نەمەسە بەنزين باعاسى ەكى ەسەگە قىمباتتايدى

25-قاراشادان باستاپ قازاقستاندا جانارماي اكتسيزدەرىنىڭ باعاسى ەكى ەسەگە قىمباتتايدى. قازىرگى تاڭدا بەنزين جانە ديزەل جاعارمايىنىڭ كوتەرمە اينالىمداعى باعاسى 10,5 مىڭ تەڭگەنى قۇرايدى. بۇل تۋرالى Caravan.kz سايتى جازادى.

قازاقستان رەسپۋبليكاسىنىڭ ۇكىمەت باسشىسى كارىم قازىمۇقانوۆيچ 2015 جىلدىڭ قاراشاسىنان باستاپ «جانارماي اكتسيزدەرىنىڭ (اۋە كومپانيالارىنا دا) كوتەرمە جانە بولشەك ساۋداداعى باعاسىن رەتتەۋ» تۋرالى № 887 قاۋلىسىن قابىلداعان.  دالىرەك ايتساق، ءماسىموۆ مىرزا بيىلعى جىلدىڭ 13-ناۋرىزىندا شىعارعان شەشىمىنە بىرقاتار وزگەرتۋلەر ەنگىزگەن.

ەندى قازاقستاندا بەنزين جانە ديزەل جاعارمايىنىڭ (اۋە كومپانيالارىنا دا) كوتەرمە اينالىمداعى باعاسى 10,5 مىڭ تەڭگەنى قۇرايتىن بولادى. ال بۇل سوما بۇرىن 4,5 مىڭ تەڭگە بولعان.  

سونىمەن قاتار، اۆتو جانارماي بەكەتتەرىنە كوتەرمە جانە بولشەك ساۋداعا تاسىمالداۋ 11 مىڭ تەڭگەگە قىمباتتايدى. ال بۇگىنگى كۇنگە دەيىن بۇل سوما 5 مىڭ تەڭگەنى قۇراپ كەلگەن.

جانارماي باعالارىن رەتتەۋ تۋرالى جاڭا قاۋلى قر سالىق كودەكسىنىڭ 279-بابىندا كورسەتىلگەن نورماتيۆتەرگە سايكەستەندىرىلگەن.

سونداي-اق،  قاۋلى قابىلدانعان كۇننەن باستاپ 10 جۇمىس كۇنىنىڭ ىشىندە كۇشىنە ەنەتىن بولادى.

بۇل دەگەنىڭىز 2015 جىلدىڭ 25-قاراشاسىنان باستاپ جانارماي بەكەتتەرىنە كوتەرمە جانە بولشەك ساۋداعا شىعارىلاتىن بەنزين مەن ديزەل وتىندارىنىڭ باعاسى ەكى ەسەگە قىمباتتايدى دەگەن ءسوز. وسى كۇنگە دەيىن مەملەكەتتىڭ جەڭىلدەتىلگەن باعا تاعايىنداۋى بويىنشا كوتەرمە جانارمايعا قارىق بولىپ كەلگەن بەكەتتەر ەندىگى جەردە جانارمايدى (وپتوم) بۇرىنعىدان ەكى ەسەگە قىمبات ساتىپ الادى. تيىسىنشە بولشەك ساۋداعا قىمباتتاتىلعان تاريفتەر بويىنشا شىعارادى.

سونىمەن قارا مۇنايدىڭ ۇستىندە قاسىق جالاپ وتىرعان قازاقستان ەكونوميكاسى ءۇشىن وسى جولعى داعدارىس ءبىراز دۇربەلەڭ تۋدىرعانى راس. تەڭگەنىڭ قۇنى تيىنعا پارا-پار كەلىپ، قارجىلىق قيىندىق قوس وكپەدەن العاندا، قازاقستاندا قىمباتتاماعان زات قالمادى. كەيبىر تاۋارلاردىڭ باعاسىن  ءماسىموۆ ۇكىمەتى ءوزى كوتەردى (نان، جانارماي). ال ازىق-تۇلىك باعاسىن رەتتەۋدە قۇزىرلى مەكەمەدەگىلەر قاۋقارسىزدىق تانىتىپ وتىر.

ۇكىمەت قاۋلىسى بويىنشا جانارماي باعاسىنىڭ قىمباتتاۋىنا قانداي نەگىز بار؟

بۇل سۇراققا قر مۇناي جانە گاز ءمينيسترى ۇزاقباي قارابالين مىرزا تۇسىنىك بەرگەن.

مينيستر «ەلىمىزدەگى جانارماي وندىرۋمەن اينالىساتىن ءۇش زاۋىت ىشكى نارىقتى تولىق قامتاماسىز ەتۋگە قاۋقارسىز. سوندىقتان قازاقستان تاراپى رەسەيدەن جىلىنا 900 مىڭ تونناداي جانارماي ساتىپ الۋعا ءماجبۇرمىز. بەنزيننىڭ كۇرت قىمباتتاۋى دا وسىمەن بايلانىستى. سەبەبى قازاقستان تۇتىناتىن جوعارى وكتاندى جانارمايدىڭ 40 پايىزى رەسەيلىك ءونىم. جانارماي باعاسىن وسىرۋگە باسەكەلەستىكتى قورعاۋ اگەنتتىگى رۇقسات بەرگەن. اگەنتتىك جانارمايدىڭ بۇل ءتۇرىن كوكتەمنەن بەرى رەسپۋبليكا بويىنشا ءبىر دەڭگەيدە ۇستاپ كەلگەن، - دەيدى ۆەدمستۆو باسشىسى.

نۇرگەلدى ابدىعانيۇلى

Abai.kz