قاراعاندىلىق ستۋدەنتتەر مەن كاسىپكەرلەر تۇزەۋ مەكەمەسىنىڭ تىنىس-تىرشىلىگىمەن تانىستى
قىلمىستىق-اتقارۋ جۇيەسى قالاي جۇمىس ىستەيدى؟ ونىڭ قىزمەتكەرلەرى قانداي مىندەتتەر اتقارادى؟ تۇزەۋ مەكەمەلەرىندە كاسىپكەرلىكتى دامىتۋعا قانداي مۇمكىندىكتەر بار؟ وسى جانە وزگە دە ساۋالداردىڭ جاۋابىن «قۇقىقتىق ءتارتىپ الىپپەسى» جوباسىنا قاتىسقان قاراعاندى جوعارى وقۋ ورىندارىنىڭ ستۋدەنتتەرى، قوعام وكىلدەرى مەن كاسىپكەرلەر ءبىلدى.
تانىمدىق كەزدەسۋ «زاڭ مەن ءتارتىپ» تۇجىرىمداماسى اياسىندا ۇيىمداستىرىلدى.
وعان قاراعاندى وبلىسىنىڭ پروكۋراتۋراسى مەن قاراعاندى جانە ۇلىتاۋ وبلىستارى بويىنشا قىلمىستىق-اتقارۋ جۇيەسى دەپارتامەنتى مۇرىندىق بولدى.
الدىمەن قاتىسۋشىلار ۆەدومستۆونىڭ نەگىزگى مىندەتتەرىمەن جانە كۇندەلىكتى قىزمەتىنىڭ ەرەكشەلىكتەرىمەن تانىستى. ولارعا ارنايى بەينەماتەريالدار كورسەتىلىپ، دەپارتامەنت عيماراتى بويىنشا ەكسكۋرسيا ۇيىمداستىرىلدى. بۇدان بولەك، جەدەل باسقارۋ جۇزەگە اسىرىلاتىن احۋالدىق ورتالىقتىڭ جۇمىسى تانىستىرىلدى.
مۇنداي كەزدەسۋلەردىڭ ماڭىزىنا قاراعاندى وبلىسى پروكۋرورىنىڭ ورىنباسارى ايدىن راەۆ توقتالدى. ونىڭ ايتۋىنشا، جوبانىڭ كوزدەگەنى – زاڭدىلىق تۋرالى تۇسىندىرۋمەن شەكتەلمەي، مەملەكەتتىك ورگانداردىڭ جۇمىسىن ءىس جۇزىندە كورسەتۋ.
– مەملەكەت باسشىسى جاستاردىڭ قۇقىقتىق ساۋاتىن ارتتىرۋ قاجەتتىگىن بىرنەشە رەت اتاپ وتكەن بولاتىن. بۇل – بارشامىزعا ورتاق مىندەت. ءبىزدىڭ باستامامىزبەن وبلىستا «قۇقىقتىق ءتارتىپ الىپپەسى» جوباسى جۇزەگە اسىرىلىپ كەلەدى. جوبانىڭ ماقساتى – مەملەكەتتىك ورگانداردىڭ قىزمەتىن كوزبەن كورىپ، جۇمىسىمەن جاقىنىراق تانىسۋعا مۇمكىندىك بەرۋ، سونداي-اق مەملەكەتتىك ينستيتۋتتارعا دەگەن سەنىمدى نىعايتۋ. قىلمىستىق-اتقارۋ جۇيەسىنىڭ قىزمەتكەرلەرى زاڭ ۇستەمدىگى قاعيداتىن قامتاماسىز ەتۋگە تىكەلەي ۇلەس قوسىپ كەلەدى، – دەدى ايدىن راەۆ.
ودان ءارى قوناقتار دولينكا كەنتىندەگى №31 مەكەمەگە باردى.
مۇندا ولارعا سوتتالعاندار ورنالاسقان تۇرعىن ايماق كورسەتىلدى.
قاتىسۋشىلار اسحانانى، جاساقتاردى، كلۋبتى، كىتاپحانانى جانە مەديتسينالىق بولىمشەنى ارالاپ، سوتتالعانداردىڭ تۇرمىس جاعدايى مەن مەكەمەنىڭ ىشكى تىرشىلىگىنە قانىقتى.
كاسىپكەرلەر ءۇشىن كەزدەسۋدىڭ ارنايى باعدارلاماسى ازىرلەنگەن.
ولار وندىرىستىك ايماقتى ارالاپ، جۇمىس ىستەپ تۇرعان تسەحتاردى كوردى، مۇندا شىعارىلاتىن ءونىم تۇرلەرىمەن تانىستى. سونىمەن قاتار كاسىپكەرلەرگە تۇزەۋ مەكەمەلەرىمەن ىسكەرلىك بايلانىس ورناتىپ، بىرلەسكەن جوبالاردى جۇزەگە اسىرۋ مۇمكىندىكتەرى تانىستىرىلدى.
كەزدەسۋ سوڭىندا قاتىسۋشىلار العان اسەرلەرىمەن ءبولىسىپ، ءوز ويلارى مەن ۇسىنىستارىن ورتاعا سالدى. سونداي-اق وسىنداي تانىمدىق ءىس-شارالاردى الداعى ۋاقىتتا دا ۇيىمداستىرۋ جونىندە پىكىر الماستى.
«قۇقىقتىق ءتارتىپ الىپپەسى» جوباسىن قاراعاندى وبلىسىنىڭ پروكۋراتۋراسى جانىنداعى جوبالىق كەڭسە جۇزەگە اسىرادى. باستاما ازاماتتاردىڭ قۇقىقتىق ساۋاتىن ارتتىرۋعا، سونداي-اق مەملەكەتتىك ورگانداردىڭ قىزمەتى مەن جۇمىس ەرەكشەلىكتەرى تۋرالى تۇسىنىگىن كەڭەيتۋگە باعىتتالعان.
Abai.kz