وبلىس اكىمى اماندىق باتالوۆ وبلىس ورتالىعىندا جاڭادان سالىنعان قالالىق كوپسالالى اۋرۋحانادا بولىپ، جۋىردا اشىلۋعا ءتيىس مەديتسينالىق مەكەمەنىڭ جاي-جاپسارىن پىسىقتادى. العاشقى كەزەكتە جاڭا عيماراتتىڭ سىرتقى كەلبەتى مەن كوگالداندىرىلۋىنا ءمان بەرگەن اكىم قورشاعان ورتا تابيعاتىنىڭ ناۋقاستاردىڭ تەز ساۋىعۋىنا ىقپال جاساپ، جاعىمدى اسەر ەتۋى كەرەكتىگىن اتاپ ءوتتى. بۇل جونىندە الماتى وبلىستىق "جەتىسۋ" گازەتى جازادى. 

بۇدان سوڭ عيماراتقا كىرە بەرىستەگى انىقتاما ءبولىمىنىڭ كومپيۋتەرمەن جابدىقتالىپ، ەلەكتروندىق جۇيەدە جۇمىس ىستەۋى، ناۋقاستاردى تەز تىركەپ، جەدەل قىزمەت كورسەتۋى ءۇشىن بارىنشا مۇمكىندىك جاساۋ قاجەتتىگىن تاپسىردى. ءماجىلىس زالىنىڭ بەزەندىرىلۋىنە دە كوز توقتاتىپ، دارىگەرلەر كەلەلى كەڭەس وتكىزەتىن ورىننىڭ بارلىق تالاپقا ساي بولۋىنا ءجىتى ءمان بەردى. ءبىرىنشى قاباتتاعى تەراپيا ءبولىمىن ارالاپ، وندا ورنىتىلعان قۇرال-جابدىقتاردىڭ ساپاسى مەن جاتىن بولمەلەردىڭ جايلىلىعىنا نازار اۋداردى. ەكىنشى قاباتتاعى حيرۋرگيا، ءۇشىنشى قاباتتاعى وپەراتسيالىق بولىمدەردى دە شولىپ ءوتىپ، قاجەتتى مەديتسينالىق اپپاراتتارمەن تولىق قامتىلعانىنا كوز جەتكىزدى. مۇندا ەم قابىلداپ جاتقان ناۋقاستاردىڭ دا كوڭىل-كۇيىن سۇرادى.

– جاڭا سالىنعان عيمارات تا، مۇنداعى قىزمەت كورسەتۋ ساپاسى دا كوڭىلدەن شىعادى. ناۋقاس ءۇشىن بارلىق جاعداي جاسالعان. ءوزىم سارقان اۋدانىنان كەلىپ ەمدەلىپ جاتىرمىن. قاتتى اۋىرىپ كەلىپ ەدىم، قازىر جاعدايىم ءبىراز جاقسارىپ قالدى. دارىگەرلەردىڭ جۇمىسىنا تەك ساتتىلىك تىلەيمىز، – دەپ اق جاۋلىقتى انا تىلەۋلەس مازيباەۆا ريزاشىلىعىن بىلدىرسە، زەينەتكەر نيۋ ۆلاديمير سەرگەەۆيچ:

– بۇل جەردى جۇماق مەكەن دەۋگە بولادى. اۋرۋحانانى بويلاي قاراتال وزەنى اعىپ جاتىر. سالقىن سامالى جانعا شيپا. جۋىردا عانا اشىلعان اسەم اللەيادا سەرۋەندەۋدىڭ ءوزى اۋرۋىمىزدان ايىقتىرىپ جىبەرگەندەي. وسىنداي تاماشا جەردەن اۋرۋحانا سالدىرعان باسشىلارعا العىستان باسقا ايتارىمىز جوق، – دەپ جىلى لەبىزىن جەتكىزدى.

جاڭا ىسكە كىرىسكەن اۋرۋحانادا ازىرگە وسى ءۇش ءبولىم جۇمىس جاساۋدا. ءبىر تاۋلىكتە 19 ادامدى قابىلداپ، پورتال بويىنشا تىركەلگەن 8 ناۋقاسقا مەديتسينالىق كومەك كورسەتكەن اق حالاتتىلار وتا جاساۋدى دا باستاپ كەتكەن. بارلىعى 300 توسەكتىك مەديتسينالىق مەكەمەدە بولاشاقتا نەۆرولوگيا، نەيروحيرۋرگيا، وفتالمولوگيا، ەندوكرينولوگيا، ۋرولوگيا، پۋلمانولوگيا، تراۆماتولوگيا مەن نەيروينسۋلتتىق بولىمدەر جۇمىس ىستەمەك.

