رەسەي پرەزيدەنتى ۆلاديمير پۋتين مەن اقش باسشىسى باراك وباما تەلەفون ارقىلى الەمدە بەلەڭ العان لاڭكەستىكپەن كۇرەس ماسەلەسى توڭىرەگىندە اڭگىمەلەسكەن. بۇل تۋرالى رەسەي پرەزيدەنتىنىڭ ءباسپاسوز حاتشىسى دميتري پەسكوۆ مالىمەتىنە سۇيەنىپ Bnews.kz جازدى.

«ەكى ەلدىڭ باسشىلارى ەڭ ءبىرىنشى كەزەكتە ەكى ەل اراسىنداعى قارىم-قاتىناستى تالقىلادى. سونان سوڭ الەمدە بەلەڭ العان لاڭكەستىكپەن كۇرەس جايى، اسىرەسە، يسيم-ءنىڭ تاياۋ شىعىستاعى ىقپالىن جويۋعا قاتىستى اڭگىمە ءوربىتتى. پۋتين مەن وباما رف سىرتقى ىستەر ءمينيسترى سەرگەي لاۆروۆ پەن اقش مەملەكەتتىك حاتشىسى دجون كەرريگە وسى ماسەلەلەردى تالقىلاۋ ءۇشىن تاپسىرما بەرۋگە كەلىستى»، - دەيدى د.پەسكوۆ.

پرەزيدەنتتەر بۇنىمەن قاتار، رف ءسىم ءمينيسترىنىڭ ورىنباسارى گريگوري كاراسين مەن اقش مەملەكەتتىك حاتشىسىنىڭ كومەكشىسى ۆيكتوريا نۋلاندقا تاياۋ ۋاقىتتا مينسكىدەگى كەلىسىمدەردىڭ ىسكە اسىرىلۋ بارىسىن تالقىلاۋدى تاپسىراتىنىن ايتقان.

اباي-اقپارات