كاسىپقوي بوكسشى قانات يسلام ءوزىنىڭ سپورتتىق كارەراسىنداعى 20-شى تازا جەڭىسىنە قول جەتكىزگەنى تۋرالى شەتەلدىك باق جاپپاي حابارلاپ جاتىر.    

قاناتتىڭ بۇل جولعى قارسىلاسى دومينيكان رەسپۋبليكاسىنىڭ وكىلى - 31 جاستاعى بوكسشى دجوناتان باتيستا بولدى. اقش-تىڭ مايامي قالاسىندا وتكەن جەكپە-جەك ءبىرىنشى راۋندتا-اق مارەسىنە جەتىپ، جەرلەسىمىز قانات يسلام قارسىلاسىن نوكۋاتپەن جەڭگەن بولاتىن.  

ال دومينيكاندىق بوكسشى وسىعان دەيىن 23 كەزدەسۋ وتكىزىپ، 8 رەت جەڭىلىس تاپقان. 

الايدا كاسىپقوي بوكسشى قانات يسلامنىڭ جەكپە-جەگىن وتاندىق تەلەارنالاردىڭ بىردە-ءبىرءى كورسەتكەن جوق.  بۇل جايت ءوز كەزەگىندە «abai.kz» پورتالى مەن الەۋمەتتىك جەلى قولدانۋشىلارى اراسىندا  قىزۋ پىكىر-تالاس تۋدىردى.

قاناتتىڭ كەزەكتى جەڭىسىنەن كەيىنگى تۇيىندەلگەن توتە سۇراق – قازاقستاندىق بوكسشى گەننادي گولوۆكيننىڭ جەكپە-جەكتەرىن ۇزدىكسىز ناسيحاتتاپ كەلگەن  قازاقستان ۇلتتىق ارناسى مەن ونىڭ جانىنان اشىلعان KazSport ارناسى قاناتتىڭ باتيستامەن جەكپە-جەگىن نەگە كورسەتپەدى دەگەنگە سايادى.

وسى ساۋالعا جاۋاپ ىزدەپ «abai.kz» پورتالىنىڭ ءتىلشىسى KazSport ارناسىنىڭ باسشىلىعىنا حابارلاسقان ەدى. تەلەفون تۇتقاسىن العان حاتشى قىز ءسىزدىڭ سۇراعىڭىزعا باس رەداكتور اسحات مىرزا جاۋاپ بەرەدى دەپ،  سپورتتىق ارنانىڭ رەداكتورى اسحات مىرزاعا جالعادى.

«كەشىرىڭىز، ءسىزدىڭ سۇراعىڭىزدى جاقسى ءتۇسىنىپ وتىرمىن. بىراق بۇل سۇراققا مەن جاۋاپ بەرە المايمىن. باسشىلىققا نەمەسە ءباسپاسوز ورتالىعىنا حابارلاسىڭىز. ءسىز رەسمي باق اتىنان حابارلاسىپ تۇرعان سوڭ، مەن قانداي دا ءبىر اقپاراتتى باسشىلىقپەن اقىلداسپاي تاراتا المايمىن. ال دوس رەتىندە نەمەسە تانىس رەتىندە مەن سىزگە ءوز بىلەتىنىمدى ايتار بولسام، ونىڭ باسپاسوزگە تارالىپ كەتپەۋىنە ەشكىم كەپىل بولا المايدى. سوندىقتان، سىزگە ءباسپاسوز ورتالىعىنداعىلار جاۋاپ بەرسىن»،-دەپ ءباسپاسوز ورتىلىعىنىڭ تەلەفون نومەرلەرىن بەردى.  باس رەداكتور مىرزا بەرگەن نومەرلەرگە قانشا حابارلاسقانىمىزبەن، ونداعىلاردان جاۋاپ بولمادى.

اسحات مىرزانىڭ ايتقانىنان ۇققانىمىز، بوكسشى قانات يسلامنىڭ جەكپە-جەكتەرىن وتاندىق ارنالاردان ناسيحاتتاۋعا بەلگىسىز ءبىر كەدەرگىلەردىڭ بار ەكەنى راس. سوندا قاناتتىڭ جەڭىسىمەن، قازاقتىڭ جەڭىسىمەن بولىسە الماسا، KazSport نە ماقساتتا اشىلدى؟ بۇل سۇراقتىڭ جاۋابىن ىندەتە ءتۇسۋ ءۇشىن بەلگىلى سپورت ءجۋرناليسى رۋسلان مەدەلبەككە حابارلاستىق.

