حالىقارالىق اۋىر اتلەتيكا فەدەراتسياسى (IWF) قازاقستانعا 50 مىڭ دوللار كولەمىندە ايىپپۇل سالدى. وسىعان دەيىن بۇقارالىق اقپارات قۇرالدارىندا قازاقستاندىق اۋىر اتلەتتەر دوپينگ قولداندى دەگەن كۇدىككە ىلىنگەندىگى تۋرالى ايتىلعان بولاتىن. بۇل تۋرالى «abai.kz» پورتالى  Azerisport.com سايتىنا سىلتەمە جاساي وتىرىپ حابارلايدى.

حالىقارالىق اۋىر اتلەتيكا فەدەراتسياسى (IWF) ايىپپۇلدارداردى كۇدىكتى سپورتشىلاردىڭ سانىنا قاتىستى ەسەپتەگەن. اقش-تىڭ حيۋستون قالاسىندا وتكەن الەم چەمپيوناتىندا جارىس ەرەجەسىن بۇزىپ، دوپينگ قولداندى دەگەن ايىپ ازىربايجاندىق 6 اتلەتكە، رەسەيلىك 4 اتلەتكە، قازاقستان، مولداۆا جانە كحدر-دان 9 سپورتشىعا تاعىلعان بولاتىن.

حالىقارالىق اۋىر اتلەتيكا فەدەراتسياسى (IWF) ازىربايجانعا 200 مىڭ دوللار، رەسەيگە 100 مىڭ، قازاقستان، مولدوۆا جانە كحدر-عا 50 مىڭ دوللاردان ايىپپۇل سالعان.

فەدەراتسيا تالاپتارى بويىنشا، اتالعان مەملەكەتتەر جارىس ەرەجەسىن ورەسكەل بۇزعانى ءۇشىن سانىلعان ايىپپۇلدى تولەمەسە، 2016 جىلى ريو-دا وتەتىن وليمپيادا ويىندارىنا بەرىلگەن وليمپيادالىق ليتسەنزيادان ايىرىلادى.

ەستەرىڭىزگە سالا كەتەيىك، وسىنىڭ الدىندا حالىقارالىق اۋىر اتلەتيكا فەدەراتسياسى (IWF) تاراپىنان قازاقستاندىق ءۇش سپورتشىعا الەم چەمپيوناتىندا جارىس ەرەجەسىن بۇزىپ، دوپينگ قولداندى دەگەن ايىپ تاعىلعان. ولار:  حيۋستون چەمپيوناتىنىڭ كۇمىس جۇلدەگەرى – الماس وتەشوۆ، قولا جۇلدەگەر – جاسۇلان قىدىرباەۆ پەن ەرمەك ءومىرتاي.

وسىعان بايلانىستى ءبىز قازاقستاندىق سپورت جۋرناليستەرىنىڭ جانە مامانداردىڭ پىكىرىن بىلگەن بولاتىنبىز.

رۋسلان مەدەلبەك، سپورت ءجۋرناليستى:

- دوپينگ ءىزى تابىلدى. دەمەك، قازاقستانعا ايىپپۇل سالىنادى. قازاقستان دوپينگ ەرەجەسىن بۇزدى. سپورتشىنىڭ كۇدىككە ءىلىنۋىنىڭ ءوزى دوپينگ ەرەجەسىن بۇزۋ بولىپ سانالادى. ال قازاقستان الداعى ۋاقىتتا قالايدا سپورتشىلارىنىڭ تازا ەكەنىن دالەلدەۋى قاجەت. بىراق بۇل وتە قيىن جاعداي. قالاي بولعاندا دا حالىقارالىق اۋىر اتلەتيكا فەدەراتسياسى "قازاقستاننىڭ ءۇش سپورتشىسى دوپينگ قولداندى" دەگەن كۇدىكتىلەر تىزىمىنە ەنگىزدى. تىزىمگە ەنۋدىڭ وزىنە ايىپپۇل سالىندى. دوپينگتىڭ ەكىنشى تەكسەرىسىنىڭ قورىتىندىسىن شىعارۋعا شامامەن 2-3 اي كەرەك. ول بىردەن شىعا سالمايدى. سپورتشىلار مەن قازاقستان اۋىر اتلەتيكا فەدەراتسياسى ء"بىز تازامىز" دەيدى، ال حالىقارالىق اۋىر اتلەتيكا فەدەراتسياسى ءوز شەشىمىنەن تايمايدى. ناقتى شەشىمدى ەكىنشى تەكسەرىستەن كەيىن الامىز. ول شەشىم قازاقستان سپورتشىلارىنىڭ دوپينگ قولدانعانىن دالەلدەسە وندا وعان كونۋگە تۋرا كەلەدى. ال تازا شىقسا وندا الماس وتەشوۆ پەن جاسۇلان قىدىرباەۆ ريودا التىن مەن كۇمىستى ەشكىمگە بەرمەيدى. بارلىعى قازاقستان ءۇشىن ءساتتى اياقتالادى دەپ ۇمىتتەنەيىك

