ادىلەت مينيسترلىگى اقتاۋداعى قاتاڭ تارتىپتەگى تۇرمەدەن قاشقان 21 ادامنىڭ 8-ءى ۇستالدى دەپ حابارلادى. ىشكى ىستەر مينيسترلىگى كەمىندە التى قاشقىننىڭ اتىپ ولتىرىلگەنىن ايتىپ وتىر. ازىرگە بوستاندىقتا جۇرگەن قالعاندارىنا ىزدەۋ جاريالاندى.

ادىلەت مينيسترلىگى اقتاۋداعى قاتاڭ تارتىپتەگى تۇرمەدەن قاشقان 21 ادامنىڭ 8-ءى ۇستالدى دەپ حابارلادى. ىشكى ىستەر مينيسترلىگى كەمىندە التى قاشقىننىڭ اتىپ ولتىرىلگەنىن ايتىپ وتىر. ازىرگە بوستاندىقتا جۇرگەن قالعاندارىنا ىزدەۋ جاريالاندى.

ماۋسىمنىڭ 22-ءى كۇنى تاڭەرتەڭ ماڭعىستاۋ وبلىسى اقتاۋ قالاسىنداعى گم 172/1 قاتاڭ رەجيمدەگى قاماۋ مەكەمەسىنەن قاشقان 21 ادامنىڭ 8-ءى ۇستالدى، ولاردىڭ قاشۋىنا تۇرمە ماڭىنا ەكى كولىككە ءمىنىپ كەلگەن قارۋلى بەلگىسىز ادامدار بولىسقان دەپ حابارلادى ادىلەت مينيسترلىگىنىڭ وكىلى ەربولات ەرىمبەت سەيسەنبى كۇنى استانادا وتكەن بريفينگتە.
«قازا بولعاندار مەن جارالانعاندار دا بار. قاشقىنداردى بايقاپ قالعان №6656 اسكەري ءبولىمنىڭ ساربازى قارۋدان وق اتقان. وعان جاۋاپ رەتىندە تۇرمە ماڭىنا كەلگەن بەلگىسىز ادامدار وق اتىپ، سارباز جارالاندى»، - دەدى ەربولات ەرىمبەت.
الايدا مينيسترلىك وكىلى ناقتى قانشا ادام قازا تاۋىپ، قانشا ادامنىڭ جارالى بولعاندىعى تۋرالى اقپارات بەرە المايتىنىن ايتتى.
«قازىرگى ۋاقىتتا بۇل وقيعاعا قىلمىستىق اتقارۋ جۇيەسى كوميتەتى قىزمەتكەرلەرىنىڭ قاتىسى بار-جوعى تەكسەرىلىپ جاتىر»، - دەدى ەربولات ەرىمبەت.
ادىلەت مينيسترلىگى رەسمي وكىلىنىڭ سوزىنشە، بۇرىن-سوڭدى بۇل كولونيادا سوتتالعانداردىڭ جاپپاي قاشىپ كەتۋ وقيعاسى بولماعان. قازاقستان قىلمىستىق كودەكسى بويىنشا، قاماۋدان قاشىپ كەتكەن ازاماتتارعا نەگىزگى جازا مەرزىمىنە قوسىمشا تاعى جەتى جىلعا دەيىن جاڭا مەرزىم قوسىلۋى مۇمكىن.
ازاتتىق راديوسىنا اقتاۋداعى بۇل توتەنشە وقيعا كەزىندە وق ءتيىپ جارالانعان ەكى ادامنىڭ اۋرۋحانادا جاتقانى ءمالىم بولدى.
«ەكى ادام ءتۇستى. بىرەۋى - اسكەري سارباز، ەكىنشىسى - ىشكى ىستەر دەپارتامەنتى ارنايى توبىنىڭ قىزمەتكەرى. ءبىرىنىڭ وكپەسىنە وق تيگەن، وعان قازىر عانا وپەراتسيا جاساپ شىقتىق، ەندى ول جانساقتاۋ بولىمىندە جاتىر. ونىڭ جاعدايى وتە اۋىر. ال ەكىنشىسى - سول جاق جامباسىنان جارالانعان. ونىڭ جاعدايىن ورتاشا دەپ باعالاپ وتىرمىز، - دەدى ازاتتىققا تۇسىنىكتەمە بەرگەن ماڭعىستاۋ وبلىستىق اۋرۋحاناسى باس دارىگەرىنىڭ ورىنباسارى ماقسۇت سارقۇلوۆ.
سەيسەنبى كۇنى «ينتەرفاكس-قازاقستان» اگەنتتىگى ماڭعىستاۋ وبلىستىق سوت-ساراپتاما مەكەمەسىنە سىلتەمە جاساپ، اتىس سالدارىنان قازا بولعان 7 ادامنىڭ دەنەسى قالالىق مايىتحاناعا جەتكىزىلگەنىن حابارلادى.
سول كۇنى تۇستەن كەيىن قازاقستان ىشكى ىستەر مينيسترلىگىنىڭ سايتىندا اقتاۋداعى وقيعا جايىندا ءباسپاسوز حابارلاماسى جاريالاندى.
وندا قاماۋدان قاشقانداردى نىساناعا الىپ اتقان قاراۋىلدا تۇرعان ىشكى ىستەر اسكەرى ساربازىنىڭ وعىنا ىلىككەن ءۇش سوتتالعان ادام كوز جۇمعانى جانە ساربازدىڭ وزىنە قارسى قارۋدان وق اتىلىپ، ول جاراقات العانى ايتىلعان.
«قاراۋىلدىڭ ىزگە ءتۇسۋ توبى قاشقىنداردىڭ بىرىنە مەكەمەدەن 200 مەتر اراقاشىقتىقتان جاراقات كەلتىردى. قاشقىنداردىڭ ءبىر بولىگى اقتاۋ قالاسىنان 13 شاقىرىم جەردە سالىنىپ جاتقان عيماراتقا جاسىرىندى. ىزگە ءتۇسۋ توبى جانە ىشكى اسكەرلەر اسكەري ءبولىمىنىڭ جيىنتىق جاساعى عيماراتتى قورشاۋعا الدى.
ودان كەيىن سول جەرگە كەلگەن وبلىستىڭ ءىىد «ارلان» ارنايى ماقساتتاعى ءبولىنىسىنىڭ ۇستاۋ توبى شابۋىلدى جۇزەگە اسىردى. ناتيجەسىندە 3 سوتتالعان قايتىس بولىپ، بىرەۋى ۇستالدى. قاشىپ كەتكەن سوتتالعانداردىڭ جۇرگەن جەرىن انىقتاۋ جانە ولاردى ۇستاۋ بويىنشا شارالار قابىلدانۋدا»، - دەپ حابارلادى ىشكى ىستەر مينيسترلىگىنىڭ ءباسپاسوز قىزمەتى.

