بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «اتوم ەنەرگياسىن پايدالانۋ تۋرالى» زاڭ جوباسىن ءبىرىنشى وقىلىمدا ماقۇلدادى. بۇل تۋرالى  inform.kz جازدى.

 اتالعان زاڭ جوباسى يادرولىق، رادياتسيالىق جانە ەلەكتروفيزيكالىق قوندىرعىلاردى ورنالاستىرۋ، سالۋ، پايدالانۋ جانە پايدالانۋدان شىعارۋ كەزىندە قاۋىپسىزدىكتىڭ قاعيداتتارى مەن نەگىزگى تالاپتارىن بەلگىلەۋگە باعىتتالعان.

بۇدان بولەك، قۇجاتتى قابىلداۋ اتوم ەنەرگياسىن پايدالانۋ كەزىندە قاۋىپسىزدىكتى قامتۋ جانە ونى رەتتەۋدەگى اتوم ەنەرگياسىن پايدالاناتىن مەكەمەلەرگە قاۋىپسىزدىك دەڭگەيىنىڭ تالاپتارىن ورىنداۋعا، ولاردى جۇزەگە اسىرۋعا كەتەتىن شىعىنداردى ازايتۋعا مۇمكىندىك بەرەدى.

«سونىمەن قاتار، زاڭ جوباسى قورشاعان ورتانى قورعاۋدى كوزدەيدى، ياعني، مەملەكەتتىك ورگاندار مەن ۇيىمداردىڭ جاۋاپكەرشىلىك ۋاكىلەتتىلىگىن ناقتىلاۋ ارقىلى قورشاعان ورتانى قورعاۋدىڭ ءتيىمدى جولدارى انىقتالادى»،- دەدى زاڭ جوباسى بويىنشا بايانداعان ەنەرگەتيكا ءمينيسترى ۆلاديمير شكولنيك.

ونىڭ ايتۋىنا قاراعاندا، قولدانىستاعى «اتوم ەنەرگياسىن پايدالانۋ تۋرالى» زاڭ بۇدان 15 جىل بۇرىن، سول كەزەڭدەگى ەلىمىزدىڭ اتومدىق تاجىريبەلەرى، يادرولىق تەحنولوگيالاردى قولدانۋ دەڭگەيى مەن اتوم ونەركاسىبى جاعدايلارى ەسەپكە الىنا وتىرىپ، قابىلدانعان بولاتىن.

«قازىرگى ۋاقىتتا قازاقستاندا مەديتسينادا، ونەركاسىپ پەن عىلىمدا قولدانىلاتىن 5 يادرولىق قوندىرعى، 4 راديواكتيۆتىك قالدىقتار قويمالارى، جۇزدەگەن رادياتسيالىق قوندىرعىلار، بىرنەشە مىڭ ساۋلەلەر يوندايتىن ورىندار بار. قازاقستاندا اتوم ەنەرگياسىن پايدالانۋ جۇمىستارىن جۇرگىزۋگە 3 مىڭنان استام ليتسەنزيالار بەرىلگەن. اتوم ەنەرگياسىن پايدالانۋ سالاسىندا قىزمەتتەرىن جۇزەگە اسىراتىن ۇيىمدار مەن كاسىپكەرلىك سۋبەكتىلەر سانى دا ارتىپ كەلەدى. سونىمەن قاتار، قازاقستان وسى ۋاقىت ارالىعىندا اتوم ەنەرگياسىن پايدالانۋ سالاسىنداعى بىرقاتار حالىقارالىق كونۆەنتسيالارعا دا قوسىلىپ وتىر»، - دەيدى ۆ. شكولنيك.

ونىڭ ايتۋىنشا، جاڭا رەداكتسياداعى زاڭ جوباسىن ازىرلەۋ دە وسىعان بايلانىستى تۋىنداعان. ال بۇل قۇجاتتى قابىلداۋ مەملەكەتتىك بيۋدجەتتەن قوسىمشا قاراجاتتى ارتتىرمايدى ءارى تەرىس الەۋمەتتىك-ەكونوميكالىق سالدارعا سوقتىرمايدى. 

اباي-اقپارات