مەنىڭ «PARAQTA» ونلاين كىتاپحانا پلاتفورماسى تۋرالى جازبالاردى مادەنيەت جانە اقپارات ءمينيسترى ارمان ورازبايۇلى قىرىقباەۆ كورىپ، اپكەم كەرىم ايانقىزى ەكەۋىمىزدى كەزدەسۋگە شاقىردى.

كەزدەسۋدە مينيستر مەملەكەت باسشىسى قاسىم-جومارت توقاەۆتىڭ كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى باستامالارى اياسىندا اتقارىلىپ جاتقان جۇمىستارمەن تانىستىردى.

ءبىزدى ەرەكشە قۋانتقانى – مينيسترلىكتىڭ ۇيلەستىرۋىمەن ءوتىپ جاتقان «كىتاپ وقيتىن ۇلت» جالپىۇلتتىق مارافونىنىڭ ناتيجەلەرى. بۇگىندە reading-nation.kz پلاتفورماسىنا 1,4 ميلليوننان استام قاتىسۋشى تىركەلىپ، 842 مىڭنان استام كىتاپ وقىلعان. وقىرماندار كىتاپتان العان اسەرلەرىمەن ءبولىسىپ، وزگەلەردى دە وقۋعا شاقىراتىن 50 مىڭنان استام بەينەپىكىر جاريالاعان. وسىنداي اۋقىمدى باستاما بىزگە دە شابىت بەرەدى!

ارمان ورازبايۇلى PARAQTA قوسىمشاسىنىڭ جۇمىسىمەن تانىسىپ، وقىرمانداردىڭ بەلسەندىلىگىنە قىزىعۋشىلىق ءبىلدىردى. جاستاردى كىتاپ وقۋعا كوبىرەك تارتۋ ءۇشىن قانداي قولداۋ قاجەت ەكەنىن سۇرادى.

PARAQTA – كىتاپتى باستاپ قانا قويماي، سوڭىنا دەيىن وقىپ شىعۋعا كومەكتەسەتىن قازاقستاندىق پلاتفورما. مۇندا قاعاز كىتاپ وقۋ دا ەسەپكە الىنادى. بۇگىنگە دەيىن پلاتفورماعا 15 186 وقىرمان تىركەلىپ، 1,2 ميلليون بەت وقىلعان، 10 738 كىتاپ وقىلىپ اياقتالعان. پلاتفورما اياسىندا 180 كىتاپ كلۋبى جۇمىس ىستەيدى.

جوبامىزدىڭ جۇمىس ىستەپ كەلە جاتقانىنا 1 جىل 2 اي بولدى. التى اي بۇرىن سايتىمىز ىسكە قوسىلسا، ەكى اپتا بۇرىن ءموبيلدى قوسىمشامىز App Store دۇكەنىندە قولجەتىمدى بولدى.

قازىر باستى قاجەتتىلىكتەرىمىزدىڭ ءبىرى – كىتاپ قورىن تولىقتىرۋ. پلاتفورمادا اۆتورلىق قۇقىق مەرزىمى اياقتالىپ، قوعامدىق يگىلىككە وتكەن 150-گە جۋىق كىتاپ تەگىن ۇسىنىلادى. وقىرماندارىمىز قوسىمشانىڭ وزىندە وقۋعا بولاتىن كىتاپتار كوبەيسە دەگەن تىلەكتەرىن ءجيى بىلدىرەدى.

مينيسترلىك كىتاپ قورىن زاڭدى نەگىزدە تولىقتىرۋعا قولداۋ كورسەتۋگە ۋادە بەردى. سونداي-اق وفلاين كەزدەسۋلەر مەن بىرلەسكەن ءىس-شارالار وتكىزۋگە ارنالعان الاڭ قاراستىرۋ ماسەلەسى تالقىلاندى.

ارمان ورازبايۇلىنا جانە مينيسترلىكتىڭ ارحيۆ، قۇجاتتاما جانە كىتاپ ءىسى كوميتەتىنىڭ توراعاسى ايزادا امانگەلدىقىزى قۇرمانوۆاعا جىلى قابىلداعانى، باستامامىزعا قىزىعۋشىلىق تانىتقانى جانە قولداۋ كورسەتكەنى ءۇشىن العىس ايتامىز!

كىتاپ وقۋدىڭ جاستار اراسىندا كەڭىنەن تارالىپ كەلە جاتقانى قۋانتادى. مەملەكەت باسشىسىنىڭ باستامالارى، مەملەكەتتىك قولداۋ مەن وقىرمانداردىڭ بەلسەندىلىگى وسى يگى ۇردىسكە سەرپىن بەرىپ كەلەدى. ءبىزدىڭ دە ماقساتىمىز – وعان ءوز ۇلەسىمىزدى قوسۋ.

PARAQTA-نىڭ عۇمىرى ۇزاق، وقىرمانى كوپ بولسىن! بىرگە دامىپ، بىرگە وسەيىك!

Abai.kz