تانىمال يتالياندىق Reppublica گازەتىنىڭ پلاتفورماسىندا ۇيىمداستىرىلعان ساۋالناما (http://utility.repubblica.it/repubblicamilano-sondaggio/…) ناتيجەسى بويىنشا قازاقستاننىڭ ۇلتتىق پاۆيلونى كولۋمبيادان كەيىنگى ەكىنشى ورىندى ءبىر جارىم اي بويى بويى ەشكىمگە بەرمەي كەلەدى.

قازاقستاننىڭ ميلانداعى كورمەگە قاتىسۋى تۋرالى يتالياندىق باسىلىمداردىڭ نە دەپ جاتقانى تۋرالى اڭگىمەلەسەك.

«قازاقستاننىڭ ەكسپو ميلان 2015-تەگى پاۆيلون كورمەسى – كەلگەن قوناقتى اقپارات، بەينەلەر جانە ءتۇرلى سەزىمدەردىڭ قۇشاعىندا ءۇيىرىپ اكەتەتىن مۋلتيمەديالىق شوۋ. بۇل – ءوز بويىندا عىلىم، ونەر، تاريح جانە مادەنيەتتى بىرىكتىرگەن، ۇشان-تەڭىز بايلىق پەن قازاق حالقىنىڭ مىنەزىن كورسەتەتىن شاعىن مۇراجاي»، - دەپ جازادى Media Centre ExpoMilano2015.

ال تاعى ءبىر اتاقتى GazzettaDelloSport باسىلىمى «ەكسپو-داعى ءبىر كۇن» ايدارىندا قازاقستانعا تومەندەگىدەي باعا بەرگەن ەكەن.

«ەكسپو-داعى ەڭ قىزىقتى پاۆيلون؟ ول – كىرسەڭ شىققىڭ كەلمەيتىن، ادەمى تەحنولوگيالارى بار قازاقستاننىڭ پاۆيلونى»، - دەپ ءبىر اۋىزدان جاۋاپ بەردى بىزگە مەترودا كەزدەيسوق جولىققان سيراكۋزادان كەلگەن مەكتەپ وقۋشىلارى»، - دەيدى باسىلىم.

دەرەككوزدەردىڭ حابارلاۋىنشا، كەلگەن قوناقتاردى ءداستۇر مەن يننوۆاتسيانىڭ باسىن قوسقان كورمەنىڭ يننوۆاتسيالىق جاعى تاڭ قالدىرادى. ء«تيىمدى قىزمەت تۇرلەرى، سىپايىلىق، جالعىز نەو-پاۆيلونعا كىرۋ ءۇشىن تۇرعان ەلدىڭ كەزەگى»، - دەپ جازادى GazzettaDelloSport.

كۇن سايىن جارىق كورەتىن «GAZZETTA DI PARMA» گازەتى EXPO Milano 2015 بۇكىلالەمدىك كورمەسىنىڭ «بارىپ كورۋگە تۇرارلىق دەلىنەتىن كورنەكتى جەرلەرىنىڭ» وندىعىنا قازاقستاندىق پاۆيلوندى ەنگىزگەن.

«قيالىڭمەن كەلىسپەسكە امال جوق، قازاقستاندىق پاۆيلوننىڭ ىشىندە ۇشقىڭ كەلەدى، ءبارى سونداي شىنايى، ءتىپتى، كۇدىك-كۇمانمەن كەلگەن ەلدىڭ ءوزى تاڭ قالىپ جاتادى... پاۆيلونعا بارعان ادام ءادىل تۇردە كورمەدەگى ەڭ تانىمال ورىنداردىڭ ءبىرى اتالعان جەرگە كىرۋ ءۇشىن كەزەكتە تۇرعانداردىڭ الدىندا كورسەتىلەتىن ءداستۇرلى بيلەردى، حالىق اندەرىن جانە «روك-جۇلدىزعا» ۇقسايتىن ءانشىنى كورە الادى. وسىدان كەيىن ساياحاتىڭىز قاراڭعى بولمەدە جالعاسادى. ول جاقتا الىپ ەكراندا الدەبىر جىلدام جانە ناقتى قيمىلدايتىن ادام قولدارى ەل تاريحىن قۇممەن سالىپ كورسەتىپ وتىرادى. تاڭبالى تاس، ءبىر-بىرىمەن الىسقان تايپالار، ەلدىڭ پاتشالىق رەسەي قۇرامىنا كىرۋى، 1991 جىلى العان تاۋەلسىزدىك – وسىنىڭ ءبارىن تاماشالاي الاسىز. بۇدان سوڭ ەسكالاتور ءسىزدى ازيا الىبىنىڭ ەرەكشەلىكتەرى (اۋىل شارۋاشىلىعى وندىرىسىنەن باستاپ (باتىرمانى باسساڭىز، كەرەگەدەن ىشىندە وسىمدىكتەرى بار تسيليندرلەر شىعادى) ەنەرگەتيكالىق رەسۋرستارعا دەيىن، اۋىل شارۋاشىلىعى ادىستەرىنەن باستاپ التى ايعا سوزىلعان ەكسپو كورمەسى كەزىندە 10 سانتيمەترگە ۇزاراتىن بەكىرەتۇقىمداس بالىقتارى بار باسسەين تۇرىندە ۇسىنىلعان اكۆامادەنيەتكە دەيىن) سيپاتتالاتىن 6 روتوند (تاقىرىپتىق ايماقتار) ورنالاسقان زالعا الىپ كەلەدى»، - دەپ جازادى باسىلىم.

ەڭ ۇزدىك پاۆيلوندى انىقتاۋعا ارنالعان داۋىس بەرۋ 2015 جىلدىڭ 30 قازانىنا دەيىن جالعاسادى.

Abai.kz