باسىنا تۇسپەگەن ادام قايتا قارجىلاندىرۋ (رەفينانسيروۆانيە), يپوتەكالىق قارىز دەگەندەردى بىلە بەرمەيدى، ءتىپتى بىلگىسى دە كەلمەيدى. ال وسىلاردىڭ زاردابى باسىندا جۇرگەن قانشاما وتانداستارىمىزدىڭ شىرىلداپ بارماعان جەرى، باسپاعان تاۋى جوق.

ولاردىڭ مۇڭىن تىڭداپ جاتقان وكىمەت جوق، قۇقىق قورعاۋ ورگاندارى مەن اكىمدەر پىسقىرمايدى دا، دەپۋتاتتار اراسىنان تەك ايقىن قوڭىروۆ قانا ولاردىڭ مۇڭىن جاقسى ءتۇسىنىپ، قولىنان كەلگەن كومەگىن جاساپ ءجۇر.

ءماجىلىستىڭ سوڭعى پلەنارلىق وتىرىسىندا ول تاعى دا ۇلتتىق بانك توراعاسى ق.كەلىمبەتوۆكە دەپۋتاتتىق ساۋال جولداپ، مەملەكەت باسشىسى ن.نازارباەۆتىڭ 2015 جىلدىڭ 11 اقپانىندا وكىمەتتىڭ وتىرىسىندا بەرگەن ناقتى تاپسىرماسىنا سايكەس 2015 جىلدىڭ 31 جەلتوقسانىنا دەيىن ورىندالاتىن يپوتەكالىق تۇرعىن-ءۇي قارىزدارىن قايتا قارجىلاندىرۋ باعدارلاماسىن جاسالعانىن ايتتى. بىراق وسى باعدارلاما شالا پىسكەن قاۋىنداي بولىپ، جۇرتتىڭ ءىشىن بۇزىپ ءجۇر ەمەس پە؟ اتاپ ايتقاندا «استانا – فينانس يپوتەكا» اق ۇيىمىنىڭ مىندەتكەرلىگىن بىرەۋگە تاپسىرۋ انىقتالماعان، باعدارلاماعا ەنگىزىلمەگەن باسقا بانكتەردىڭ الدىندا يپوتەكالىق قارىزى بار بورىشكەرلەردىڭ ماسەلەسى دە قاراستىرىلماعان. جەكەمەنشىك ءۇيىنىڭ اۋماعى 120 شارشى مەتردەن اساتىن بورىشكەرلەردىڭ ماسەلەسى دە «ۇمىت» قالعان. سونىمەن قاتار باعدارلامانى جاساۋ بارىسىندا بورىشكەرلەردىڭ ناقتى قانداي قۇجاتتار ۇسىناتىندىعى ناقتىلانباعان، سونى سىلتاۋراتىپ بانكتەر بورىشكەرلەردەن نەشەتۇرلى قاجەتتى-قاجەتسىز قۇجاتتاردى تالاپ ەتۋدە. سايىپ كەلگەندە ول بورىشكەرلەردى قارىزدىڭ قامىتىنا باتىرا تۇسەتىن جاعداي تۋعىزۋدا. مىنە، وسىندايلاردىڭ كەسىرىنەن 25 مىڭنان ارتىق بورىشكەردىڭ 9 مىڭدايى عانا باعدارلاماعا قاتىسا الىپ وتىر. ولاردىڭ دا تەك 5 مىڭىنىڭ قۇجاتتارى وندىرىسكە الىندى. وسىنىڭ ءبارى حالىقتىڭ نارازىلىعىن تۋدىرىپ، پرەزيدەنتتىڭ تاپسىرماسىنىڭ ورىندالاتىندىعىنا كۇمان كەلتىرۋدە. سوندىقتان، - دەيدى دەپۋتات ا.قوڭىروۆ، باعدارلامانىڭ ورىندالۋ مەرزىمىن 2016 جىلدىڭ 31 جەلتوقسانىنا دەيىن ۇزارتىپ، ايتىلعان ماسەلەلەردى جەتىلدىرۋىڭىزدى وتىنەمىن. بۇل تىلەكتى ماجىلىستەگى كوممۋنيستەر فراكتسياسىنىڭ ءبارى دە قولدادى، تەك ەندى كەلىمبەتوۆ مىرزا قولدار ما ەكەن؟ گاپ سوندا.             

سەرىك  ەلەۋ، ساراپشى

Abai.kz