رۋسلان مەدەلبەك، سپورت ءجۋرناليستى:

-قانات يسلامنىڭ جەكپە-جەكتەرى بىردە-ءبىر بوكس تەلەارناسىنىڭ ترانسلياتسياسىنا كىرمەيدى. سەبەبى بۇل جەكپە-جەكتىڭ دەڭگەيى تومەن. ال حالىقارالىق HBO, Showtime سياقتى بوكس ترانسلياتسياسىن تاراتاتىن ارنالاردا كورسەتىلمەگەن بوكس كەشىن قازاقستاندىق، رەسەيلىك ءتىتپى شەتەلدىك تەلەارنالار دا كورسەتۋگە مۇمكىندىكتەرى جوق. ال قازسپورت نەمەسە حابار بۇل جەكپە-جەكتى كورسەتۋ ءۇشىن اقش-قا ارنايى تەحنيكا، جىلجىمالى تەلەستۋديا (پتس) اپارۋى كەرەك. قازاقستاننان اقش-قا قانات يسلام ءۇشىن پتس اپارۋ ميعا سىيمايدى. ەشبىر تەلەارنا مۇنداي تاۋەكەلگە بارمايدى. سوندىقتان تەلەارنالاردى، ولاردىڭ باسشىلىقتارىن كىنالاۋعا بولمايدى. قانات يسلامنىڭ كەزدەسۋلەرىن قازاقستان تەلەارنالارى كورسەتۋ ءۇشىن ونىڭ پروۋموۋتەرى جۇمىس ىستەۋ كەرەك. قانات يسلامنىڭ سوڭعى جەڭگەن قارسىلاسى ونىڭ ەڭ ءالسىز قارسىلاستارىنىڭ ءبىرى.

ءتۇيىن: قازاقستاندىق بوكسشى قانات يسلامنىڭ كەزەكتى جەكپە-جەگى تۋرالى abai.kz پورتالى ءسۇيىنشى سۇراعان بولاتىن (http://abai.kz/post/view?id=5377). وسىدان كەيىن سايتىمىزدىڭ وقىرماندارى قانات يسلامنىڭ جەكپە-جەكتەرىن وتىندىق ارنالار نەگە كورسەتپەيدى دەگەن ءۋاج كەلتىرگەن ەدى. وقىرمان ۋاجىنە جاۋاپ ىزدەپ سپورتتىق ارنا – KazSport-قا حابارلاسقاندا العان جاۋابىمىز جوعارىداعىداي بولدى. وسى رەتتە ەسكەرە كەتەتىن ءبىر ماسەلە – گولوۆكين مەن يسلام قازاقستاندىق بوكستىڭ ساڭلاقتارى ەكەنى راس. ەگەر اتالعان ارنا قانات يسلامنىڭ جەكپە-جەكتەرىن كورسەتۋ ءۇشىن ترانسلياتسيانى ساتىپ الۋعا قاراجاتتارى جوق بولسا نەمەسە كەلىسىم شارتتار بويىنشا قاندايدا ءبىر كەدەرگىلەر تۋىنداسا، وسىعان قاتىستى جۇرتتى شۋلاتپاي شۇعىل تۇسىنىكتەمە بەرۋى ءتيىس ەدى. الايدا ارنا قىزمەتكەرلەرى مەن باسشىلىعى قانات يسلامنىڭ جەكپە-جەگىن كورسەتپەۋىنە بايلانىستى سۇراعىمىزعا ارنايى حات جازىپ، ساۋال جولداعاننان كەيىن عانا، قاراپ، تالقىلاپ، ويلانىپ-تولعانىپ بارىپ جاۋاپ بەرەتىندىكتەرىن جەتكىزدى. باسشىلىقتاعى اسحات ەسىمدى رەداكتوردىڭ ايتقانىنداي-اق، قاناتتىڭ جەكپە-جەگىن كورسەتۋگە كەلىسىمشارتتىق كەدەرگىلەردەن وزگە دە سەبەپتەردىڭ بولۋى مۇمكىن. تەك بۇل قانداي سەبەپتەر ەكەنىن ايتۋعا ارنا باسشىلىعىنىڭ  ءداتى جەتپەگەنى وكىنىشتى.

نۇرگەلدى ابدىعانيۇلى

اbai.kz