ەلوردادا استانانىڭ 17 جىلدىعىنا وراي بۇقارالىق ۆەلوشەرۋ ءوتتى. مارەدە ۆەلوشاباندوزدارعا باعالى سىيلىقتار تابىستالدى. جەڭىمپازداردىڭ ءبىرى ەكسپو-2017 اتىنان سپورت ۆەلوسيپەدىنە يە بولدى.

سپورت پەن بەلسەندى ءومىر سالتىن حوش كورگەندەر ۇزاقتىعى ءتورت شاقىرىمنان اساتىن، «سالتانات سارايىنان» باستاۋ الىپ استانالىق «سارىارقا» ۆەلوترەگىنە دەيىن سوزىلعان جولدى ءجۇرىپ ءوتتى. مارەدە شارا قاتىسۋشىلارىن ۆەلوشەرۋدى ۇيىمداستىرۋشىلار – استانا اكىمدىگى مەن «استانا ەكسپو-2017» ۇق قارسى الدى. قر پارلامەنت ءماجىلىسىنىڭ دەپۋتاتتارى ۆەلوشاباندوزداردى شەرۋدىڭ ءساتتى اياقتالۋىمەن جانە الدا كەلە جاتقان قازاقستاننىڭ باس قالاسىنىڭ 17 جىلدىعىمەن قۇتتىقتادى.

«استانانىڭ 17 جىلدىعىنا، سونداي-اق، بۇكىل الەمدى جالىن-جىگەرىمەن تاڭ قالدىرىپ وتىرعان عاجاپ مەملەكەتىمىزدىڭ قۇرمەتىنە ارنالعان وسىنداي كەرەمەت ۆەلوشەرۋ ۇيىمداستىرۋشىلارى – ەكسپو-2017-گە العىس ايتقىمىز كەلەدى. تاماشا بولدى»  دەپ اتاپ ءوتتى اندرەي بەگەنەەۆ.

«مەرەكە دەگەنىمىز نە؟ بۇل – باسقوسۋ، دوستارىڭمەن بىرگە بولىپ، بەلسەندىلىك تانىتۋ. بۇل – سپورتتى ناسيحاتتاۋ، بۇل – ءبىزدىڭ قازاقستانىمىزدىڭ بولاشاعى. سوندىقتان، العا، قازاقستان! العا، سالاماتتى ءومىر سالتى!» دەدى دەپۋتات مەيرام بەگەنتاەۆ.

«استانا - ارەنا» الدىنداعى الاڭعا جينالعان ۆەلوشەرۋ قاتىسۋشىلارى اراسىندا باعالى سىيلار ويناتىلدى. ۇتىس ويىنى تىركەلۋ كەزىندە بەرىلگەن نومەرلەر ارقىلى ءجۇردى. ەڭ جاس جانە ەڭ ەگدە ۆەلوشاباندوزدارعا ەستەلىك سىيلىقتار تابىس ەتىلدى. ولار 3 جانە 68 جاستاعى استانا تۇرعىندارى بولدى.

«استانا ەكسپو-2017» ۇك ارنايى سىيلىق ويناتتى. قاتىسۋشىلاردىڭ ءبىرى ەكسپو-2017 لەيبلى بار سپورت ۆەلوسيپەدىن ۇتىپ الدى.

جالپى العاندا بۇقارالىق ۆەلوشەرۋگە 2000 قالا تۇرعىنى مەن قوناعى قاتىستى. مەيرامدى ەكسترەمال شوۋ جالعاستىردى. كاسىبي كاسكادەرلەر اسەرلى تريۋكتار كورسەتتى. شارا كونتسەرتتىك باعدارلامامەن جانە مەرەكەلىك وتشاشۋمەن اياقتالدى.

اباي-اقپارات