ماڭعىستاۋ وبلىستىق پروكۋراتۋراسى وسى وقيعاعا قاتىستى قىلمىستىق ءىس قوزعادى. وبلىستىق پوليتسيا قاماۋ ورنىنان قاشقان 11 ادامعا قىلمىستىق ىزدەۋ جاريالادى. ولاردىڭ توعىزى - كىسى ولتىرگەنى ءۇشىن، بىرەۋى - «قاراقشىلىق» پەن «توناۋ»، جانە بىرەۋى «تەرروريزم» قىلمىسى بويىنشا سوتتالىپ، اقتاۋ تۇرمەسىندە جازاسىن وتەپ جاتقان.

بۇعان دەيىن كەيبىر اقپارات قۇرالدارى ماۋسىمنىڭ 22-ءى كۇنى جەرگىلىكتى ۋاقىتپەن تاڭعى ساعات تورتتەن كەتە اقتاۋداعى قاتاڭ رەجيمدەگى قاماۋ مەكەمەسىنىڭ سىرت جاعىنا اۆتوكولىككە ءمىنىپ كەلگەندەر قارۋدان وق اتىپ، 20 ادامنىڭ قاماۋدان قاشىپ شىققانى تۋرالى حابار تاراتقان بولاتىن.

بۇگىن تاڭەرتەڭنەن بەرى اقتاۋ قالاسىنىڭ كوشەلەرىندە باقىلاۋ كۇشەيتىلىپ، قارۋلى ساقشىلار مەن پوليتسيا قىزمەتكەرلەرى كۇدىكتى جۇرگىنشىلەردىڭ قۇجاتتارى مەن اۆتوكولىكتەردى تەكسەرىپ جاتقانى تۋرالى حابار جەتىپ وتىر.

"ازاتتىق" راديوسىنىڭ ۆەب-سايتىنان