شىلدەنىڭ مي قايناتار ىستىعى قازاقستاننىڭ بارلىق ءوڭىرىن شارپىپ كەلەدى. 15 شىلدەدە شىمكەنتتە اۋا تەمپەراتۋراسى 49 گرادۋسقا دەيىن كوتەرىلسە، ەلىمىزدىڭ ورتالىعى مەن شىعىسىندا سىناپ باعانى 43 گرادۋسقا دەيىن جەتكەن. ىستىق مەزگىلىندە وزەن-كولگە شومىلۋشىلار دا جيىلەگەن. ال، كاسپيگە ماڭىنداعى اقتاۋلىقتار قازىر سۋعا تۇسە الماي قالعان. تەڭىزدىڭ تەمپەراتۋراسى كۇرت سالقىنداعان.

+ 49 گرادۋس! كتك-نىڭ حابارلاۋىنشا، شىمكەنتتەگى سىناپ باعاندارىنان وسى سان بىرنەشە كۇننەن بەرى تۇسپەي تۇر. تەك تۇندە 10-15 گرادۋسقا باسەڭدەيدى. كۇننىڭ اپتابى جاز بىتپەي جاتىپ، جاسىل جەلەكتەردى سارعايتىپ جىبەرگەن. اسفالت جولدار ەري باستادى. قازىر مۇنداعى جەدەل جاردەم قىزمەتى كۇشەيتىلگەن تارتىپتە جۇمىس ىستەپ جاتىر. مي قايناتار ىستىقتان ءتۇرلى اۋرۋلار ءورشىپ، شاقىرتۋلار 40 پايىزعا ارتقان.

الماتىدا بولسا 15 شىلدە دە اۋا تەمپەراتۋراسى 43 گرادۋسقا جەتتى. الماتىداعى ىستىقتان جاپا شەگۋشىلەردىڭ سانى كوبەيىپ بارادى. كۇنىنە جەدەل جاردەم ستانساسىنا كەلىپ تۇسكەن قوڭىراۋلاردىڭ سانى 2-2,5 مىڭعا دەيىن ارتقان. ونىڭ ىشىندە كۇننىڭ ىستىعىنان قان قىسىمى كوتەرىلىپ، جۇرەگى اۋىرعان، باسىنان كۇن وتكەن ادامداردىڭ سانى دا وسكەن. 

اۋا رايىن بولجاۋشىلاردىڭ مالىمەتىنشە، تاياۋ كۇندەرى كۇننىڭ كوزى قايتپايتىن ءتۇرى بار. قاراعاندى، جامبىل، شىعىس قازاقستان وبلىستارىندا سىناپ باعاناسى 43 گرادۋسقا دەيىن كوتەرىلۋى مۇمكىن. ال، قىزىلوردادا 46 گرادۋسقا دەيىن جەتەدى. اپتاپ ىستىق 20-شىلدەگە دەيىن تۇرادى دەپ بولجانۋدا. سوندىقتان ماماندار، تاپا-تال تۇستە دالاعا شىقپاۋعا كەڭەس بەرەدى. شىعىس قازاقستان وبلىسىندا 18-20 شىلدەدە كۇندىز سينوپتيكتەر +40+43°C ىستىق بولادى دەپ بولجاۋدا.

«اۋا تەمپەراتۋراسىنىڭ وتە جوعارى بولۋىنا بايلانىستى رەسپۋبليكامىزدىڭ وڭتۇستىك ايماقتارىندا ەسكەرتۋلەر جاريالاندى. كەيبىر جەرلەردە وڭتۇستىك اۋداندار دا اۋا تەمپەراتۋراسى 40-45 گرادۋس شاماسىندا ىسيدى دەپ بولجانۋدا. ءفرونتالدى بولىكتەردىڭ وزگەرۋىنە بايلانىستى رەسپۋبليكانىڭ كەي جەرلەرىندە شاڭداقتى داۋىلدار سوعىپ، مي قايناتار قاپىرىق اۋا شىلىڭگىر شىلدەنىڭ سوڭىنا دەيىن سوزىلۋى مۇمكىن»، - دەيدى «كازگيدرومەت» رمك الماتى بولىمشەسىنىڭ مامانى نۇرلان ابايۇلى. 

اباي-اقپارات