ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ديرەكتورى بولىپ، قر مادەنيەت ءمينيسترىنىڭ بۇيرىعىمەن سۇلتان وڭعارۇلى سرايلوۆ تاعايىندالدى.

ۇجىمدى جاڭا باسشىمىزبەن تانىستىرىپ، جاڭا ديرەكتوردى باسشىلىق ورنىنا وتىرعىزىپ كەتۋ ماقساتىندا، قر مادەنيەت ءمينيسترىنىڭ ورىنباسارى اسقار بورىباەۆ مىرزا قازاقستاننىڭ جانە كسرو-نىڭ حالىق ءارتيسى ءاسانالى ءاشىموۆ، قازاقستاننىڭ حالىق ءارتيسى ەسمۇحان وباەۆ باستاعان توپ، ۇجىمعا جاڭا باسشىنى تانىستىردى.

بۇعان دەيىن - استانا قالاسى اكىمدىگىنىڭ ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ديرەكتورى-كوركەمدىك جەتەكشىسى قىزمەتىن اتقارعان سۇلتان وڭعارۇلى سرايلوۆ ەندىگى كەزەكتە  ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ديرەكتورى بولىپ جاڭا قىزمەتكە تاعايىندالدى.

قىسقاشا ءومىربايانى:

سرايلوۆ سۇلتان وڭعارۇلى – 1970 جىلى 22-ناۋرىزدا وقو سوزاق اۋدانى، تاستى سوۆحوزىندا دۇنيەگە كەلگەن.

1988 – 1990 جىلدارى ماسكەۋ قالاسىندا اسكەري بورىشىن وتەدى.

1992 جىلى الماتى قالاسىنداعى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «تەاتر جانە كينو اكتەرى» ماماندىعى بويىنشا بىتىرگەن.

1996-1997 جىلدارى ارقالىق قالاسىنداعى ا.بايتۇرسىنوۆ اتىنداعى تەاترعا رەجيسسەر بولىپ قابىلداندى.

1997 جىلى ق.قۋانىشباەۆ اتىنداعى قازاق دراما تەاترىنا اۋىسىپ، 2009  جىلعا دەيىن وسى تەاتردا – اكتەر، رەجيسسەر، ادەبيەت ءبولىمىنىڭ مەڭگەرۋشىسى قىزمەتىن اتقارعان.

2009-2012 ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا ديرەكتوردىڭ ورىنباسارى قىزمەتىن اتقاردى.

2012 جىلدىڭ قاڭتار ايىنان باستاپ وقو «وڭتۇستىك تسيرك» مكقك باس ديرەكتورى بولىپ اۋىستى.

2013 جىلدىڭ قاراشا ايىنان ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ديرەكتورى-كوركەمدىك جەتەكشىسى بولىپ تاعايىندالدى. 

"جاس كەلسە، ىسكە", - دەمەكشى، 68 جىلعى تاريحى بار تەاتردىڭ ەندىگى ديرەكتورى سۇلتان سرايلوۆ مىرزانىڭ الداعى جۇمىسىنا تابىس، ەڭبەگىنە بەرەكە، ۇجىمعا بىرلىك تىلەيمىز.

تەاتردىڭ ءباسپاسوز ءبولىمى