سارسەنبى, 18 قاراشا 2026
جاڭالىقتار 244 0 پىكىر 18 قاراشا, 2026 ساعات 13:44

GITEX AI Kazakhstan 2027: وڭىرگە قۇيىلاتىن ميللياردتاعان ينۆەستيتسيا جي-ءدى كەڭىنەن ەنگىزۋگە سەرپىن بەرەدى

سۋرەت: الماتى قالاسى اكىمدىگىنەن الىندى.

2027 جىلى 7-8 ماۋسىمدا الماتىدا GITEX AI Kazakhstan كورمەسى ەكىنشى رەت وتەدى.

تەحنولوگيا مەن جاساندى ينتەللەكت سالاسىنداعى وڭىردەگى ەڭ ءىرى ءىس-شارا حالىقارالىق ينۆەستيتسيا تارتۋعا، سونداي-اق جي ينفراقۇرىلىمىن، ەنەرگەتيكا مەن ونەركاسىپتى دامىتۋعا ىقپال ەتەدى.

الماتى، قازاقستان. ورتالىق ازيا مەن كاۆكاز تەحنولوگيالىق دامۋدىڭ جاڭا كەزەڭىنە قادام باسىپ كەلەدى. جاساندى ينتەللەكت سالاسىنداعى ميللياردتاعان دوللارلىق جوبالار ناقتى جۇزەگە اسا باستادى. ءوڭىر ەۋرازيانىڭ تسيفرلىق ورتالىعىنا اينالۋدى كوزدەپ وتىر.

ءوڭىر ەلدەرى تسيفرلىق سالاداعى ىنتىماقتاستىقتى بارعان سايىن نىعايتىپ كەلەدى. Statista بولجامىنا سايكەس، 2029 جىلعا قاراي وڭىرلىك IT-قىزمەتتەر نارىعىنىڭ كولەمى 5,6 ملرد دوللارعا جەتەدى. قازاقستان 2025 جىلدىڭ قورىتىندىسى بويىنشا IT-قىزمەتتەر ەكسپورتىنان العاش رەت 1 ملرد دوللاردان استام تابىس تاپتى. اتاپ ايتقاندا، بۇل كورسەتكىش 2020 جىلى 33,5 ملن دوللاردان 2025 جىلى 1,142 ملرد دوللارعا دەيىن ءوسىپ، بەس جىل ىشىندە 34 ەسەگە ارتتى. وسىنداي جاعدايدا GITEX AI Kazakhstan كورمەسىنىڭ ەكىنشى رەت وتكىزىلۋى تسيفرلىق سالاداعى ماقسات-مىندەتتەردى جاساندى ينتەللەكتىنى كەڭىنەن ەنگىزۋ ارقىلى ناقتى ىسكە اسىرۋعا مۇمكىندىك بەرەدى. كورمە ينفراقۇرىلىم، ەنەرگەتيكا جانە ونەركاسىپ سالالارىن جاڭعىرتۋعا ىقپال ەتىپ، قازاقستاننىڭ جي ازىرلەۋ، ينۆەستيتسيا تارتۋ جانە يننوۆاتسيالاردى دامىتۋ باعىتىنداعى ەۋرازيانىڭ ماڭىزدى ورتالىعى رەتىندەگى ورنىن نىعايتادى.

GITEX AI Kazakhstan 2027 حالىقارالىق كورمەسى قازاقستان پرەزيدەنتى قاسىم-جومارت توقاەۆتىڭ قولداۋىمەن 7-8 ماۋسىمدا الماتىداعى «اتاكەنت» قىىو-دا وتەدى.

ورتالىق ازياداعى تەحنولوگيا، جاساندى ينتەللەكت جانە ستارتاپ سالاسىنداعى ەڭ ءىرى ءىس-شارا قازاقستان رەسپۋبليكاسىنىڭ جاساندى ينتەللەكت جانە تسيفرلىق دامۋ مينيسترلىگىنىڭ قولداۋىمەن، Astana Hub جانە الماتى قالاسى اكىمدىگىمەن سەرىكتەستىكتە ۇيىمداستىرىلادى.

