تۇرعىن ءۇي قۇرىلىس جيناق بانكىنىڭ جەلىسى بويىنشا باعامدىق ايىرماشىلىقتى تولەۋگە ونلاين رەجيمدە ءوتىنىش بەرۋگە بولادى، - دەپ حابارلايدى بانكتىڭ ءباسپاسوز قىزمەتى. 

 الەۋمەتتىك جەلىلەردە قتقجب سالىمشىلارىنىڭ اراسىندا دۇربەلەڭ تۋعىزعان اقپارات پايدا بولدى. بۇل حابارلامادا تۇرعىن ءۇي قۇرىلىس جيناق بانكىنىڭ كليەنتتەرىن ەلەكتروندى-ساندىق قول الۋعا اسىعۋعا شاقىرعان. ايتپەسە، وتەماقىدان قاعىلاتىنى ايتىلعان.

تۇرعىن ءۇي قۇرىلىس جيناق بانكىنىڭ ءباسپاسوز قىزمەتىنىڭ ايتۋىنشا، قازىر ازاماتتارعا باعامدىق ايىرماشىلىق تولەۋ تەتىكتەرى ازىرلەنىپ جاتىر. جاقىن ارادا ول جاريا بولماق. ءتيىستى تولەمدەردى الۋ ءۇشىن، 2015 جىلدىڭ 18 تامىزىنا دەيىن تۇرعىن ءۇي قۇرىلىس جيناق بانكىندە دەپوزيت اشقان ازاماتتار ءوتىنىش بەرىپ، تقج شارتىنىڭ قوسىمشا كەلىسىمىن جاساۋى كەرەك.

ارنايى بانكتىك شوت اشۋ تالاپ ەتىلمەيدى. بانكتە ءبىر جىل دەپوزيت ساقتاعان جاعدايدا باعامدىق ايىرماشىلىق ەسەپتەلەدى.

تۇرعىن ءۇي قۇرىلىس جيناق بانكىنىڭ سالىمشىلارىنا وتەماقى تولەۋگە ونلاين-رەجيمدە ءوتىنىش بەرۋگە بولادى. وسى قىزمەت كورسەتۋ ءتۇرى ازاماتتارعا قولايلى بولۋى ءۇشىن ازىرلەندى جانە ەلەكتروندى-ساندىق قولدىڭ بولۋىن قاراستىرادى.

بانكتىڭ ەسكەرتۋى بويىنشا، ءانونيمدى جانە الەۋمەتتىك جەلى ارقىلى تارالعان اقپاراتتار رەسمي اقپارات بولىپ تابىلمايدى. سوندىقتان، سالىمشىلاردى ارانداتۋشىلىققا ۇرىنباۋعا شاقىرادى. ءوتىنىش قابىلداۋدىڭ ۋاقىتى تۋرالى بارلىق قاجەتتى اقپارات رەسمي باق-تا رەسمي تۇردە قوسىمشا حابارلانادى. ءباسپاسوز قىزمەتىنىڭ مالىمدەۋىنشە، تۇرعىن ءۇي قۇرىلىس جيناق بانكىنىڭ جۇمىسى وتەماقى الۋعا ءبارى بىردەي دەر كەزىندە قۇجات تاپسىرۋعا ۇلگەرەتىندەي ۋاقىت ىشىندە ۇيىمداستىرىلاتىن بولادى.

اباي-اقپارات