قازاقستاندا ەل پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ توراعالىعىمەن وتكەن قاۋىپسىزدىك كەڭەسىنىڭ وتىرىسىندا بەكىتىلگەن اۋقىمدى اسكەري رەفورما جوسپارىن جۇزەگە اسىرۋ باستالدى.

قورعانىس مينيسترلىگىنىڭ حابارلاۋىنشا، رەفورما ارميانى باسقارۋ، اسكەردى دايارلاۋ، كادر ساياساتى مەن تەحنولوگيالىق جاراقتاندىرۋ تاسىلدەرىن تۇبەگەيلى وزگەرتۋگە باعىتتالادى. ۇيىمداستىرۋشىلىق شارالار 2026 جىلدىڭ سوڭىنا دەيىن اياقتالىپ، پراكتيكالىق ىسكە اسىرۋ 2027 جىلدان باستالادى.

وسى ورايدا، وتاندىق ارميانىڭ جاڭا كەلبەتىن ايقىندايتىن باستى باعىتتارعا ساراپتامالىق شولۋ ۇسىنامىز.

ساربازداردى دايارلاۋدىڭ جاڭا 2 ساتىلى مودەلى

مەرزىمدى اسكەري قىزمەتكە شاقىرىلاتىن ساربازداردى دايىنداۋ جۇيەسى كونتسەپتۋالدى تۇردە وزگەرەدى.

6 ايلىق وقۋ ورتالىعى: ساربازدار بىردەن اسكەري بولىمدەرگە جىبەرىلمەيدى. ولار الدىمەن 6 اي بويى وقۋ ورتالىقتارىندا ناقتى اسكەري-ەسەپتىك ماماندىق بويىنشا ارنايى كۋرستان وتەدى.

تەك كاسىبي دايىندىقتان كەيىن قىزمەت: اسكەري بولىمدەرگە تەك ءوز ءپروفيلى بويىنشا تاپسىرمالاردى ورىنداۋعا تولىق دايىن كاسىبي ساربازدار كەلەدى.

«الىمجەتتىككە» (دەدوۆششينا) توسقاۋىل: وقۋ ورتالىقتارى ارقىلى ءوتۋ ساربازدار اراسىنداعى بەيبەيىمدىلىك پەن الىمجەتتىك سياقتى جاعىمسىز قۇبىلىستاردى تۇبەگەيلى جويۋعا مۇمكىندىك بەرەدى.

جاساندى ينتەللەكت جانە سيمۋلياتسيالىق جۇيەلەر

ارميا باسقارۋدىڭ ەسكى مودەلىنەن ارىلىپ، زاماناۋي تەحنولوگيالارعا ارقا سۇيەيدى.

جاساندى ينتەللەكت (AI): اسكەري ءىس-قيمىلداردى مودەلدەۋ جانە جوسپارلاۋ پروتسەستەرىن اۆتوماتتاندىرۋ ءۇشىن AI قۇرالدارى مەن سيمۋلياتسيالىق باعدارلامالار كەڭىنەن ەنگىزىلەدى.

شىعىنداردى ازايتۋ جانە قاۋىپسىزدىك: بۇل ءتاسىل اسكەري وقۋ-جاتتىعۋلارعا كەتەتىن بيۋدجەت قاراجاتىن ۇنەمدەپ، جاتتىعۋ جوسپارلارىن ناقتى ۋاقىت رەجيمىندە وزگەرتۋگە جانە اسكەري قىزمەتشىلەردىڭ قاۋىپسىزدىگىن ارتتىرۋعا جاعداي جاسايدى.

اسكەري كونسۋلتانتتار مەن ومبۋدسمەن ينستيتۋتى

اسكەري قىزمەتشىلەردىڭ قۇقىعىن قورعاۋ مەن زاڭدىلىقتى ساقتاۋ ءۇشىن جاڭا تاۋەلسىز ينستيتۋتتار قۇرىلادى:

اسكەري كونسۋلتانتتار: بۇل ماماندار اسكەري ءبولىم كومانديرلەرىنە تىكەلەي باعىنبايدى. ولاردىڭ باستى مىندەتى – قۇقىق بۇزۋشىلىقتاردى انىقتاۋ، ساربازداردىڭ قۇقىقتارىن قورعاۋ، سونداي-اق ساپالى تاماقتانۋ، كيىم-كەشەك جانە تۋرمىستىق جاعدايدىڭ ساقتالۋىن باقىلاۋ.

اسكەري ومبۋدسمەن: اسكەري قىزمەتشىلەردىڭ ىستەرى جونىندەگى ۋاكىلەتتى تۇلعا قىزمەتىن ەنگىزۋ قاراستىرىلۋدا، بۇل ارميا ىشىندەگى زاڭداردىڭ ساقتالۋ دەڭگەيىن ارتتىرادى.

اشىقتىق جانە قوعامدىق سەنىم

رەيتينگتەر مەن قۇرعاق ەسەپتەر ءۇشىن جاسالاتىن كورسەتكىشتەردەن باس تارتىپ، ءاربىر بولىنگەن رەسۋرستىڭ ناقتى ناتيجە بەرۋى تالاپ ەتىلەدى.

قورعانىس مينيسترلىگىنىڭ اقپاراتتىق ساياساتى قايتا قارالىپ، قوعاممەن سەنىمدى كوممۋنيكاتسيا جۇيەسى قۇرىلادى.

اسكەري بولىمدەردە اشىق ەسىك كۇندەرىن وتكىزۋ جانە جەرگىلىكتى ورگاندارمەن بىرلەسىپ باستاپقى اسكەري دايىندىق (باد) جۇمىستارىن قايتا جانداندىرۋ جوسپارلانعان.

ءسوز ءتۇيىنى: قورعانىس ءمينيسترى ايدوس مىرزاحمەتوۆ اتاپ وتكەندەي، ارميانىڭ جاڭارتىلۋى تەك سىرتقى وزگەرىس ەمەس، مازمۇندىق ترانسفورماتسيا بولىپ تابىلادى. رەفورمانىڭ باستى ماقساتى – ەلىمىزدىڭ ەگەمەندىگى مەن بەيبىتشىلىگىن سەنىمدى قورعاي الاتىن زاماناۋي، ۇتقىر، جوعارى تەحنولوگيالىق جانە قوعام سەنىمىنە يە قارۋلى كۇشتەردى قالىپتاستىرۋ ەكەنى امبەگە ايان.

Abai.kz