ءبىزدىڭ جاڭا جىل 22-ناۋرىز دەپ قانشا داليساق تا جەلتوقساننىڭ سوڭعى كۇنى جىلدى قورتىندىلاپ، ارتتا قالعان ۋاقىتتى وي ەلەگىنەن وتكىزىپ، وزىمىزشە ەسەپ بەرىپ، جىلدى قورىتىندىلاپ جاتامىز.

ەگەر، وتكەن 2015-جىلدى قورىتىندىلاپ، وسى جىل نەسىمەن ەستە قالدى دەسەك، جەكە مەن ءۇشىن ەستە قالار جاعدايلار مەن وقيعالار از بولماعان سياقتى.

سونىمەن، 2015-جىل مەن ءۇشىن نەسىمەن ەستە قالدى؟

بۇل جىلدىڭ  باسى ءتۇرلى كريزيستەردىڭ العاشقى قارلىعاشتارىنىڭ كەلۋىمەن باستالدى دەۋگە بولادى. ونىڭ ءبىر كورىنىسى، ءساۋىردىڭ باسىندا 100-120 نەسيە العان بورىشكەرلەر پرەزيدەنتتىككە ۇمىتكەر نۇرسۇلتان نازارباەۆپەن كەزدەسۋ ءۇشىن استانانىڭ قاق تورىندە، پارلامەنت پەن ۇكىمەت ءۇيىنىڭ الدىندا كۇننىڭ سۋىعىنا، جاۋىن-شاشىن، بوران-بۇرقاسىنعا قاراماي 17 كۇن الاڭدا تۇرعان ەدى. ولاردى استانالىق بەلسەندىلەر سوڭىنا دەيىن قولداپ، ىستىق تاماق ۇيىمداستىرىپ، ءۇن قوسىپ باقتى. بىراق، وكىنىشكە قاراي «ۇمىتكەر» ءوزىنىڭ سايلاۋشىلارىمەن كەزدەسۋدى قاجەت دەپ تاپپادى.

ادەتتەگىدەي ايبىندى پوليتسيا الاڭعا شىققان حالىققا قىسىم كورسەتىپ، تاماق ىشكىزبەۋگە، اجەتحاناعا بارعىزباۋعا تىرىسىپ باقتى. ءبىر دوربا پيروجكيدى الاڭدا تۇرعاندارعا جەتكىزۋ ءبىز ءۇشىن ۇلكەن قيىندىق تۋعىزدى. سول ءساتتى الەۋمەتتىك جەلىدە «10 پيروجكي» وپەراتسياسى دەپ بەلگىلەپپىن. 

ودان كەيىن استانالىقتاردىڭ پرەزيدەنتتىككە ۇمىتكەر ءۋاليحان قايساروۆ پەن جارىلقاپ قالىبايدىڭ كانديداتۋراسىن قولداۋىن ەسكە تۇسىرمەي بولمايدى. سەبەبى، قازاقستان حالقى اسسامبلەياسىنىڭ ۇسىنىسىمەنت كەزەكتى كەزەكتەن تىس پرەزيدەنت سايلاۋىندا ءوز ۇمىتكەرىمىزدى ۇسىنىپ، قولداپ، بايگەگە قوسۋ ءبىز ءۇشىن ءارى ۇلكەن سىن، ءارى تاجريبە بولدى. بىراق، دەموكراتيالىق قازاقستاننىڭ سايلاۋ زاڭىنداعى ءتۇرلى قۇيتىرقىلار بيلىك قالاماعان ۇمىتكەردىڭ اتىنىڭ وزۋى مۇلدە مۇمكىن ەمەس ەكەنىن كورسەتتى. ناتيجەسىندە، ءساۋىردىڭ سوڭىندا كەزەكتەن تىس سايلاۋدا 97,75 % حالىقتىڭ داۋسىن جيناپ، نۇرسۇلتان ءابىشۇلى كەزەكتى جەڭىسىنە جەتتى.   