2026 جىلى GITEX AI Kazakhstan ورتالىق ازيا مەن كاۆكازداعى تەحنولوگيا، جاساندى ينتەللەكت جانە تسيفرلىق ينۆەستيتسيا سالاسىنداعى ماڭىزدى ءىس-شارا رەتىندە تانىلدى. كورمەنى الەمدەگى تەحنولوگيا مەن جي ەكوجۇيەلەرىنىڭ ەڭ ءىرى جەلىسى سانالاتىن GITEX-ءتىڭ جاھاندىق ۇيىمداستىرۋشىسى inD كومپانياسى ۇيىمداستىردى. ەكى كۇن ىشىندە كورمەگە ەكسپونەنت رەتىندە 334 كومپانيا مەن ستارتاپ قاتىسىپ، ونى 86 ەلدەن كەلگەن 12 000 ادام تاماشالادى. كورمەنى پرەزيدەنت قاسىم-جومارت توقاەۆ اشتى. سونداي-اق ءىس-شارا اياسىندا مەملەكەت باسشىسىنىڭ توراعالىعىمەن جاساندى ينتەللەكتىنى دامىتۋ جونىندەگى كەڭەستىڭ ەكىنشى وتىرىسى ءوتتى.

كەڭەيتىلگەن باعدارلاما مەن جاڭا ەكسپوزيتسيالار دامۋدىڭ كەلەسى كەزەڭىنە جول اشادى

GITEX AI Kazakhstan 2027 كورمەسى وتكەن جىلعى جەتىستىكتەردى جالعاستىرادى. بيىل ساتىپ الۋ جانە ىسكەرلىك كەزدەسۋلەر باعدارلاماسى كەڭەيتىلىپ، بەس جاڭا تاقىرىپتىق ەكسپوزيتسيا ۇسىنىلادى. ولار: GITEX SuperComputeX, GITEX New EnergyX, GITEX RobotiX, GITEX Cyber Valley جانە GITEX Intelligent Cities x Connectivity.

بۇل باعىتتار قازاقستاندا جۇزەگە اسىرىلىپ جاتقان جوبالارمەن تىكەلەي بايلانىستى. ولاردىڭ قاتارىندا ەكىباستۇزداعى سۋپەركومپيۋتەرلىك قۋاتتاردى دامىتۋ جانە دەرەكتەر ورتالىقتارىنىڭ جۇمىسىنا قاجەتتى ەنەرگەتيكالىق ينفراقۇرىلىمدى قالىپتاستىرۋ بار.

جاڭا ەكسپوزيتسيالار ەكونوميكالىق ءوسىمدى جەدەلدەتەتىن تەحنولوگيالاردى دامىتۋ ءۇشىن مەملەكەتتىك ورگانداردىڭ، حالىقارالىق تەحنولوگيالىق كومپانيالاردىڭ، ينۆەستورلار مەن ستارتاپ نەگىزىن قالاۋشىلاردىڭ باسىن قوسادى. بۇل الەمدەگى تسيفرلىق ەكونوميكاسى قارقىندى دامىپ كەلە جاتقان وڭىرلەردىڭ بىرىندە حالىقارالىق ينۆەستيتسيا تارتۋعا، ەلدەر اراسىنداعى ارىپتەستىكتى نىعايتۋعا جانە جاساندى ينتەللەكتىنى كەڭىنەن ەنگىزۋگە جاڭا مۇمكىندىكتەر اشادى.

2027 جىلعى كورمەنىڭ باعدارلاماسى مەن نەگىزگى ماقساتتارى الماتىدا وتكەن نەتۆوركينگ كەزدەسۋىندە تانىستىرىلدى. GITEX AI Kazakhstan ۇيىمداستىرۋشىلارى مەن قابىلداۋشى تاراپ وڭىرلىك سەرىكتەستەردى جانە تەحنولوگيالىق كومپانيالاردىڭ باسشىلارىن شاقىرىپ، كەڭەيتىلگەن كۇن تارتىبىمەن تانىستىردى. كەزدەسۋدە ىنتىماقتاستىق، ينۆەستيتسيا تارتۋ جانە جاڭا نارىقتارعا شىعۋ مۇمكىندىكتەرى تالقىلاندى.

قازاقستان رەسپۋبليكاسى پرەمەر-ءمينيسترىنىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ ەلدىڭ Digital Qazaqstan ۇلتتىق ستراتەگياسى اياسىنداعى جاساندى ينتەللەكتىنى دامىتۋ جونىندەگى جوسپارعا توقتالدى.

