سارسەنبى, 18 قاراشا 2026
جاڭالىقتار 58 0 پىكىر 18 قاراشا, 2026 ساعات 15:08

پەداگوگتەردى قورعايتىن كولل-ورتالىق ىسكە قوسىلماق

سۋرەت: callcenters.by سايتىنان الىندى.

تاياۋداعى قۇرىلتاي الاڭىندا وتكەن بريفينگتە وقۋ-اعارتۋ ءمينيسترى جۇلدىز سۇلەيمەنوۆا وتاندىق پەداگوگتەردىڭ قۇقىعىن قورعاۋ باعىتىنداعى تىڭ باستامانى جاريا ەتتى.

مەملەكەت باسشىسىنىڭ مۇعالىمدەردى قورعاۋ تەتىكتەرىن جەتىلدىرۋ جونىندەگى تىكەلەي تاپسىرماسى اياسىندا ەلىمىزدە ۇستازدارعا ارنالعان بىرىڭعاي قولداۋ تەلەفونى ىسكە قوسىلماق.

باستامانىڭ ءمانى نەدە؟

ءمينيستردىڭ سوزىنشە، جاڭا جۇيە ەلورداداعى ءساتتى جۇزەگە اسقان iKomek قىزمەتىنىڭ ۇلگىسىمەن جاساقتالادى. بۇل ورتالىق 2026 جىلدىڭ سوڭى مەن 2027 جىلدىڭ باسىندا تولىققاندى جۇمىسىن باستايدى دەپ جوسپارلانىپ وتىر.

جاڭا كولل-ورتالىقتىڭ ۇستازدار قاۋىمىنا بەرەر باستى مۇمكىندىكتەرى:

كاسىبي كەڭەس بەرۋ: وقۋ-ادىستەمەلىك جانە ەڭبەك قاتىناستارىنا قاتىستى تۋىنداعان تۇيتكىلدەردى جەدەل شەشۋ;

قۇقىقتىق قورعاۋ: مۇعالىمنىڭ ار-نامىسىنا تيۋ، زاڭسىز تەكسەرىستەر مەن مىندەتىنە جاتپايتىن جۇمىستارعا جەگۋ دەرەكتەرى بويىنشا بىلىكتى زاڭگەرلەردەن تەگىن كەڭەس الۋ;

جەدەل ارەكەت ەتۋ: وڭىرلەردەگى مەكتەپ باسشىلىعى نەمەسە جەرگىلىكتى اتقارۋشى ورگاندار تاراپىنان قىسىم جاسالعان جاعدايدا، ماسەلەنى رەسپۋبليكالىق دەڭگەيدە باقىلاۋعا الۋ.

ساراپتامالىق كوزقاراس: نەگە بۇل ماڭىزدى؟

«پەداگوگ مارتەبەسى تۋرالى» زاڭ قابىلدانعانىنا بىرنەشە جىل وتسە دە، ايماقتاردا ۇستازداردىڭ قۇقىعى تاپتالىپ، ءتۇرلى اكىمشىلىك قىسىمعا ۇشىراۋ فاكتىلەرى ءالى دە كەزدەسىپ قالادى. كوپ جاعدايدا مۇعالىمدەر ءوز قۇقىعىن قالاي قورعاۋ كەرەكتىگىن بىلمەيدى نەمەسە مەكتەپ اكىمشىلىگىمەن اشىق تەكەتىرەسكە بارۋدان جاسقانادى.

بىرىڭعاي بايلانىس ورتالىعىنىڭ قۇرىلۋى – بيۋروكراتيالىق كەدەرگىلەردى اينالىپ ءوتىپ، قاراپايىم اۋىل مۇعالىمىنىڭ ءۇنىن تىكەلەي مينيسترلىككە جەتكىزەتىن «التىن كوپىر» بولماق. بۇل مەحانيزم ناقتى جۇمىس ىستەسە، جەرگىلىكتى جەرلەردەگى زاڭبۇزۋشىلىقتاردىڭ الدىن الۋعا زور سەرپىن بەرەدى.

سونىمەن قاتار، مينيستر بۇعان دەيىن سىنىپ جەتەكشىلىگى ءۇشىن تولەنەتىن ۇستەماقىنى ارتتىرۋ ماسەلەسى قاراستىرىلىپ جاتقانىن ايتقان بولاتىن. دەگەنمەن، بۇل باستامانىڭ جۇزەگە اسۋى تىكەلەي رەسپۋبليكالىق بيۋدجەتتىڭ مۇمكىندىگىنە بايلانىستى بولماق. ۇستازدىڭ مارتەبەسىن تەك قۇقىقتىق تۇرعىدا عانا ەمەس، ماتەريالدىق جاعىنان دا نىعايتۋ – ءبىلىم ساپاسىن ارتتىرۋدىڭ باستى كەپىلى ەكەنى ءسوزسىز.

Abai.kz

0 پىكىر