قازاقتا مەرەكە كوپ. تويشىل قازاق از جۇمىس ىستەپ، كوپ مەرەكەلەگەندى جاقسى كورەدى. سول كوپ مەرەكەنىڭ ەڭ قاستەرلىسى – بابالار اڭساعان بوستاندىقتىڭ، وتەمىنە كوپ قان توگىلگەن تاۋەلسىزدىكتىڭ ارداقتالار كۇنى، 16 جەلتوقسان. وسى مەرەكەنى ايتسا ءسىزدىڭ ەسىڭىزگە نە تۇسەدى؟

مەنىڭ ەسىمە ستۋدەنت بىتكەن اۋىلىنا اياق استى كەتىپ، قاڭىراپ قالعان قالا تۇسەدى. ىستىق قانى تۋلاعان، جاس جۇرەگى لۇپىلدەگەن جاستاردىڭ گۇل شوقتارىنا كومىلمەي، جەتىمسىرەپ تۇرعان ەسكەرتكىشتەر تۇسەدى. مەنىڭ ەسىمە بۇل كۇنمەن بىرگە ءبىر جۇما دەمالىس الىپ، ۇيلەرىنەن شىقپاي جاتىپ الاتىن شەندىلەر تۇسەدى. مەنىڭ ەسىمە تيەسىلى مەرەكەلىك كۇنى الىس بولسا دا «جەلتوقساننان» بۇرىن-اق جايناپ العان شىرشالار تۇسەدى. مەنىڭ ەسىمە وسى كۇندەرى عانا مەملەكەتتىك تەلەارنالاردان كورسەتىلەتىن سوۆەتتىك كەزدەگى قازاق كينولارى تۇسەدى ...

16 جەلتوقساندا استانا كۇنى قارساڭىنداعىداي «قازاقستان تەمىر جولىندا» بيلەت تاپشى بولعان ەمەس. بۇل كۇندە ءتۇرلى بۇقارالىق جارىستار، فوتو بايقاۋلار، ەسەپسىز بايگەلەر بولعان ەمەس. بۇل كۇندە شەتەلدىك مەگاجۇلدىزدار ەلىمىزگە كەلىپ كونتسەرت قويعان ەمەس. بۇل كۇندە كەي اكىم تاۋەلسىزدىكتىڭ مونۋمەنتى ورنالاسقان، جەلتوقساننىڭ ەسكەرتكىشى ورنالاسقان قالادا بولعىسى كەلمەيدى. بۇل كۇندە ميلليونداعان قارجى ءبولىنىپ وت شاشۋلار شاشىلعان ەمەس. بۇل كۇندە تىكەلەي ەفير ارقىلى جۇلدىز اتانىپ جۇرگەندەر كۇندىز-ءتۇنى ءان سالعان ەمەس.

استانا – ارينە اسەم قالا. قايراتكەرلىك قولتاڭبا. الايدا تاۋەلسىزدىك بولماسا استانا سالىنار ما ەدى؟ باق بەتىندە وسىدان ءدال ءبىر اي بۇرىنعى «قۋعىن-سۇرگىن قۇرباندارىن ەسكە الۋ كۇنى تۋرالى» قانشا ماتەريال جاريالاندى؟ كىم كۇڭىرەنە سويلەپ، ازىناعان ۇلت قايعىسىن سۇيەگى سىرقىراپ جىرعا قوستى؟ مەملەكەتتىك ءرامىز كۇنىندە كىم كونتسەرت وتكىزدى؟ ەسەسىنە سول كۇندەردەن-اق استانا كۇنى مەرەكەسى ناۋقانى جىرلانىپ جاتتى. سول كەزدەن-اق جاڭالىقتار سايتى «استانا كۇنىندە بالەن دەگەن جۇلدىز كەلەدى» دەپ جازىپ جاتتى. قازىر راديونى قوسسام استانا، تەلەارنانى قوسسام استانا، ينتەرنەتتى اشسام استانا، ويدا دا استانا، قىردا دا استانا... ال، سول استانانىڭ ىرگەسىنەن ون-اق شاقىرىم جاتقان كوپتەگەن اۋىلداردا سۋ، جارىق، جول ماسەلەسى شەشىلمەي جاتقانىن، استانانىڭ ءبىر كۇندىك تويىنا كەتكەن قارجىعا، مىڭ كىسى تۇراتىن ءبىر اۋىل سالۋعا بولاتىنىن ءسىز بىلەسىز بە؟  استانانى انگە قوسام دەپ ءجۇرىپ، «كوتەرەم اتتاي» قوعامىمىزدى زورىقتىرىپ الماساق ەكەن، اعايىن!

Abai.kz