20 قازاندا قاراعاندى وبلىستىق سوتىندا ەكس-پرەمەر-مينيستر سەرىك احمەتوۆكە جانە باسقا دا جوعارى لاۋازىمدى تۇلعالارعا قاتىستى قىلمىستىق ءىس بويىنشا كۋاگەرلەردەن جاۋاپ الۋ جالعاستى. كۋاگەر رەتىندە سوتتا جاۋاپ بەرگەن ايىپتالۋشىلاردىڭ ءبىرى احمەتوۆتەردىڭ «اراب كومپانيالارىنا» اقشا اۋدارۋدى باس كەيىپكەردىڭ ۇلى – دانيار احمەتوۆ جەتكىزگەنىن حابارلادى.

سوت وتىرىسىندا قاراعاندى قالاسىنداعى كاناليزاتسيالىق تازالاۋ جۇيەسىنىڭ قۇرىلىسىنا قاتىستى وقيعا قارالدى. وسىعان وراي سوتقا تۇسىنىك بەرگەن «قازاقستاندىق ونەركاسىپتىك كورپوراتسيا» جشس-ءنىڭ باس ديرەكتورىنىڭ بۇرىنعى ورىنباسارى ءالجان اقمولداەۆ بيۋدجەتتىڭ اقشاسىن «قاراعاندىشا» جىمقىرۋ جۇيەسىنىڭ سىزباسىن جاريالادى.

ول سەرىك احمەتوۆتىڭ وبلىس اكىمى قىزمەتىن اتقارعان كەزىندە كاناليزاتسيالىق تازالاۋ جۇيەسىن سالۋعا قاتىستى مەردىگەرلەردى انىقتاۋ، جابدىقتاردى جەتكىزۋ جانە تەحنولوگيالاردى قولدانۋعا قاتىستى ماسەلەلەردى تىكەلەي ءوزى قاراپ، ماقۇلداپ وتىرعانىن مالىمدەدى. جانە ءوزىنىڭ ەكس-پرەمەر-مينيسترمەن كەزدەسۋلەرى قالاي، قاي جەردە وتكەنىن ەگجەي-تەگجەيلى بايانداپ بەردى. سوتقا دەيىنگى تەرگەۋدىڭ نۇسقاسى بويىنشا، س.احمەتوۆ قاراعاندىداعى «مەتاللۋرگيا-مەتال وڭدەۋ» يندۋستريالدىق پاركىن سالۋعا ارنالعان بيۋدجەتتىڭ ميللياردتارىنىڭ ءىزىن جاسىرۋ سىزباسىن جاساعان. «العاشقى كەزدەسۋىمىزدە ول ماعان يندۋستريالىق پاركتىڭ ينفراقۇرىلىمى قۇرىلىسىنىڭ جوباسىنا ەنگەن جۇمىستاردىڭ ءبىر بولىگىن قوسالقى مەردىگەرلىككە الۋدى ۇسىندى. سەبەبى مەن ينفراقۇرىلىم قۇرىلىسىمەن كاسىبي اينالىساتىن كومپانيانىڭ وكىلى ەدىم. ۇسىنىسقا كەلىسە كەتتىم. ءسويتىپ، يندۋستريالىق پاركتى جاڭارتۋعا بولىنگەن 15-16 ملرد. تەڭگەنىڭ 5 ملرد-ى قوسالقى مەردىگەرلىكپەن اينالىساتىن ۇيىمنىڭ ەنشىسىنە ءتيدى. سول كەزدەسۋدە سەرىك نىعمەتۇلى ماعان ء«وز ادامىنىڭ» حابارلاساتىنىن ايتتى» دەپ ەسكە الدى وقيعانى ءا.اقمولداەۆ.

ودان ارىدە دانيار احمەتوۆپەن قالاي تانىسقانىن، ونىڭ قانداي ۇسىنىس جاساعانىن، كەيىنىرەك دانياردىڭ س.احمەتوۆتىڭ ۇلى ەكەنىن قالاي بىلگەنىن ءتۇسىندىرىپ بەردى. بۇل وقيعا جونىندە: «بىردە ءوزىمنىڭ باستىعىمنىڭ بالاسى بىرىككەن اراب امىرلىكتەرىندە ۇيلەنۋ تويىن وتكىزدى. سول تويدا كۇتپەگەن جەردەن دانياردى كوردىم. جانىمداعى ادامداردان سۇراعانىمدا ول س.احمەتوۆتىڭ ۇلى ەكەنىن ايتتى» دەدى ول. كەيىننەن دانيار ءالجان مەن اكەسىنىڭ اراسىنداعى دەلدال ءرولىن اتقارادى. اقمولداەۆ كىشى-احمەتوۆتىڭ ءوتىنىشى بويىنشا نىساننىڭ قۇرىلىسىنا قاتىسۋعا رۇقسات الۋ ءۇشىن «اراب كومپانيالارىنىڭ» شوتىنا سىياقى رەتىندە اسا ءىرى كولەمدەگى سومانى اۋدارادى. «بىراق مۇنداي اقشانى قايدان تابامىن؟ سودان سوڭ باس مەردىگەر دۋمان نۇرباەۆ (ول سول كەزدە «ەكو ترەتمەنت سيستەم»، «ساپا پروجەكت گرۋپپ» كومپانيالارىنىڭ جەتەكشىسى بولعان ) ەكەۋمىز ەكونوميكالىق ۇسىنىس ويلاپ تاپتىق. مەن الداعى ۋاقىتتا 300 ملن. تەڭگەمدى قايتارىپ الۋ ءۇشىن، يندۋستريالىق پاركتىڭ شارۋاشىلىق-تۇرمىستىق سۋاعارىن تازالايتىن جابدىقتاردىڭ قۇنىن اسىرىپ كورسەتۋدى ۇسىندىم. ول كەلىستى. ەشقانداي تۇسىنبەستىك بولعان جوق»، - دەدى سوتتا «قازاقستاندىق ونەركاسىپتىك كورپوراتسيا» جشس-ءنىڭ باس ديرەكتورىنىڭ ەكس-ورىنباسارى.

ايىپتالۋشى سونداي-اق، «ەكو ترەتمەنت سيستەم» كومپانياسىنىڭ سول كەزەڭدە اتالعان قۇرىلىستا ۇلكەن تاجىريبەسى بار ۇزدىك وتاندىق كومپانيا ەكەنىن اتاپ ايتتى. ءا. اقمولداەۆتىڭ ايتۋىنشا، د. نۇرباەۆ نىساننىڭ قۇرىلىسىن الدىن-الا ەسەپتەپ، ونىڭ جالپى قۇنىن 1,6 ملرد. تەڭگەگە باعالاعان. 330 ملن. تەڭگەسى قۇرىلىس-مونتاجداۋ جۇمىستارىنا، ال 1,286 ملرد. تەڭگەسى جابدىقتاردى ساتىپ الۋعا جۇمسالۋى ءتيىس بولعان.  اقمولداەۆ بولسا س.احمەتوۆكە پارا بەرۋدى ەسكەرىپ، د.نۇرباەۆقا جابدىقتاردىڭ قۇنىن 300 ملن. تەڭگەگە ۇلعايتۋعا ۇسىنىس ايتادى. كەيىنىرەك، بۇل اقشانى قايتارىپ الۋعا ءتيىستى ەكەنىن دە ەسكەرتەدى.

سوت پروتسەسىندە ءا.اقمولداەۆتىڭ جاۋابىن تىڭداعان سەرىك احمەتوۆ ونىمەن ءوزىنىڭ تانىستىعىن جوققا شىعاردى.

ءامينا باكىر

Abai.kz