مەن بۇگىنگى قازاقتى تۇسىنە الماي-اق قويدىم...

قازاق جايلى ءسوز بولا قالسا، «ۇلتارالىق تاتۋلىققا سىنا قاعىپ جاتىرسىز» دەپ ءدۇر ەتە تۇسەدى.

ءجىبى ءتۇزۋ ءسوز ايتىلسا، «مۇنى كىم قارجىلاندىرىپ وتىر؟» دەپ تىكسىنە قالادى.

بيلىكتى ماقتاساڭ «ماقتادىڭ»، داتتاساڭ «داتتادىڭ» دەپ ءجۇنىڭدى جۇلىپ جەۋگە دايىن تۇر.

ابىرويلى بولام دەسەڭ، ءتىل، ءدىن، ءدىل جايلى جاق اشپاۋ كەرەك. ويتكەنى، قوينىڭداعى قاتىنعا سەنبەيتىن زامان تۋدى.

قازاق قازىر بىرىنە-ءبىرى ماساداي تۇمسىعىن سالىپ،  قانىن ىشەدى، ەكىنشىسى ەكىنشىسىن ارا بولىپ شاعادى، ءتىپتى ءبىرى ەشبىر كىناسىز ادامنىڭ اسىن شىبىنشا ىلامايلاپ كەتە بارادى.

ءوز ۇلتىن ءوزى مەنسىنەيتىن، ءوزىنىڭ تەگىن ءوزى ماقتان تۇتپايتىن «جۇرەكسىز عۇلامالار» پايدا بولدى.

اقتوبەدەگى لانكەستىك ارەكەتتەن كەيىن تاعى دا ءبىزدىڭ قوعامنىڭ ابىرويىن جاپقان كويلەك دار-دار جىرتىلدى.

ەڭ العاشقى ءسوزدى دە قوعام مۇشەلەرى شەگەلەپ تۇرىپ ايتا سالدى. «اتۋ كەرەك».

ەشكىمگە ەشكىم ەشقانداي تاپسىرما بەرمەسە دە قازىر سالافيتتەردى جازالاۋ وپپەراتسياسى باستالىپ كەتتى.

مىنە، قىزىق! الەۋمەتتىك جەلىلەردە اركىمدى ءبىر تابالاپ، «سەن سالافي، سەن ۋاحاب» دەپ ءبىر-ءبىرىنىڭ ۇستىنە «دومالاق ارىزدى» توپىرلاتا باستادى.

وسىدان التى-جەتى جىل بۇرىن، سول سالافتار مەن ۋاحابتار سوپىلاردى ءدال وسىلاي قانجىعاسىنا سالىپ ەدى.

دۇنيە الما كەزەك دەگەن تەگىندە راس بولسا كەرەك...

دەمەك، سوپى مەن سالافقا تۋعان كۇن بۇگىنگى تابالاۋشىنىڭ دا باسىنا كەلۋى مۇمكىن ەكەنىن جوققا شىعارا المايسىز...

بۇگىنگىنى قويشى، كەزىندە ءبىرىن-ءبىرى «حالىق جاۋى» ەتكەن بابالارىمىزدىڭ كۇيى ەسكە تۇسسە، ومىردەن تۇڭىلەسىڭ...

سول زامان قايتا كەلدى.

مۇنداي كەزدە «جۇرەكسىز عۇلامالار» ءپاتۋاسى تىم قاتال بولاتىنى وكىنىشتى.

الەمگە بەلگىلى عالىم سايات ىبىرايدى التى جىلعا تەمىر تورعا توعىتقان كۇشتەر وزگەلەردى دە اياماسى حاق.

ال، ول «وزگەلەردىڭ» ءبارى ەكسترەميستىك، يا تەرروريستىك دەڭگەيگە شارىقتاپ كەتتى مە، جوق پا؟ جۇرەكسىز عۇلامالار سونى ەسكەرسە ەكەن دەيسىڭ.

سەبەبى، قازىر ارقايسىمىزدىڭ ەكى تۋىپ، ءبىر قالعانىمىز ساقالىن ءوسىرىپ، بالاعىن كەسىپ تاستاپ ءجۇر. ولاردىڭ ءبارىن جاۋ دەپ بىلسەك، دوسىمىز كىم بولماق؟

بىراق، اقيقاتىن ايتۋ كەرەك، ەلىمىزدەگى سالافيتتەر قوعامدى دەل-سال كۇيگە ءتۇسىردى. ۇلتىعىمىزعا قاۋىپ ءتوندىرىپ، ءبارىمىزدى بيىك جاردىڭ شەتىنە شىعارىپ الدى. ەندى مىنە، يتەرەدى. سوسىن جوق بولامىز.

ءبىزدى، ءبىزدىڭ رۋحىمىزدى، ءبىزدىڭ سەنىمىمىزدى ء«ولىم جازاسىنا» كەسكەن ءدىني اعىمداردى جازالاۋدىڭ تىڭ جولىن قالاي تاپپاق كەرەك؟

داعاۋاتشىلار مەن سوپىلاردىڭ باسى تۇرمەگە توعىتىلعانمەن، تىلدەرى ءالى سايراپ تۇرعان جوق پا؟ ياعني، سالافتاردىڭ باسى قولدى بولسا دا، جۇرەكتەرى «سوعۋىن» توقتاتپاسى حاق.

سوندىقتان مەن ايتقان جازالاۋدىڭ بەيبىت جولىن (بالكىم زاڭمەن شەكتەۋ، اعارتۋشىلىق، ت.ب) تابۋ قاجەت.

وتكەندە ءبىر لاۋازىمدى قىزمەتتە ىستەيتىن تانىسىم سيرياداعى جيھادتان قايتقانداردى ءبىزدىڭ قۇزىرلى ورگاندار اۋەجايدان كۇتىپ الىپ، تەمىر تورعا توعىتىپ جاتقانىن ايتتى. ولار قازاقستان اۋماعىندا قىلمىس جاساماعاندىقتان، ءتۇرلى سىلتاۋلار تاۋىپ، جاماپ-جاسقاپ قىلمىستى ەتكەن بولادى-مىس. ءارى كەتكەنى ءتورت جىل، قالعانى ءبىر جارىم، ەكى جىلدى ارقالاپ، «دەمالىسقا» شىعىپ جاتقان كورىنەدى.

ەندى مىنە، ولاردىڭ العاشقى لەگى اشۋمەن بوستاندىق الا باستايدى.

سول اشۋلى قاۋىم جۇرەكتەرى ۋاحاببيزم دەپ سوعاتىندارمەن بىرىگىپ كەتسە نە بولماق؟

ويلانۋدىڭ ءوزى قورقىنىشتى...

قانات بىرلىكۇلى

Abai.kz