«قازاقستانداعى جي ترانسفورماتسياسىنىڭ كەلەسى كەزەڭى جاساندى ينتەللەكتىنى جاي عانا ەنگىزۋمەن شەكتەلمەيدى. ەڭ باستىسى، ونى كەڭىنەن قولدانۋعا قاجەتتى بۇكىل نەگىزدى قالىپتاستىرۋ. بۇعان ەسەپتەۋ قۋاتتارى، ەنەرگەتيكا، تسيفرلىق بايلانىس، بىلىكتى كادرلار، رەتتەۋ تەتىكتەرى مەن كاپيتال كىرەدى. قازاقستان قازىردىڭ وزىندە وسى باعىتتاعى جۇمىستى قولعا الدى. Digital Qazaqstan ستراتەگياسى بۇل وزگەرىستەردىڭ ۇلتتىق دەڭگەيدەگى نەگىزگى باعىتتارىن ايقىندايدى. ال GITEX AI Kazakhstan سياقتى الاڭدار ەلىمىزدىڭ ەكوجۇيەسىن الەمدىك تەحنولوگيا كوشباسشىلارىمەن، ينۆەستورلارمەن جانە سەرىكتەستەرمەن بايلانىستىرادى. ءبىزدىڭ ماقساتىمىز – قازاقستاندى جاساندى ينتەللەكتىنى ازىرلەۋ، ەنگىزۋ جانە كەڭىنەن قولدانۋ بويىنشا ەۋرازياداعى نەگىزگى ورتالىقتاردىڭ بىرىنە اينالدىرۋ»، – دەدى جاسلان ماديەۆ.

جاساندى ينتەللەكت ترانسفورماتسياسىنىڭ وڭىرلىك باعدارى

GITEX AI Kazakhstan 2027 كورمەسىنىڭ كەڭەيتىلگەن باعدارلاماسى مەن حالىقارالىق قاتىسۋشىلار سانىنىڭ ارتۋى جاقىندا جاريالانعان «تسيفرلىق جىبەك جولى» جوباسىنىڭ دامۋىمەن تۇسپا-تۇس كەلەدى. قازاقستان دەرەكتەر ورتالىقتارىن، عارىشتىق ەسەپتەۋ جۇيەلەرىن، سپۋتنيكتەردى جانە ترانسكاسپي تالشىقتى-وپتيكالىق بايلانىس جەلىسىن بىرىكتىرەتىن بىرىڭعاي جي ينفراقۇرىلىمىن قۇرۋدى جوسپارلاپ وتىر. بۇل كاسپي تەڭىزىنىڭ تۇبىمەن ءازىربايجان مەن قازاقستاندى بايلانىستىراتىن ۇزىندىعى 380 شاقىرىمدىق سۋاستى تەلەكوممۋنيكاتسيالىق كابەلى.

كورمەنىڭ ەكىنشى رەت وتكىزىلۋى ورتالىق ازيا مەن كاۆكازدا جاساندى ينتەللەكتىنى دامىتۋعا جاڭا سەرپىن بەرەدى.

Google تاپسىرىسى بويىنشا جۇرگىزىلگەن زەرتتەۋگە سايكەس، الداعى ون جىل ىشىندە گەنەراتيۆتى جاساندى ينتەللەكت ارمەنيا، ءازىربايجان، گرۋزيا جانە قازاقستان ەكونوميكاسىنا جىل سايىن قوسىمشا 12-15 ملرد دوللار اكەلۋى مۇمكىن. بۇل اتالعان ەلدەردىڭ جيىنتىق جالپى ىشكى ءونىمىنىڭ شامامەن 4%-ىنا تەڭ. KPMG دەرەكتەرىنە سايكەس، وڭىردەگى كومپانيالاردىڭ 53%-ى جاساندى ينتەللەكتىنى كەڭ اۋقىمدا ەنگىزىپ ۇلگەرگەن. بۇل الەمدىك ورتاشا كورسەتكىشتەن (24%) ەكى ەسەدەن استام جوعارى. سونىمەن قاتار قازاقستان كومپانيالارى بيزنەس شەشىمدەرىن قابىلداۋ كەزىندە جاساندى ينتەللەكت ۇسىنىمدارىنا وڭىردەگى باسقا ەلدەرگە قاراعاندا كوبىرەك سەنىم ارتادى. بۇل كورسەتكىش 86%.

