كۋبا جانە اقش بيلىگى قۇنى 860 مىڭ دوللارعا تەڭ ورتاق جوبا - ادەبيەت سالاسى بويىنشا نوبەل سىيلىعىنىڭ لاۋرەاتى، «شال مەن تەڭىز» تۋىندىسىنىڭ اۆتورى ەرنەست حەمۋنگۋەيدىڭ ءۇيىن قالپىنا كەلتىرۋ ءىسىن باستاعانىن مالىمدەدى. قازاقپاراتتىڭ جازىنشا، جوباعا جازۋشى ءۇيىنىڭ جانىنان اۆتوردىڭ مىڭداعان قۇجاتى، ونىڭ ىشىندە جەكە حاتتار مەن شيماي داپتەرلەرىن جيناپ، قالپىنا كەلتىرۋ ماقساتىندا شەبەرحانا سالۋ دا قاراستىرىلعان.

1939 جىلدان 1961 جىلعا دەيىن جازۋشى تۇرعان فينكا ۆيحيا يەلىگى كۋبا استاناسى گاۆانانىڭ ماڭايىندا ورنالاسقان. Finca Vigia امەريكالىق قورى كۋبا بيلىگىنەن ءۇيدىڭ باستان-اياق قالپىنا كەلتىرۋى ءۇشىن ماتەريالداردى اقش-تان اكەلۋگە رۇقسات العان. اتالعان كەلىسىمگە سەنبى كۇنى قول قويىلدى.

قور باسشىسى مەري-دجو ادامستىڭ مالىمەتىنشە، كۋبالىق بيلىكپەن حەمينگۋەي يەلىگىندە قالپىنا كەلتىرۋ جۇمىستارى بويىنشا كەلىسسوزدەر جۇرگىزۋ 2005 جىلى باستالعان. الايدا اقش پەن كۋبانىڭ قارىم-قاتىناسى شيەلەنىسىپ، جوبانىڭ ىسكە اسۋى مۇمكىن بولماعان ەدى.

2014 جىلدىڭ جەلتوقسانىندا اقش پرەزيدەنتى باراك وباما كۋبامەن ديپلوماتيالىق قارىم-قاتىناسىن، سونداي-اق ساۋداداعى شەكتەۋلەردى جەڭىلدەتىپ، قالپىنا كەلتىرەتىندىگىن مالىمدەگەن. بۇدان كەيىن جوبا ەكىجاقتى قولداۋعا يە بولدى. جازۋشىنىڭ جەسىرى كىتاپتار، كيىمدەر، ءتىپتى سپيرتتەلگەن كەسىرتكەلەر توپتاماسى ورنالاساتىن مۇراجاي جاساپ شىعۋ ءۇشىن ءۇيدى كۋبا بيلىگىنە بەرىپ وتىر.

اباي-اقپارات