"تۇركيا ءاربىر مەملەكەت سەكىلدى ءوزىنىڭ اۋماعىن جانە اۋە كەڭىستىگىن قورعاۋعا قۇقىعى بار"- دەپ مالىمدەدى باراك وباما 24 قاراشادا اق ۇيدە فرانسۋا وللاندپەن بىرگە وتكىزگەن ءباسپاسوز ءماسليحاتىندا.

"قازىر رەسەيلىك تاراپ بولسىن، تۇركيالىق بولسىن ءبىر-بىرلەرىمەن كەلىسسوز جۇرگىزىپ، ءمان-جايدى انىقتاپ، جاعداي ۋشىعىپ كەتپەۋ ءۇشىن شارا قولدانۋلارى قاجەت", - دەدى وباما. ال فرانسۋز پرەزيدەنتى ءوز كەزەگىندە ء"بىز جاعدايدىڭ ورشۋىنە جول بەرمەۋىمىز كەرەك، بۇل ءبۇلدىرۋشى كۇش", - دەپ اتاپ ءوتتى.

اقش پرەزيدەنتى باراك وباما اقش پەن فرانتسيا تەرروريزممەن كۇرەستە "تۇتاس" ەكەنىن مالىمدەپ،"يسلام مەملەكەتى" (يم) جانە ونىڭ يدەولوگياسى "بارلىعىمىزعا قاۋىپ توندىرەدى" دەدى.

وللاند بولسا تەرروريستەردىڭ ەۋروپاعا كىرۋىن الدىن الۋ ءۇشىن تۇركيا مەن سيريا اراسىنداعى شەكارانى تەز ارادا جابۋ كەرەكتىگىن ايتتى. ول سونىمەن بىرگە وبامامەن يم-عا قارسى سيريا مەن يراكقا جويقىن سوققى بەرۋدى ۇدەتۋگە كەلىسكەندەرىن جەتكىزدى. 

ءوز كەزەگىندە رەسەي پرەزيدەنتى ۆلاديمير پۋتينتۇركيا اسكەري اۋە كۇشتەرىنىڭ رەسەيلىك سۋ-24 ۇشاعىن اتىپ ءتۇسىرۋى جايلى وقيعانى لاڭكەستەرگە دەم بەرۋشىلەردىڭ رەسەيگە قاپىدا جاساعان سوققىسى دەپ باعالادى. "رەسەيلىك ۇشاقپەن بولعان قايعىلى وقيعانىڭ سالدارى ماسكەۋ مەن انكارانىڭ قارىم-قاتىناسىنا ايتارلىقتاي سىزات تۇسىرەدى", - دەپ مالىمدەدى پۋتين.

ال، شەشەنستان پرەزيدەنتى رامزان كادىروۆ بولسا ءوزىنىڭ Instagram پاراقشاسىندا «تۇركيانىڭ بۇل ىسكە ءالى-اق وكىنەتىنىنە ەش كۇمانىم جوق. دوستىق پەن ىنتىماقتاستىقتى قالايتىن ەل مۇنداي زۇلىم ارەكەتكە بارماس بولار» دەپ جازادى.

«شەشەنستان رەسپۋبليكاسى، شەشەن حالقى جانە مەن ءوز باسىم رەسەي پرەزيدەنتىنىڭ تاپسىرمالارى مەن بۇيرىقتارىن ورىنداۋعا ءازىر ەكەنىمدى ايتقىم كەلەدى. ول ءۇشىن ءبىزدىڭ ەرىك-جىگەرىمىز، ەرلىگىمىز جەتەدى. ءبىزدىڭ كەز كەلگەن تاپسىرمانى ورىندايتىن ەرىكتىلەرىمىز بار. ءبىز بۇيرىقتى ورىنداۋعا دايىنبىز!» دەيدى كادىروۆ.

وسى وقيعاعا قاتىستى تۇركيا ەلىنىڭ كوشباسشىسى ەردوعان بولسا: ء"بىز بۇل جاعدايدى قالامادىق، بىراق تۇركيانىڭ ءوز شەكاراسىن قورعاۋىنا دەگەن قۇقىعىن بارلىعى قۇرمەتتەۋى كەرەك. بەلگىسىز اسكەري نىسان ءبىزدىڭ اۋە كەڭىستىگىمىزگە كىرىپ كەتتى، بەس مينۋتتىڭ ىشىندە وعان ون ەسكەرتۋ جاسالدى، بىراق ولار تىڭدامادى. ءبىز قاتەرلەرگە قاتىستى ارەكەت ەتۋدىڭ ەرتەدە جاريا ەتىپ، قابىلداعان ەرەجە بويىنشا قاتاڭ تۇردە ارەكەت ەتۋگە شەشىم قابىلدادىق", - دەپ مالىمدەدى.

رەسەيدىڭ ۋليانوۆسك قالاسىنىڭ تۇرعىندارى Efes سىرا ازىرلەۋ زاۋىتىنىڭ ايماعىندا ىلىنگەن تۇركيا تۋىن شەشىپ الىپ، وعان جۇمىرتقا لاقتىردى. تۇرعىندار وسىلايشا رەسەيلىك سۋ-24 ۇشاعىن قۇلاتقاندارعا نارازىلىقتارىن كورسەتكەن دەپ جازادى LifeNews.

Abai.kz