مامىر ايى قازاق دالاسىن قان ساسىتقان 200 مىڭنان اسا كيىك پەن 90 مىڭنان اسا مالدىڭ قىرىلۋىمەن ەستە قالدى. كيىك، مال، بالىق، قۇس تاعى باسقا ءتىرى جان يەلەرى جاپپاي قىرىلىپ جاتقاندا العاشىندا بيلىك وعان ءمان دە بەرە قويعان جوق. ارتىنان شىعىن سانى 100 مىڭنان اسقاندا بارىپ قيمىلداي باستادى. ول كەزدە جەرگىلىكتى اكىمدەر مال شىعىنىن جاسىرىپ، ەلدىڭ اۋزىن جاۋىپ، ولگەن كيىكتى جاپپاي جەرلەپ جاتىر ەدى.

بيلىكتىڭ، مينيسترلەر مەن اكىمدەردىڭ، ءتىپتى پرەمەر-ءمينيستردىڭ ورىنباسارىنىڭ اۋزىنان شىندىقتىڭ شىناشاقتاي بولىگىن ەستي الماعان سوڭ «انتيگەپتيل» ازاماتتىق قوزعالىسى  «شىندىق ەكسپەديتسياسىن» جاساقتاپ، ونىڭ 5 مۇشەسى كيىكتەر جاپپاي قىرىلعان اقمولا، سولتۇستىك قازاقستان، قوستاناي جانە اقتوبە وبلىستارىن ارالاپ، كيىكتىڭ، مالدىڭ جاپپاي قىرىلۋ سەبەبىن انىقتاپ قايتقان-دى. ولار كيىكتىڭ، مالدىڭ جاپپاي قىرىلۋىنا گەپتيلدىڭ تىكەلەي قاتىسى بار دەپ مالىمدەدى. الايدا بيلىك قىرىلعان كيىك پەن مالدىڭ ءولۋ سەبەبىن گەپتيلدەن ىزدەۋدەن مۇلدە باس تارتتى. اقىرى، كيىك پەن مالدىڭ قىرىلۋ سەبەبى سول كۇيىنشە جۇمباق كۇيىندە قالدى. ۋلى گەپتيلدى توننالاپ كوگىپ جاتقان «پروتون» زىمىرانى ودان ءارى ۇشىپ جاتىر، رەسەيدىڭ 7 اسكەري-جاتتىعۋ پوليگوندارى ودان ءارى زىمىراندارىن گۇرسىلدەتىپ جارىپ جاتىر.

تامىز ايىندا تۇڭعىش رەت 17 مەملەكەتتىك ەمەس ۇيىم حالىقتى الەۋمەتتىك قورعاۋ مەن الەۋمەتتىك شيەلەنىستى بىرلەسە  شەشۋگە ۋاعدالاستى جانە ول تۋرالى مەموراندۋمعا قول قويدى. وسى شارادان كەيىن قوعام بەلسەندىلەرىنە بيلىك تاراپىنان قىسىم كۇشەيدى.

ودان ءارى ەستە قالعان نارسەلەر بيلىكتىڭ تەڭگە قۇنسىزدانبايدى دەپ حالىقتى الداۋى مەن ايتىپ ۇلگەرمەي تەڭگە قۇنىنىڭ قۇلدىراۋى، الەمدە مۇناي باعاسى قۇردىمعا قۇلدىراپ، بىراق قازاقستاندا بەنزيننىڭ باعاسىنىڭ ءوسۋى، تاعىسىن-تاعىلار ەلدىڭ ەسىندە كوپكە دەيىن ساقتالارى انىق.

سونىمەن بىرگە ەرمەك نارىمباەۆ، سەرىكجان مامبەتالين، بولاتبەك ءبلالوۆتىڭ قامالۋى مەن سوت وتىرىستارى بۇل جىلدىڭ ۇلكەن سوراقى وقيعاسى رەتىندە عانا ەمەس، تاريحتا قارا تاڭبا بولىپ قالاتىن جاعداي دەپ بىلەمىن. بۇعان باسقا دا بەلسەندىلەر مەن جۋرناليستەردىڭ جاساندى ايىپتاۋمەن قۋدالانۋىن قوسا ايتپاسقا بولمايدى.

بۇكىل جىلدى ءبىر سوزبەن قورىتىندىلاساق، بۇل جىل بيلىكتىڭ 100 قادام العا باسامىز دەگەن جوسپار جاساپ، 100 شاقىرىم كەرى كەتكەن جىلى بولدى.

ماقسات ءىلياسۇلى، قوعام قايراتكەرى

Abai.kz