ەستىمەگەن ەلدە كوپ دەگەن. سەناتور لاززات تۇرلاشوۆ و دۇنيەگە حات جولداپتى. ناقتىراق ايتساق، سەنات دەپۋتاتى 2009 جىلى دۇنيەدەن وزعان بەلگىلى اقىن ەركىن ىبىتانوۆتى 80 جاسىمەن قۇتتىقتاپ، حات جولداعان ەكەن. بۇل تۋرالى فەيسبۋك الەۋمەتتىك جەلىسىندە تانىمال جۋرناليست ەرىك راحىم جاريالادى.

«سەنەسىز بە، سەنبەيسىز بە، پاتشا كوڭىلىڭىز ءبىلسىن. ەستىگەنىمدى ەمەس، كورگەنىمدى ايتايىن: سەناتور لاززات تۇرلاشوۆ بۇ دۇنيەدەن و دۇنيەگە حات جولدادى. سەناتور جاقىندا 80 جىلدىق مەرەيتويى قاراسازدا اتالىپ وتكەن ەركىن اعامىزدى «شىن جۇرەكتەن قۇتتىقتاي وتىرىپ، زور دەنساۋلىق، ۇزاق عۇمىر» تىلەدى. ەندى ول الگى حاتىن كىمنەن بەرىپ جىبەرسەم ەكەن دەپ باس قاتىرىپ ءجۇر دەسەدى. بالكىم، كەيىنىرەك ءوز قولىمەن تابىس ەتەر… كۇلەيىن بە، جىلايىن با؟!»، — دەپ جازدى ول ءوز جازباسىندا.

حاتتىڭ تولىق نۇسقاسى مىناۋ:

قۇرمەتتى ەركىن ءجۇمادىلۇلى

ءسىزدىڭ «80 جاس» مەرەي تويىڭىزعا وراي، شىن جۇرەكتەن قۇتتىقتاۋلارىمدى قابىل الىڭىز!

قامقورلىقتى، ادامگەرشىلىك پەن ادالدىقتى، ومىرلىك قاسيەت تۇتقان ءوزىڭىزدى ايىن-تۋىس پەن ەل-جۇرتىڭىز ءاردايىم قۇرمەتتەۋدە، ادامگەرشىلىك اسىل قاسيەتىڭىز، جايساڭ مىنەزىڭىز ءسىزدىڭ نۇر تۇلعاڭىزدى ودان ءارى بيىكتەتسە، ۇزاق جىلعى جەمىستى ەڭبەگىڭىز ۇلكەن ابىروي-اتاققا كەنەلتىپ وتىر.

ونەر مايتالماندارىن تاڭ-تاماشا قالدىرىپ، شىعارمالارىڭىز ونەر ورتاسىنان ويىپ تۇرىپ ءوز ورنىڭىزدى الا ءبىلدىڭىز. قانداي بيىكتەردەن كورسەڭىز دە ارتتارىڭىزدا ءسىزدى قولداۋشى ءارى ماقتان ەتۋشى ەلىڭىز بار.

ارايلى ءار تاڭ شاڭىراعىڭىزعا شاتتىق سىيلاسىن. وسى باعىڭىز باياندى بولىپ، شاڭىراعىڭىزدان شاتتىق ارىلماي، جادىرىپ كۇلىپ جۇزگە دە جەتىڭىز دەپ تىلەيمىن.

ءسىزدى تاعى دا شىن جۇرەكتەن قۇتتىقتاي وتىرىپ، سىزگە زور دەنساۋلىق، ۇزىق عۇمىر، وتباسىڭىزعا باق-بەرەكە تىلەيمىن.

ىزگى نيەتپەن، قازاقستان رەسپۋبليكاسى پارلامەنتى سەناتىنىڭ دەپۋتاتى لاززات ماحاتۇلى تۇرلاشوۆ

Ult.kz

ءتۇپ-نۇسقاداعى تاقىرىپ: سەناتوردىڭ و دۇنيەگە حاتى