ينتەرنەت بەتىن اقتارىپ، جەر-جاھاننىڭ جاڭالىعىن قاراپ وتىرساڭ جاڭا ۇستاتاتىن تالاي جاڭالىقتى كورەسىڭ. قۇداي باسقا بەرمەسىن دەپ بەتىڭدى شىمشىپ وتە شىعاسىڭ. وكىنىشتىسى كۇن سايىن الەمدە تالاي اۋمەسەرلىك پەن ازعىندىق بولىپ جاتىر. كوبەيمەسە، ەش ازايعان ەمەس. سونداي جەر استىنان شىققان جىكتى قازاقستاننان دا ءجيى كەزدەستىرەتىن بولدىق سوڭعى كەزدە.

ءسابي ءولىمى، كارىزگە ءتۇسىپ كەتكەن ءسابي، سابيلەر ساۋداسى، قاراۋسىز قالعان ءسابي، قوقىس جاشىگىنەن تابىلعان ءسابي... وسىنداي جاڭالىقتار ءىزىن سۋىتپاي باق بەتىنەن كورىنەتىن بولىپ كەتتى.

بۇل سوڭعى ءبىر عانا ايدىڭ ىشىندە بولعان جان شوشىتارلىق جاعدايلار.

وكىنىشتىسى وسىنداي قىلمىستاردىڭ قازاقى جۇرتى كوپ، ءتورت ميلليون قازاق قونىستانعان وڭتۇستىك وڭىرىندە قايتالانا باستاعانى. بۇل نەگە ءجيى قايتالانىپ جاتىر؟ شەتەلگە بالا ساتقاندى كورگەنبىز، بىرنەشە مىڭ بالا قۇرلىق اسىپ كەتكەندە سەلت ەتپەگەن قازاق قوعامى نەگە سونشا قاتىگەزدەنىپ بارادى؟ كوكەك انا تۋرالى، جاس قىزداردىڭ نارەستەلەرىن تۋا شوكتىرگەنى تۋرالى دا اقپارات از ەمەس.

ءسىز بىلەسىز بە، قازاقستاندا 20 جىلدىڭ ىشىندە ءۇش ميلليوننان استام بالا تۋماي جاتىپ، و دۇنيەلىك بولىپ، ابورتتىڭ قۇربانىنا اينالعان. سونىڭ كوپ بولىگىن 14-20 جاس اراسىنداعى قىرشىن قىزدار جاساتىپ كەلگەن. ءتىپتى، ونىڭ ون مىڭنان استامى ەكىنشى تۇسىكتى جاساتقان.  جاسىندا بۇيتكەن قىزدار ەرتەڭ دەنى ساۋ ۇرپاق بوسانا ما؟ بالاعا زار، ۇرپاققا ءزارۋ بولعان كىسى قانشاما؟ بىرەۋ دەنساۋلىعى جاراماي نارەستەنىڭ كۇلكىسىنە زار بولىپ جۇرسە، ەندى بىرەۋلەردىڭ جاس بالاسىن جورگەگىندە، جاتىردان امان جارىق دۇنيەگە شىقسا قوقىس جاشىگىندە تۇنشىقتىراتىنى قالاي؟

جاساندى تۇسىكتىڭ انا ومىرىنە قاۋىپتى ەكەنىن بارشاسى بىلەدى. الايدا ايەلدىڭ ءوز ەركىمەن تۇسىكتى جاساۋىنا ءبىزدىڭ ەلدە ەش كەدەرگى جوق. ءدىن ادامدارى دا، دەموگرافتار دا بۇعان تۇبەگەيلى قارسىلىق تانىتىپ كەلەدى. زاڭنىڭ سولقىلداقتىعى مەن قىزدىڭ جەڭىلتەكتىگىنەن قانشاما تاعدىر تۋماي جاتىپ شوكتى. ول مەملەكەتتىك زاڭعا عانا ەمەس ءسىز بەن ءبىزدىڭ ۇيات كودەكسىمىزگە سىن بولسا كەرەك. ايەل باقىتى - باۋىرىنداعى ءسابي. بۇگىنگى ءسابي – ەرتەڭگى كەلەشەك. ءسابيدىڭ بەيكۇنا ءولىمى، اكەسىز-شەشەسىز جەتىمەك بولىپ ومىرگە كەلۋى، تۋا ساپ ساۋداعا سالىنۋى كەشىرىلمەس قىلمىس. سوعان رۇقسات بەرىپ وتىرعان تۇتاس قوعام شىندىعىندا قىلمىسكەر. كىنانى كىمنەن ىزدەيمىز، ءسىزدى ارىڭىز مازالاي ما؟ سانسىز سۇراق، وراسان جاۋاپكەرشىلىك.

مەملەكەتتىك ورگاندار عانا ەمەس، قىز ءوسىرىپ وتىرعان بارشا اكەلەر، قالىڭدىق سۇيگەن جاس جىگىتتەر، ويناپ ءجۇرىپ وت باسقان بويجەتكەندەر، انت بەرىپ پىشاق ۇستاعان دارىگەرلەر... ءبارىمىز دە ارداقتى انا ۇعىمىن قاستەرلەپ، ايالى ءسابي جۇرەگىن قادىرلەي بىلسەك ەكەن. ءار شاڭىراقتىڭ ءتۇتىنى ءتۇزى ۇشقاي!

Abai.kz