جۋىردا الاشقا بەلگىلى ۇلتشىل ەكى دەپۋتاتتىڭ وزبىرلىعى تۋرالى حاباردار بولىپ جاعامدى ۇستادىم. بۇلاردى اتاپ، حالىققا جەك كورىنىشتى ەتۋ ماقسات ەمەس، حالقىمىز ءتىپتى ءتۇڭىلىپ كەتەر دەگەن ويمەن كىم ەكەنىن ايتپاستان بولعان جايدى جايىپ سالۋدى ءجون كوردىم.

اڭگىمە بىلاي.يمانعا بەرىلگەن ءبىر جىگىت ءوز اۋىلىنان جەكە مەشىت سالادى. ونى تىركەتەدى. بۇل 2000 جىلعى جايت بولسا كەرەك. سول كەزدە قىتايدىڭ مۇناي كومپانيالارىنىڭ تاسى ورگە دومالاي باستاپ، وعان وڭىردەگى اكىمدىك تە، ازاماتتار دا قول جايا باستاعان كەز. سودان الگى جىگىت ايگىلى ۇلتشىل دەپۋتاتقا بارىپ، مەشىتكە قارجىلاي كومەك ەتۋدى وتىنەدى. بىرنەشە ايدان سوڭ، دەپۋتاتتىڭ كومەكشىسى مەشىت يەسىنە قوڭىراۋلاتىپ، «كەلىپ كەتىڭىز،شارۋاڭىز شەشىلگەلى تۇر» دەيدى. الىپ-ۇشىپ جەتىپ كەلىپ، دەپۋتات اعاعا قوڭىراۋ شالىپ، رۇقساتتاما سۇرايدى. سودان بۇل رۇقساتتاما بيۋروسىندا 4 ساعاتتاي كۇتەدى. اعاسى دا، كومەكشىسى دە تەلەفون المايدى. جۇمىس ۋاقىتى بىتە باستاعاندا سوڭعى قوڭىراۋدى العان جابىرقاۋلى كومەكشى «اعاسى، مەن ەندى بۇل ىسكە ارالاسا المايمىن، تىكەلەي دەپۋتات اعامەن شەشەرسىز» دەپ تۇتقانى قويا سالادى.

«باقساق باقا ەكەن» دەمەكشى، جاعداي بىلاي بولىپتى. مەشىت يەسىنىڭ كەلىپ قالعانىن بىلگەن «ابزال» اعامىز كومەكشىسىن جەردەن الىپ جەرگە سالادى، «ول نەگە بۇل تۋرالى ءبىلىپ قالادى، نەگە حابارلايسىڭ؟» دەگەندەي اڭگىمە بولادى. قىسقاسى، دەپۋتات مەشىت يەسىنىڭ حاتىن جەلەۋ ەتىپ وبلاكىمدىك ارقىلى قىتايلاردىڭ بولەتىن الەۋمەتتىك قورىنان 4 ملن تەڭگە اقشا ءبولدىرۋدى شەشسە كەرەك. بىراق ويى باسقا بولاتىن... ونىڭ بۇل ويىنا «اقىماق» كومەكشى كەدەرگى بولا جازداپتى.

اقىرى مەشىت قارجىنى الا المايدى. يەسى ىندەتىپ باقسا، دەپۋتات قىتايلارعا ءوز بالاسى اشقان بانك رەكۆيزيتىن بەرىپ قارجىنى سوعان اۋدارتىپتى. وتتاسىپ-سوتتاسۋعا جوق يماندى قازاق جىرتىق استاۋىمەن قالا بەرىپتى...

تاعى ءبىر دۇركىن اڭگىمە باسقا ءبىر دەپۋتات كومەكشىسىنە قاتىستى. بۇل دا ايگىلى ۇلتشىل دەپۋتات. كومەكشىسى دە وسال ەمەس ۇلتشىل ەكەن. بىراق الگى دەپۋتاتىمىز سايلاۋشىلارىنىڭ حاتىنا جاۋاپ بەرۋگە سالعىرت قارايدى. سايلاۋشىلار بولسا، ءۇستى-ۇستىنە جازىپ، تەلەفون سوعىپ كومەكشىنىڭ مازاسىن الاتىن ادەتى. كومەكشىسى شىداي الماي، قول قويىلماي جاتقان بىرنەشە ايلىق جاۋاپ حاتتى دەپۋتاتتىڭ فاميلەسىمەن ءتيىستى ورگاندارعا توعىتۋدى باستايدى. ءبىرشاماسىنىڭ ماسەلەسى شەشىلىپ، دەپۋتات تاراپىنا العىس پەن ماداق جاۋادى. الگى دەپۋتات تا اڭ-تاڭ. ءوزىنىڭ مۇنداي حاتپەن ءىسى جوعىن دا بىلەدى. ماسەلەنىڭ توركىنى كومەكشىدەن ەكەنىن بىلگەن ول قولبالاسىن تىقسىرا باستايدى،بىراق نە ءۇشىن ەكەنىن دە ايتپايدى. ءسويتىپ، الگى كومەكەشى پارلامەنتتەگى مەمقىزمەتتەن كەتۋگە ءماجبۇر بولعان...

بۇنى ورتاعا سالعانداعى ماقسات: ءبىزدىڭ ۇلتشىل دەگەن كەيبىر، ءبارى ەمەس، اعا-اپالارىمىزدىڭ وسالدىعى،الاياقتىعى، ءوز ىسىنە سالعىرتىعىنان اينالاسى عانا ەمەس، ۇلت تا جاپا شەگىپ ءجۇر-اۋ دەگەن ويدى ءبىلدىرۋ. كىم ەكەندەرىن بىلمەي-اق قويىڭىز، وقىرمان.

سىرعا جورگەكقىزى

 Abai.kz