قازۇۋ-دەگى كەزەكتى ءولىم: پرورەكتور قىزمەتتەن كەتتى...
قازۇۋ-دە ءبىرىنشى كۋرس ستۋدەنتى قازا تاۋىپ، پرورەكتور مەن دەكان قىزمەتىنەن بوساتىلدى...
الماتىداعى ءال-فارابي اتىنداعى قازاق ۇلتتىق ۋنيۆەرسيتەتىندە تاعى ءبىر قايعىلى وقيعا تىركەلدى. 16 قاراشا كۇنى وقۋ ورنىنىڭ گەوگرافيا جانە تابيعاتتى پايدالانۋ فاكۋلتەتىنىڭ ءبىرىنشى كۋرس ستۋدەنتى قازا تاپتى.
الماتى قالالىق پوليتسيا دەپارتامەنتىنىڭ ءباسپاسوز قىزمەتى اتالعان دەرەك بويىنشا بوستاندىق اۋداندىق پوليتسيا باسقارماسى قىلمىستىق ءىس قوزعاپ، كۇدىكتىنى ۇستاعانىن مالىمدەدى. قازىرگى ۋاقىتتا وقيعانىڭ ءمان-جايىن انىقتاۋ ماقساتىندا تەرگەۋ امالدارى جۇرگىزىلۋدە. ءوز كەزەگىندە ۋنيۆەرسيتەت ۇجىمى مارقۇمنىڭ وتباسى مەن جاقىندارىنا كوڭىل ايتىپ، قۇقىق قورعاۋ ورگاندارىنا جان-جاقتى قولداۋ كورسەتىلەتىنىن جەتكىزدى.
قايعىلى جاعدايدان كەيىن جوعارى وقۋ ورنىنىڭ باسشىلىعى قاتاڭ تارتىپتىك شارالار قابىلدادى. 17 قاراشادا ۋنيۆەرسيتەتتىڭ ءباسپاسوز قىزمەتى جاتاقحاناداعى ءتارتىپ پەن قاۋىپسىزدىكتى ءتيىستى دەڭگەيدە قامتاماسىز ەتپەگەنى ءۇشىن الەۋمەتتىك-تۇراقتى دامۋ جونىندەگى پرورەكتور مەن گەوگرافيا جانە تابيعاتتى پايدالانۋ فاكۋلتەتىنىڭ دەكانى قىزمەتىنەن بوساتىلعانىن حابارلادى. سونداي-اق وقيعا بولعان كۇنى كەزەكشىلىك ەتكەن قىزمەتكەرلەر دە جۇمىستان شەتتەتىلدى.
ايتا كەتەيىك، بۇل — كەيىنگى ون كۇن ىشىندە قازۇۋ قابىرعاسىندا تىركەلگەن ەكىنشى قايعىلى جاعداي. بۇعان دەيىن، 6 قاراشا كۇنى ۋنيۆەرسيتەتتىڭ ستۋدەنتتەر قالاشىعى اۋماعىندا جۋرناليستيكا فاكۋلتەتىنىڭ ءبىرىنشى كۋرس ستۋدەنتى كوز جۇمعان ەدى. ول دەرەك بويىنشا دا قىلمىستىق ءىس قوزعالىپ، تەرگەۋ جالعاسىپ جاتىر.
Abai.kz