قازاقستان ءوڭىردىڭ تسيفرلىق ترانسفورماتسياسىندا جەتەكشى ءرول اتقارىپ كەلەدى. Digital Qazaqstan ۇلتتىق ستراتەگياسى جاساندى ينتەللەكتىنى ءىس جۇزىندە ەنگىزۋگە باعىتتالعان. ونىڭ اياسىندا ۇلتتىق جي پلاتفورماسىن دامىتۋ، جي تەحنولوگيالارىن eGov مەملەكەتتىك قىزمەتتەرىنە ينتەگراتسيالاۋ جانە بىلىكتى ماماندار دايارلاۋعا اۋقىمدى ينۆەستيتسيالار سالۋ كوزدەلگەن. جاساندى ينتەللەكت تۋرالى زاڭ مەن تسيفرلىق كودەكس كومپانيالار مەن ينۆەستورلار ءۇشىن قۇقىقتىق رەتتەۋدىڭ ايقىندىعىن قامتاماسىز ەتەدى.

NVIDIA جانە Firebird كومپانيالارىمەن جاسالعان 10 ملرد دوللارلىق كەلىسىم ەكىباستۇزداعى دەرەكتەر ورتالىقتارى القابىندا شامامەن 100 000 گرافيكالىق پروتسەسسورعا (GPU) نەگىزدەلگەن تاۋەلسىز ۇلتتىق سۋپەركومپيۋتەرلىك قۋاتتاردى قۇرۋعا مۇمكىندىك بەرەدى. جەرگىلىكتى تەحنولوگيالىق ەكوجۇيە دە قارقىندى دامىپ كەلەدى. بۇگىندە Astana Hub-تا 2000-نان استام كومپانيا جۇمىس ىستەيدى. ال ونىڭ رەزيدەنتتەرىنىڭ IT-قىزمەتتەر ەكسپورتى 2025 جىلى 633,8 ملن دوللار بولدى.

جاساندى ينتەللەكت سالاسىنداعى ماقساتتاردى ناقتى ەكونوميكالىق ناتيجەگە قالاي اينالدىرۋعا بولادى؟

GITEX AI Kazakhstan قازاقستاننىڭ جانە تۇتاستاي ءوڭىردىڭ جاساندى ينتەللەكت پەن تسيفرلىق ينفراقۇرىلىمدى دامىتۋ سالاسىنداعى ماقساتتارىنا ساي كەلەدى. كورمە جەرگىلىكتى ەكوجۇيەلەر مەن جاھاندىق تەحنولوگيالىق قاۋىمداستىقتاردى بىرىكتىرىپ، جاساندى ينتەللەكت، ۇلكەن دەرەكتەر، بۇلتتىق تەحنولوگيا، SaaS, دەرەكتەر ورتالىقتارى، ەنەرگەتيكالىق تەحنولوگيا، كيبەرقاۋىپسىزدىك، بايلانىس جانە جەلىلىك ينفراقۇرىلىم باعىتتارىن قامتيدى.

«ورتالىق ازيا مەن كاۆكاز ەلدەرى جاساندى ينتەللەكتىنى ەندى الىس بولاشاقتىڭ مۇمكىندىگى رەتىندە قاراستىرمايدى. ولار ناقتى جوسپارلاردى جۇزەگە اسىرىپ، مەملەكەتتىك-جەكەمەنشىك ارىپتەستىكتى دامىتىپ، جي-ءدى كەڭ اۋقىمدا ەنگىزۋگە قاجەتتى ەسەپتەۋ، ەنەرگەتيكالىق، كادرلىق جانە نورماتيۆتىك نەگىزدى قالىپتاستىرىپ جاتىر. GITEX AI Kazakhstan وسى ۇدەرىستىڭ بارلىق بۋىنىن بىرىكتىرەدى. بۇل وڭىرلىك باسىمدىقتاردى ينۆەستيتسيا تارتۋعا قولايلى جوبالارعا، كوممەرتسيالىق كەلىسىمدەرگە جانە ءوڭىردىڭ قالالارىندا، ونەركاسىبى مەن ەكونوميكاسىندا ناقتى قولدانىلاتىن تەحنولوگيالارعا اينالدىرۋعا مۇمكىندىك بەرەدى»، - دەدى GITEX باس ديرەكتورى تريكسي لو ميرماند.

Abai.kz

0 پىكىر