الەكسەي ني، اۋىر اتلەتيكادان قازاقستان قۇراماسىنىڭ باس باپكەرى:

- بۇل جىگىتتەر اۋىر اتلەتيكاعا كەشە عانا كەلە سالعان ادامدار ەمەس. قىدىرباەۆ الەم چەمپيونى بولدى. وتەشوۆ جىل سايىن كۇمىس مەدال الىپ كەلەدى. مىسالى، ازيا ويىندارى مەن الەم چەمپيوناتىندا ەكى رەت كۇمىس الدى. بۇلار جوعارعى كلاستى سپورتشىلار. اقىلعا سىيمايتىن دۇنيە. حيۋستونعا سپورتشىلارىمىزدى دوپينگپەن دايىندايتىنداي اقىماق ەمەسپىز. بۇل جىگىتتەر ريو وليمپياداسىندا التىن مەن كۇمىستى ءوزارا ساراپقا سالاتىن ەدى. وسىلايشا، قازاقتان تۇڭعىش وليمپيادا چەمپيونى شىعاتىن ەدى. بىزگە قارسى قاساقانا جاسالىپ وتىر. ساراپتامانى چەمپيونات وتكەن اقش-تا ەمەس، كەلدەگى زەرتحانادا جاساۋى ءتيىس. ءبىز دە ءوز مۇددەمىزدى قورعايمىز. ءالى شەشىم شىققان جوق. اقىرعى شەشىمدى فەدەراتسيا ايتادى. مەن قايتالاپ ايتامىن. بۇل جەردە قادىرباەۆ پەن وتەشوۆ جەۋگە بولمايتىن نارسەنى جەپ قويدى دەگەن اقىلعا سىيىمسىز. بۇندا ساياسات جاتىر. ءبىزدىڭ سپورتشىلار ريو وليمپياداسىنىڭ باستى فاۆوريتتەرى. ولاردىڭ جولىن كەسۋ كىمدەرگە ءتيىمدى؟ بارىنە. حيۋستونداعى چەمپيوناتتىڭ الدىندا كوپ سوزدەر ايتىلدى. الەم چەمپيوناتىنا رەسەي مەن قازاقستان سپورتشىلارى كەلمەيدى دەدى. سەبەبى، دوپينگ زەرتتەۋدى اقش ماماندارى جاسايدى. ولاردىڭ ساياسي ۇستانىمدارى سايكەس كەلمەيدى. سوندىقتان رەسەي مەن قازاقستان چەمپيوناتتان باس تارتتى دەگەن سوزدەر كوپ ايتىلدى. مەنىڭ پىكىرىم – بۇل قاستاندىق. ءبىز قانشا جىلدان بەرى قازاق ۇلتىنان تۇڭعىش چەمپيون ازىرلەۋ ءۇشىن تەر توكتىك.  قىدىرباەۆ تۇڭعىش الەم چەمپيونى بولدى. ەندى وليمپيادا چەمپيونى بولاتىن قوس بىردەي سپورتشىمىز – الماس پەن جاسۇلاننىڭ جولىن كەسىپ وتىر. ءبىز ءالى ءوز مۇددەمىزدى قورعايمىز. بۇل جىگىتتەرگە قيانات جاساۋعا بولمايدى.

نۇرگەلدى ابدىعانيۇلى

Abai.kz