«ينتەرفاكس-قازاقستان» اقپاراتتىق اگەنتتىگىنىڭ حابارلاۋىنشا، جاقىپ اسانوۆ حالىقارالىق ەكسپو-2017 كورمەسى كەزىندە استانادا ميتينگتەر وتكىزۋدى زاڭمەن شەكتەۋدى ۇسىندى. باس پروكۋرور بۇل ۇسىنىسىن قىلمىسپەن كۇرەس جانە زاڭدىلىقتار مەن قۇقىقتىق ءتارتىپتى قامتاماسىز ەتۋ جونىندەگى ۇيلەستىرۋشى كەڭەستىڭ وتىرىسىندا ايتتى. بۇعان قوسا اسانوۆ ەكسپو وتەتىن جىلى جەكە تۇلعالارعا قارۋ-جاراق ساتۋعا تىيىم سالۋدى ۇسىندى.

«جوعارى دەڭگەيدەگى مۇنداي شارالاردى اقىلعا قونىمدى شەكتەۋلەرسىز ۇيىمداستىرۋ مۇمكىن ەمەس. سوچيدە ميتينگتەردى، شەرۋلەردى، پيكەتتەردى زاڭمەن شەكتەدى. قارۋ-جاراق ساتۋعا تىيىم سالدى. اۆتوكولىكتەردى سىرتتان كىرگىزبەي قويدى. ءبىز دە سونى ويلاۋىمىز كەرەك. بۇل الەمدىك تاجىريبە. بارلىق مەملەكەتتەردە ادامدار ونى جاقسى تۇسىنەدى»، - دەدى اسانوۆ.

بيىل كوكتەمدە جەر ماسەلەسىنە قاتىستى قازاقستاننىڭ بىرنەشە قالاسىندا وتكەن نارازىلىق اكتسيالارىنان كەيىن ونداعان ازاماتتىق بەلسەندىگە ايىپپۇل سالىندى نەمەسە اكىمشىلىك مەرزىم بەلگىلەندى. تاعى بىرقاتارىنا قارسى قىلمىستىق ءىس اشىلدى.

6 ماۋسىمنان باستاپ قازاقستاننىڭ بارلىق وڭىرلەرىندە تەرروريستىك قاۋىپتىڭ «سارى» دەڭگەيى ەنگىزىلدى. ول 40 كۇنگە جاريالاندى. بۇل دەڭگەي اقتوبەدە قارۋلى توپتىڭ قالاداعى اسكەري بولىمگە جانە ەكى قارۋ-جاراق دۇكەنىنە شابۋىل جاساعان كۇنى ەرتەسىنە ەنگىزىلدى. قارۋلى شابۋىلدار سالدارىنان ءتورت بەيبىت تۇرعىن جانە ءۇش اسكەر قىزمەتكەرى قازا بولدى.