كوپسالالىق اۋرۋحانا مەديتسينانىڭ ەڭ وزىق تەحنولوگيالارىمەن جابدىقتالعان. اتاپ ايتار بولساق، مۇندا فۋنكتسيونالدىق دياگنوستيكا، كومپيۋتەرلىك، ماگنيتتى رەزونانستى توموگرافيا، لاپاروسكوپيالىق قۇرىلعىنىڭ بەس ءتۇرى بار. بۇل اۋرۋدى دەر كەزىندە انىقتاپ، جەدەل كومەك كورسەتۋگە مۇمكىندىك بەرەدى. كەيبىر قۇرىلعىلاردىڭ رەسپۋبليكامىز كولەمىندە ساناۋلى عانا ەكەنىنە، ول مۇمكىندىككە تالدىقورعاندىق دارىگەرلەردىڭ قول جەتكىزىپ وتىرعاندىعىن ەسكەرسەك، ول اپپاراتتارمەن مامانداردىڭ جۇمىس ىستەي ءبىلۋى دە ماڭىزدى. وسى جايتقا ەرەكشە توقتالعان وبلىس اكىمى بىلىكتى مامانداردى شاقىرتۋ، دارىگەرلەردى قايتا وقۋدان وتكىزۋ ماسەلەسىنىڭ قالاي شەشىمىن تاۋىپ جاتقانىنا ءمان بەرىپ، بۇل ءىستىڭ ويداعىداي جۇزەگە اسۋىن قاتاڭ تاپسىردى.

وبلىس باسشىسى ءۇش قاباتتى ەڭسەلى عيماراتتىڭ كىر جۋاتىن، اس پىسىرەتىن ەكىنشى جاق بولىگىن دە ارالاپ كورىپ، ونداعى سوڭعى ۇلگىدەگى كىر جۋاتىن ماشينالار مەن اس پىسىرەتىن پليتا، بۋ تارتاتىن قۇرىلعى، توڭازىتقىشتىڭ دۇرىس ورنالاسۋىن قاداعالادى. وعان جاۋاپتى مامانداردىڭ دا ءىس تەتىگىن، تەحنيكا ءتىلىن ءبىلۋى قاجەتتىگىن ەسكەرتتى.

وسى سالاعا جاۋاپتى وبلىس اكىمىنىڭ ورىنباسارى باقتيار ونەرباەۆقا، وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋۆاليەۆكە كەيبىر كەمشىن تۇستاردى اتاپ ايتىپ، ونى اۋرۋحانانىڭ اشىلۋ كۇنىنە دەيىن رەتكە كەلتىرۋدى تاپسىردى. سونداي-اق، تالدىقورعان قالاسىنىڭ اكىمى باعدات قاراساەۆقا اۋرۋحانادا كۇندەلىكتى جۇمىس ىستەيتىن مەديتسينالىق قىزمەتكەرلەردىڭ قاتىناۋىندا، وعان قوسا مۇنداعى ناۋقاستار مەن ولاردىڭ جاعدايىن سۇراپ كەلەتىن تۋىستاردىڭ كەلىپ-كەتۋىندە ەشبىر قيىندىق تۋىنداماۋى ءۇشىن جول قاتىناسى ماسەلەلەرىن نازارعا الۋدى جۇكتەدى. اۋرۋحانانىڭ ديرەكتورى ساۋلە قۇسمولدانوۆاعا جاڭا ۇلگىدە سالىنعان زاماناۋي قۇرىلعىلارمەن جابدىقتالعان مەكەمەنىڭ حالىققا ساپالى، ءمىنسىز مەديتسينالىق قىزمەت كورسەتۋى قاجەتتىگىن جەتكىزىپ، ەڭ باستىسى بىلىكتى ماماندارمەن قامتىلۋى كەرەكتىگىن تاعى ءبىر مارتە قايتالاي ەسكەرتتى. 

الما ەسەنباەۆا

Abai.kz