا ۇلتتىق ستاتيستيكا بيۋروسىنىڭ مالىمەتىنشە، قالا قوناق ۇيلەرى 1,14 ميلليون ادامعا قىزمەت كورسەتكەن. ال وسى سالانىڭ كىرىسى 53,1 ميلليارد تەڭگەگە جەتكەن.

Abai.kz