الدىن الا بولجام بويىنشا، پاۆلودار وبلىسىنىڭ ءبىلىم بەرۋ باسقارماسى ۇسىنعان اقپاراتقا سايكەس جاڭا وقۋ جىلىندا 11 مىڭنان استام بالعىن ءبىرىنشى سىنىپتىڭ تابالدىرىعىن اتتايدى، دەپ حابارلايدى pavlodarnews.kz ءتىلشىسى. ەسكە سالا كەتەيىك، وتكەن جىلى ءبىرىنشى قىركۇيەكتە ايماقتا 10800 ءبىرىنشى سىنىپ وقۋشىسى مەكتەپ پارتاسىنا وتىرعان.

سوڭعى بىرنەشە جىلدا پاۆلودارلىق ءبىرىنشى سىنىپ شاكىرتتەرىنىڭ سانى بەس ءجۇز بالاعا دەيىن ارتۋدا. ايتا كەتەرلىگى، اتا-انالاردىڭ باسىم بولىگى بالالارىن التى جاستان مەكتەپكە بەرگەندى ءجون كورەدى. بىلتىرعى مالىمەتكە سۇيەنسەك، بۇل ءبىرىنشى سىنىپ وقۋشىلارىنىڭ جالپى سانىنان ۇشتەن ءبىر بولىگىن قۇرايدى. اگەنتتىكتىڭ جولداعان رەسمي حاتىنا ۆەدومستۆو باسشىسىنىڭ ورىنباسارى تامارا يۆانوۆا تومەندەگىدەي جاۋاپ بەردى: وبلىستا بالاباقشا بىتىرۋشىلەرىن ءبىرىنشى سىنىپقا جيناۋ ناۋقانى قىزۋ جۇرۋدە جانە 30 تامىزعا دەيىن جالعاسىن تابادى. باستاۋىش ءبىلىم بەرۋ ۇيىمى ءبىرىنشى سىنىپقا 1-قىركۇيەكتە التى نەمەسە جەتى جاسقا تولعان بارلىق ءبۇلدىرشىندى قابىلدايدى.

تامارا يۆانوۆانىڭ ايتۋىنشا، ءبىرىنشى سىنىپقا قابىلداناتىن ۇمىتكەرلەردەن وقۋ جانە ءبىلۋ داعدىسىن تولىق مەڭگەرۋ تالاپ ەتىلمەيدى، پەداگوگتاردىڭ بالالاردى تەستىلەۋدەن وتكىزۋگە قۇقىعى جوق. - مينيسترىلىكپەن بەكىتىلگەن ەرەجەگە سايكەس مامانداندىرىلعان مەكتەپتەردى ەسەپتەمەگەندە، باستاۋىش ءبىلىم بەرۋ ۇيىمىمەن ءبىرىنشى سىنىپقا قابىلداۋ بارىسىندا ەمتيحاندار مەن تەستىلەۋ، سىناق جۇرگىزىلمەيدى. بالامەن جانە ونىڭ وتباسىمەن تانىسۋ ماقساتىندا كەزدەسۋ وتكىزىلەدى. جالپى ءبىلىم بەرۋ مەكتەپتەرىنىڭ ءبىرىنشى سىناپتارىنا بالعىندار دايىندىق دەڭگەيىنە قاراماستان قابىلدانادى، - دەدى ت. يۆانوۆا. الايدا ەگەر اتا-انالار بالالارىن دارىندى جەتكىنشەكتەرگە ارنالعان مەكتەپكە بەرگىسى كەلسە، مۇنداي ءبىلىم وردالارى ءۇشىن قر ۇكىمەتىمەن بەكىتىلگەن باسقا نورماتيۆتىك قۇجات بار. بالالارعا كونكۋرستىق ىرىكتەۋ قالالىق ادىلەت ورگانىمەن بەكىتىلگەن مەكتەپ جارعىسىنا سايكەس ءبىرىنشى، بەسىنشى، جەتىنشى جانە توعىزىنشى سىنىپتاردا جۇرگىزىلەدى.

Pavlodarnews.kz