قىزىر مەن مۇسا پايعامبار
قاسيەتتى رامازان ايىنىڭ قۇرمەتىنە!
قىزىر مەن مۇسا پايعامبار
(قۇران كارىم. كاھف سۇرەسى).
1
ورىنداپ اللا ءامىرىن يشارا ەتكەن،
ءبىر جارتاستىڭ تۇبىنە مۇسا جەتكەن.
كەزدەستىردى قىزىرداي پايعامباردى،
ادامدارعا جاقسىلىق ءدانىن سەپكەن.
2
مۇسا ايتتى: سىزبەن بىرگە جۇرسەم دەيمىن،
اللا جولىن ۇيرەنىپ كورسەم دەيمىن،
تالاي ءىلىم بىلەسىز ءتاڭىر حاقتان،
سونىڭ ءۇشىن سوڭىڭا ەرسەم دەيمىن.
3
- ەي مۇسا، ءبىر جۇرۋگە توزە الماسسىڭ،
جاعداي كوپ، ماعىناسىن سەزە الماسسىڭ
نەشە ءتۇرلى جايلار بار ادام بىلمەس،
كورگەنىڭدە ۇعا الماي، شىداماسسىڭ.
4
- شىدامىم جەتەر دەيمىن قولداسا اللام،
نە ىستەسەڭ دە ءوزىڭ ءبىل، قاراپ تۇرام.
سۇراماي، قارسى كەلمەي بۇيرىعىڭا،
ۇيرەنىپ، ءىلىم-تاعلىم، عيبرات الام.
5
- ولاي بولسا، جۇرە عوي بولساڭ دايىن،
مەسەلىڭدى قايتارىپ نە قىلايىن.
نە كورسەڭ دە سۇراما، شىدامدى بول،
ءوزىم ايتىپ بەرگەنشە، ءىستىڭ جايىن.
6
سونىمەن جولعا شىقتى پايعامبارلار،
ءبىر كەمەگە ءمىنىپتى، كورىپ ولار.
قىزىر بابا كەمەگە تەسىك جاساپ،
جارامسىز عىپ تاستادى، سۋعا تولار.
7
مۇنىڭ نە دەپ، سۇرادى ءنابي مۇسا،
كەمەشىلەر باتپاي ما، سۋعا شىقسا.
قالايشا ءجونسىز ءىستى جاسادىڭىز،
پايعامبار اتىڭىزعا كەلدى-اۋ نۇقسا.
8
- قايدا قالدى، شىدايمىن دەگەن ءسوزىڭ،
وسىنشا تەز ۋادەڭدى بۇزدىڭ ءوزىڭ.
مۇسا ايتتى، كەشىرىڭىز، ەندى الدا،
ۇندەمەسپىن، نە بولسا، كورسە كوزىم.
9
جارار دەپ، تاعى ەكەۋى العا كەتتى،
الدارىنان جاس بالا قارسى كەپتى.
قىزىر سوندا ەشقانداي سەبەپسىز-اق،
ءولتىرىپ، ول بالانىڭ قانىن توكتى.
10
- و سۇمدىق، - دەدى مۇسا، بەيكۇنا جان،
قانداي عانا قيانات ەتتى ساعان.
جاۋىزدىققا قالايشا قولىڭ باردى،
قىزىرەكە، مۇنىڭدى قالاي ۇعام؟!
11
- ەسكەرتكەن ەم، كونبەستەن بىرگە ءجۇردىڭ،
ۇمىتىلدى تاعى دا ۋادەلەرىڭ.
ءتوزىمدى بول، سۇراما، ەش نارسەنى،
تۇسىنبەسى كوپ بولار، پەندەلەردىڭ.
12
- قىزىرەكە، سۇراسام ەندىگارى،
جولداس قىپ ەرتپەي-اق قوي، بۇدان ءارى.
ۋادەمدى نەشە بۇزدىم، كەشىرىڭىز،
قۋساڭىز دا سەبەپتەر تابىلادى.
13
سونىمەن تاعى ەكەۋى ءبىراز ءجۇرىپ،
كەزدەسكەن ءبىر شاحارعا كەلدى كىرىپ.
تالايلاردان قوناقجاي سۇراپ ەدى،
ىقىلاس ەتپەي قويدى، شىن ءبىلدىرىپ.
14
ەسكى ءۇيدى كەزدەستىرىپ، قۇلاپ تۇرعان،
ەكەۋى سولاي قاراي جولىن بۇرعان.
قىزىر بابا زاماتتا جوندەپ قويدى،
جاپ-جاقسى بولا قالدى، بۇرىنعىدان.
15
مۇسا ايتتى، ماقۇلدارلىق ءىسىڭ مىنا،
قۋانار تۇراتۇعىن كىسى مۇندا.
قالاساڭىز سۇرارسىز ەڭبەك اقى،
ريزا بولار يەسى بەرەر پۇلعا.
16
قىزىر سوندا مۇساعا تىڭدا دەدى،
- ەكەۋمىز قوشتاساتىن ءسات تە كەلدى.
الداعى ءوتىپ كەتكەن جاعدايلاردىڭ،
نەگىزگى شىن ماندەرى بىلاي ەدى.
17
- كەمەگە جۇزدىرمەدىم، تەسىپ تاستاپ،
كوپ كەدەيدىڭ ءجۇر ەدى جانىن ساقتاپ.
شىعا قالسا ءبىر پاتشا تارتىپ الىپ،
قالار ەدى بايقۇستار جىلاپ، قاقساپ.
18
- بالانىڭ اتا-اناسى مۇسىلماندار،
ول وسسە، ءدال سولارعا زورلىق قىلار.
بولاشاق ازعىن، سۇمنىڭ ورىنىنا،
ادال ۇل ءبىر اللادان ءناسىپ بولار.
19
- ال ەندى قۇلايتۇعىن ۇيگە كەلسەك،
ول ءۇيدىڭ قوجاسى ەدى قوس جەتىمەك.
تىعىلعان تام استىندا مول قازنا بار،
قۇلاسا تاۋىپ بوتەن يەمدەنبەك.
20
- بالالاردىڭ جاقسى ەدى اتا-اناسى،
اللاعا شەكسىز سەنگەن، مول ءتاۋباسى.
سول سەبەپتى ول قازنا ءتاڭىر بەرگەن،
جەتىمدەرگە بۇيىرار، ناپاقاسى.
21
- بۇل ىستەردىڭ وسىلاي مانىستەرى،
ويلاماعىن، بارلىعىن مەن ىستەدى.
اركىمگە پەشەنەسىن انىقتاعان،
ءبارى دە اللا بەرگەن ناسىپتەرى....
22
...ويلانايىق شىن قالاي، جالعان قالاي،
شىندى بىلمەي ءىس قىلعان بولار قالاي؟
قۇراننىڭ سوزدەرى ەدى قيسسا ەتتىم،
سەزىنسەڭ ماسەلە بار تالاي-تالاي.
ازامات اقىلبەكوۆ
تالدىقورعان
Abai.kz
