اسا قامقور، ەرەكشە مەيىرىمدى اللانىڭ اتىمەن باستايمىن!

قادىرمەندى اعايىن!

مۇسىلمان قاۋىمىنىڭ ۇلىق مەرەكەسى – قۇربان ايت قۇتتى بولسىن! ايتقا امان-ەسەن جەتكىزگەن اللا تاعالاعا سانسىز شۇكىرلەر مەن ماقتاۋلار بولسىن!

قۇربان ايت – بىرلىك پەن يگىلىك، مەيىرىم مەن كەشىرىم مەرەكەسى. بيىل مۇسىلمان قاۋىمى بۇل مەرەكەنى 4 – 7 قازان ارالىعىندا تويلايدى. بۇل كۇندەرى مۇسىلماندار قايىرلى، ىزگى امالدار ارقىلى جاراتۋشىعا جاقىندايدى. قۇربان ايتتىڭ ءبىرىنشى كۇنى مەشىتتە ايت نامازى وقىلعاننان كەيىن اللانىڭ رازىلىعى ءۇشىن قۇرباندىق شالىنادى. قارجىلىق مۇمكىندىگى جوق ادامعا قۇربان شالۋ مىندەت ەمەس. قۇرباندىق ەتى اعايىن-تۋىس، كورشى-قولاڭ، تۇرمىسى تومەن وتباسىلارىنا، جەتىم مەن جەسىرلەرگە، مۇگەدەكتەر مەن سىرقات جاندارعا تاراتىلادى. مۇنداي يگى امالدار ادامدار اراسىندا مەيىرىم، قامقورلىق، كەشىرىم، قايىر-شاپاعات سەكىلدى كوركەم مىنەز بەن جاقسى قارىم-قاتىناس قالىپتاستىرادى. اللانىڭ رازىلىعى ءۇشىن قۇربان شالۋ ارقىلى پەندەنىڭ يمانى كۇشەيىپ، تاقۋالىعى ارتادى. قاسيەتتى قۇراندا: «ۇمىتپاڭدار، ولاردىڭ ەتى دە، قانى دا ەشقاشان اللاعا جەتپەيدى. وعان جەتەتىن نارسە – جۇرەكتەرىڭىزگە ۇيالاعان تاقۋالىق، اللاعا دەگەن قۇرمەت» («حاج» سۇرەسى، 37-ايات), – دەپ باياندالعان.

قاجىلىققا اتتانعان مۇسىلمان باۋىرلارىمىز، وتانداستارىمىز جۇزدەرىن قاسيەتتى قاعباعا قاراتىپ، ارافات تاۋىندا ەلىمىزدىڭ يگىلىگى مەن حالقىمىزدىڭ بىرلىگىن، ەكى دۇنيەنىڭ باقىتىن تىلەپ، جاراتقانعا جالبارىنا دۇعا جاساۋدا.

مۇباراك مەيرامنىڭ قۇرمەتىنە وراي، بارشا وتانداستارىمدى، كاسىپكەر باۋىرلارىمدى، ءدىن جاناشىرلارىن قۇربان ايتتا مۇگەدەكتەر، جەتىمدەر مەن جەسىرلەر، اسىرەسە قاراۋسىز قالعان اتا-انالار ءۇشىن ارنايى قايىرىمدىلىق ءىس-شارالار وتكىزىپ، ايتتىڭ قۋانىشىن سەزدىرىپ، ولارعا مۇمكىندىگىنشە كوڭىل بولۋگە شاقىرامىن.

اللا تاعالا بارشامىزدىڭ دۇعا-تىلەكتەرىمىز بەن ىزگى امالدارىمىزدى جانە شالعان قۇرباندىقتارىمىزدى قايىرىمەن قابىل ەتكەي!

ۇلتتار مەن ۇلىستاردى مەيىرىمدىلىككە، يگىلىككە، بىرلىككە ۇندەيتىن ۇلىق مەرەكە – قۇربان ايت مۇباراك بولعاي، اعايىن. جاراتۋشى يەمىزدەن وتباسىلارىڭىزعا اماندىق، مىقتى دەنساۋلىق، كاسىپتەرىڭىزگە ادالدىق پەن بەرەكە تىلەيمىن.

ەڭسەلى ەلدىڭ بولاشاعى باياندى، تاۋەلسىزدىگىمىز ماڭگى بولعاي! ءاۋمين!

ەرجان قاجى مالعاجىۇلى،

قازاقستان مۇسىلماندارى ءدىني

باسقارماسىنىڭ توراعاسى، باس ءمۇفتي

Abai.kz