كەشە، ياعني مامىردىڭ 19-ى كۇنى قازاقستان جازۋشىلار وداعىنىڭ ادەبيەتشىلەر ۇيىندە بەلگىلى اقىن، حالىقارالىق «الاش» ادەبي سىيلىعىنىڭ لاۋرەاتى جاركەن بودەشۇلىنىڭ «ارعى جاققا – اسۋمىن، بەرگى جاققا – بەلەسپىن» دەگەن اتپەن 70 جىلدىق مەرەيتويى اتالىپ ءوتىلدى.

ادەبي-مادەني كەش اقىننىڭ 70 جاسقا تولۋىنا وراي قازاقستان جازۋشىلار وداعىنىڭ جانە جەكەلەگەن ازاماتتاردىڭ قولداۋىمەن ءوتىپ وتىر. كەش شىمىلدىعىن قازاقستان جازۋشىلار وداعى باسقارماسى توراعاسىنىڭ ءبىرىنشى ورىنباسارى، اقىن عالىم جايلىباي اشتى. ع.جايلىباي قازاقستان رەسپۋبليكاسىنىڭ مادەنيەت ءمينيسترى ارىستانبەك مۇحامەديۇلى ۇلىنىڭ قۇتتىقتاۋ حاتىن وقىپ، اقىننىڭ يىعىنا شاپان جاپتى. كەش تىزگىنىن «ايقىن» گازەتىنىڭ باس رەداكتورى نۇرتورە ءجۇسىپ ۇستادى. ج.بودەشۇلى تۋرالى «وتانشىل رۋحتىڭ اقىنى» دەگەن تاقىرىپپەن كولەمدى بايانداما جاساعان اقىن نەسىپبەك ايتۇلى: «جاركەن جىراۋدى مەن وسىدان قىرىق جىل بۇرىن سالىمعازى ابەەۆ دەگەن اقىننان ەستىدىم»، – دەپ باستاپ، بودەشۇلىنىڭ ءومىرى، ولەڭگە كەلۋى، پوەزياسى جايلى مول ماعۇلمات بەردى.

جاركەن بودەشۇلى كوپ جىلدار بويى قىزمەت اتقارعان دۇنيەجۇزى قازاقتارىنىڭ قاۋىمداستىعى اتىنان جازۋشى ءسۇلتانالى بالعاباەۆ اقىنعا تون كيگىزىپ، قۇتتىقتاۋ ءسوزىن سويلەدى.

«قازاق ادەبيەتىندە، پوەزياسىنا ءوز تاقىرىبىن الا كەلگەن قاسىم، مۇقاعالي سىندى اقىنداردىڭ قاتارىندا وسى جاركەن دە تۇرادى»، – دەپ ءسوز كەزەگىن العان مەملەكەتتىك سىيلىقتىڭ لاۋرەاتى، حالىق جازۋشىسى قابدەش ءجۇمادىلوۆ اقىندى مەرەيتويىمەن قۇتتىقتاي كەلە ونىڭ ناعىز قازاقى، بولمىسى تازا اقىن ەكەنىن ايتتى.

كەش بارىسىندا اقىننىڭ پوەزياسى جايلى مەملەكەتتىك سىيلىقتىڭ لاۋرەاتى، اقىن تەمىرحان مەدەتبەك ءسوز سويلەپ جاركەن ولەڭى جايلى سىر شەرتسە، اقىن ۇلىقبەك ەسداۋلەت اعاسىنا جىر ارنادى.

اقىنعا «جاس-اي» مەديتسينالىق ورتالىعىنىڭ ديرەكتورى جاساي زەكەيۇلى تەمىر تۇلپاردىڭ كىلتىن تابىستادى.

اقىننىڭ سوڭىنان ەرگەن جاس بۋىن بودەشۇلىنىڭ پوەزياسىن وقىپ، وتىرعان جۇرتتىڭ ىقىلاسىنا بولەندى. اۋەلەتىپ ءان سالىندى، كۇمبىرلەتىپ كۇي شەرتىلدى، وسىلايشا الماتى اسپانى مامىردىڭ مامىراجاي كۇنىندە كوركەم ولەڭنىڭ ھاس شەبەرى – جاركەن جىراۋدى جەتپىستىڭ بەلەسىنە شىعاردى.

مەيىرجان اۋەلحانۇلى

massaget.kz